Ishamo lya bantu abafyenga abalanda ¹ Bashama abantu abapanga ukucita ifyabipa, pa nshita balele pa misengele yabo. Batilafye cilya bwaca, ninshi bena kucita ifyabipa ifyo bali bapangile ukucita, pantu cili mu maka yabo ukucita fyonse ifyo balefwaya. ² Nga mabala balekumbwa,nninshi bena kuyapoka. Nga mayanda balefwaya, ninshi bena kuyapoka. Umuntu bena kumwibila iŋanda yakwe, no kucululusha ulupwa lwakwe, bamwibila ne fyuma fyakwe fyacishilano. ³ Eico Yawe alesosa ati, “Ine nomba ndeteyanya ukumuletela imwe ifinkunka, tamwakamone na pakulukuntila nakalya. Imwe mukakumana ne nshiku, lyena elyo mukaleka no kulaenda cilumba cilumba. ⁴ Iyo nshita nga yafika, abantu bakamushikila ulwimbo lwakumushokesha, pakulwimba bakalalumbula ifyo cikamuponena. Bakalatila abati, ‘Ala nabatupokolola fyonsefye. Yawe natupoka icalo cesu. Apeele na bantu abatusendele bunkole.’” ⁵ Eico ilyo inshita ikafika iyakubweseshapo abantu bakwa Yawe icalo cabo, takwakabe wakwakanya impanga nelyo umo pali imwe ukubomfya ukupendula nakalya. ⁶ Bakasesema wabo balanda ukuti, “Wilasesema ifi kuli ifwe, iyoo! Umuntu tafwile ukusesema pali ifi fintu, ifwe tatwakalengwe nsoni nakalya.” ⁷ Bushe kuti mwasosa ifi imwe mwe ba ŋanda yakwa Yakobo? Bushe Mupashi wakwa Yawe nafulwa? Bushe cine cine kuti acita icintu ca uyu musango? Abantu abacita ifyalungama, bushe Yawe talanda nabo amashiwi ayamutembo? ⁸ Yawe nao epakwasukapo ati, “Lelo imwe mwimina abantu bandi kwati balwani mulesansa. Abantu abaleipitilafye imwe mulabapoka ifyakufwala fyabo, abantu abashiipekenye ku bulwi. ⁹ Imwe mulatamfya abanakashi ba bantu bandi mu mayanda yabo ayo abene batemwa, na bana babo mulabapoka amapaalo ayo ine nabapeela aya pe nape. ¹⁰ Aleni imeni, akuyeni, muno tamuli ncende iyakuti imwe muleikalamo ubwanalale iyoo. Pantu ifibi fyenu efiletelele ino ncende pakuti yonaulwe. ¹¹ Nga kwaisa umuntu wabufi kabili incenjeshi, nao alanda ati, ‘Ine nalasesema ukuti imwe muli nokukwata umwangashi pamo no bwalwa ubwingi.’ Umuntu uwa musango uyu ena kuti bamupokelela no kufwaya abe kasesema wabo. ¹² “Nomba ine mu cishinkafye nkamulonganya pamo, imwe bonse mwe bakwa Yakobo. Mwe bena Israeli, mwe bashalapo, cine nkamulonganya, nkamulonganya pamo nge mpaanga ishilebwelela mwicinka. Mu calo cenu mukesula abantu pa, cikaba nge ncende umo impaanga shikalakupa pakushicema.” ¹³ Yawe eukabatungulwila inshila, no kubafumya muli bunkole. Bakonaula impongolo sha mu musumba, no kufuma bakafume, bakaleya no kuya. Imfumu yabo ikatangilila abantu, Yawe umwine, eukabatungulwila inshila.