Mika ashobaula intungulushi sha bena Israeli ¹ Ine nalisosele nati, “Umfweni kuno imwe mwe ntungulushi sha bakwa Yakobo, mwe bakateeka ba ŋanda yakwa Israeli. Bushe teimwe mulingile ukwishiba umulinganya? ² Imwe mwalipata ifisuma, mwatemwafye ifyabipa. Mulafunda inkanda sha bantu bandi abomi, mwashinsula ne minofu ku mafupa yabo. ³ Mulalya iminofu ya bantu bandi, mwafundulula ne nkanda shabo. Mwatobaula na mafupa yabo, mwayaputula kwati yakubika mu cakwipikamo, kwati ni nama iyileipikwa mu mpoto.” ⁴ Inshita imo ikafika ilyo bakalakuuta Yawe mutuule, nomba nao takalebaasuka nakalya. Akafisa ne cinso cakwe kuli bena pali iyo nshita, takaleumfwa mapepo yabo pa mulandu wa micitile yabo iyabipa. ⁵ Ifi efyasosa Yawe ati, “Abantu bandi tepakubepwa kuli aba bakasesema. Ilyo bakwete ifyakulya, balasesema icibote, lelo abashibapeeleko kantu bena balababushisha inkondo. ⁶ Eico bushiku bwenu nabupwa tamwakulakwatapo ne fimonwa, imfifi eyalamuponena, akasuba kakawila bakasesema, no lubuuto lukasanguke mfifi. ⁷ Kanshi abasobela ifyakuntanshi bakabaseka, elyo ababuka nabo bakalengwa insoni. Bonse bakatalalafye tondolo, pantu Lesa talebasuka nakalya.” ⁸ Nomba ine Yawe alimpeelesha amaka, alimpelesha no Mupashi wakwe, alimpeela na mano ayamulinganya. Alilenga nokuti ndeshipa pakwebelapo abakwa Yakobo pa bucisanguka bwabo, na bena Israeli pa bubifi bwabo. ⁹ Umfweni kuno, mwe ntungulushi sha ba ŋanda yakwa Yakobo, na imwe bakateeka ba ŋanda yakwa Israeli, imwe mwalipata umulinganya, mulafulunganya ifintu fyonse ifyalungama. ¹⁰ Mwe bakuula Sioni ku mulopa walufyengo, umusumba wa Yerusalemu ku bubifi. ¹¹ Bakateeka ba musumba bauteekelafye mukupokelela amafisakanwa, bashimapepo ababamo pakulondolwela abantu amafunde yakwa Lesa, ninshi kano bena batala balipililwapo. Bakasesema pakwebako abantu ifyo Lesa abasokolwela, nabo ninshi kano batala bamwenapo ulupiya. Elyo bonsefye balaimona ukuti Yawe aba nabo. Balasosa nokuti, “Ala ifwe tafyakatuponene ifinkunka nakalya, pantu Yawe aba na ifwe.” ¹² 1Kanshi imwe nimwe bene mukalenga ukuti Sioni bakamulima nge bala, nimwe bene mukalenga ukuti Yerusalemu akasanguke umwina wa fitantala, nokuti pa lupili apaba iŋanda yakwa Lesa pakasapilwe, pakabefye umutengo.