¹ Mu nshiku shakulekelesha, ulupili ulwaimininapo iŋanda yakwa Yawe lukaba e cibinda pa mpili shonse. Elukalepesha ukucila impili shimbi shonse, na bantu ba mishobo yonse elo bakalabutukilako. ² Abantu aba mishobo iyingi bakesa nokusosa abati, “Iseni, tuleyeni tuye nina ulupili lwakwa Yawe. Tuye ku ŋanda yakwa Lesa wakwa Yakobo, pakuti aye atufundeko ifyo tuli nokulacita, epakuti tuleenda mu nshila shakwe.” Pantu amafunde yakwa Yawe yakatula mu Sioni, kabili ishiwi lyakwe likafuma mu Yerusalemu. ³ Ena eukapingula imishobo iyingi, kabili no kukalulula abantu ba mishobo iyamaka, iyaba mupepi ne yaba ukutali, bakasuke bakabuule impanga shabo no kushifulamo bapulao ne nkasu, bakabuule na mafumo yabo, no kufulamo ifikwakwa. Ne mishobo ninshi yaleka no kulalwa inkondo, ninshi yaleka no kulaipekanya ukuya ku nkondo. ⁴ Abantu bonse umo umo bakalaikalila ku matwi tondolo, mwisamba lya miti ya myangashi ne mikunyu. Takwakabe na wakubatiinya nakalya, pantu Yawe umwine wa fita nasosa. ⁵ Nangu abantu ba mishobo yonse baleendela mwishina lya milungu yabo no kulaipepa, lelo ifwe twakulaendela mwishina lyakwa Yawe Lesa wesu no kulamunakila pe na pe. Abena Israeli bakalubukamo muli bunkole ⁶ Yawe aletila ati, “Pali bulya bushiku nkalonganya ifilema fyonse, no kubwesha abacili muli bunkole, na bantu abo nalimuna. ⁷ Abantu abalemana nkabacita ukuba abantu bandi abashalapo, elyo abo bapatula kumwabo, ine nkabalenga ukuba umushobo uwamaka. Na ine ne Yawe nkalabateekela pa lupili lwa Sioni ukutampafye ilyo line, ukufika no kukapela inshiku. ⁸ Na iwe we lupungu ulwakulondelapo impaanga,we lupili lwa Mwana mwanakashi wa Sioni, ubufumu bobe bukakubwelela nga filya wali kale. Bukateeka bukesa ku Mwana mwanakashi wa Yerusalemu.” ⁹ Nga mulandu nshi ulepundila ifi pakuloosha? Bushe nico ushakwata imfumu? Bushe bacilolo bobe nabafwa, pakuti ubukali bwise pali iwe ngo mwanakashi uukomenwe ne fumo? ¹⁰ Iwe we Mwana mwanakashi wa Sioni akuipotafye, uleteta ngo mwanakashi uuli pakupapa, pantu nomba walafumamo muno mu musumba, uye ikala na mu mpanga. Ukaya na ku calo ca Babiloni, kulya eko Yawe akaya kupusushishako, eko akakulubula ku maka ya balwani benu. ¹¹ Nomba, abantu ba mishobo iyingi nabalongana kukwisa kulwisha iwe. Baletila abati, “Natukoweshe Sioni. Natulolesheko uko uyu musumba uleshalafye umupili wa fitantala.” ¹² Kwena abantu ba iyi mitundu tabeshibe icili mu mano yakwa Yawe. Tabeshibe ukuti ico abalonganikile pamo ni pakuti abalimune, nga filya fine abantu balonganika imisonso ya ŋanu pamo pakuti batwe. ¹³ Yawe aletila ati,“Iwe we Mwana mwanakashi wa Sioni, ala im a, kakande abalwani bobe. Ine nalakucita uwamaka nga cilume wa ŋombe uwaba ne nsengo sha fyela na mabondo ya mukuba.