¹ Awe ine nalishama mwe! Ndi ngo muntu uukolonganika ifisabo mu lusuba, pa nshita yakusota mwibala, ilyo tamuba fitwalo fya myangashi ifyo ningalya, ilyo takulaba ikunyu lyantanshi nangu limo ilyo nkabila nganshi. ² Muli cino calo tamushele muntu wacishinka nelyo umo nakalya, tamushele nelyo umo nakalya uupetamine Yawe. Abaume bonse balalalililapo umo uwakuti bepaye, bonsefye bene balunga abanabo, no kubawikisha mwisumbu lyabo. ³ Bonsefye ni ncenjeshi shakantu kukucita ifyabipa. Bacilolo balomba ifyabupe ku bantu na baputula imilandu balomba amafisakanwa. Umuntu uwamaka asosa ukupeelwa ifyo alefwaya, bonse kumfwana umwakucitila. ⁴ Muli abo uwawamishapo aba nga nkololo, no wacishinka wabo aba nge linga lya myunga. Ubushiku nabwisa ubo bakalinda wabo baletiina, ubushiku ubo Lesa akakandamo abantu. Ino e nshita ya cimfulunganya cabo. ⁵ Tecakwesha kulacetekela mwina mupalamano obe, wilacetekela munobe. Ulecenjela kufyo uleeba nangu mukashi obe. ⁶ Muno nshiku umwana umwaume alecita wishi nge cipuba, umwana umwanakashi alesuula nyina, umwanakashi uwaupwa alesuula nyinafyala, ala nomba abalwani abo umuntu akwata, bantu ba mu lupwa ulwakwefye. ⁷ Nomba ine nakulalolela Yawe. Nakulatetekela Lesa uukampusushako. Ala Lesa wandi ine akaŋumfwa. ⁸ Abalwani bandi belasamwa pali ine pantu nangu ngwile, ine nkema. Nangu njikele mu mfifi, Yawe ine akandetela ulubuuto. ⁹ Apo ine nalibifya kuli Yawe, kanshi nakulashipikishafye pali nomba ilyo alenkalipila. Pakulekelesha akampokololako, no kundubulwilako umulandu wandi. Akamfumisha panse pa lubuuto, nkaimwena ubulungami bwakwe. ¹⁰ Abalwani bandi nabo bakamonako, elyo ne nsoni shikabekata, abalwani bandi bena balentumfya abati, “Nga Yawe Lesa obe aba kwi?” Nkamonako uko balecimba, noko balenyantaulwapo nga filya banyantauka mu matipa ayali mu misebo. ¹¹ Imwe mwe bena Yerusalemu, ubushiku bumo bukafika, ubwakukuula cipya cipya amalinga ya musumba. E bushiku mukakushako ne mipaka ya calo cenu. ¹² Pali bulya bushiku abantu bakabwelela kuli iwe, bakafuma ku calo ca Asiria na ku misumba ya mu Egupto, ukutula ku calo ca Egupto no kuya ku mumana, bakesa ukutula kuli bemba no kuya kuli bemba,ukutula ku lupili no kuya ku lupili. ¹³ Lelo kwena isonde lyonse likasanguka amatololo,pa mulandu wakubifya kwa bantu abaikalapo. ¹⁴ We Yawe, wingalacema abantu bobe ku nkoto yobe, pantu bena cikwatwa cobe, mukuni obe, bantu abaikala beka mu mpanga iyashingulukwa ne calo ica mufundo. Wingaleka baleya, baye mukulya mu citungu ca mufundo ica Bashani neca Gileadi, nga filya fine balecita kale. ¹⁵ Nkamulanga ifipeshamano, nga filya fine nacitile ilyo namufumishe mu calo ca Egupto. ¹⁶ Abantu ba mishobo ya benafyalo bakaimwena, imisana yabo ikaputuka nangu bakwatisha ubulamba. Bakabika ulupi pa tunwa twabo, na matwi yabo yakakoma. ¹⁷ Bakalamyanga iloba nge nsoka, no kulakulika nge fibumbwa ifikulika pa mushili. Bakesa baletutuma ukufuma mu misumba ya malinga yabo, bakaba no mwenso pakwalukila kuli Yawe, Lesa wesu, kabili bakatiina nganshi pa mulandu obe. ¹⁸ Mulungu nshi uwalingana na iwe, uulekelela ifyabubifi fya bantu, no kubelela abantu uluse pali bumpulamafunde, pa bashalako ku bacikwatwa cakwe? Ena tafwaya ukutwalilila ukufulwa pe, pantu alitemwa ukubelela uluse. ¹⁹ Ali nokubwekeshapo ukutucitila inkumbu, ali nokunyantawila ifyabubifi fyesu panshi ya makasa yakwe. Apose ne fyabubifi fyesu, petenga ilyashika pali bemba. ²⁰ li nokulanga icishinka kuli Yakobo, no kutemwa kobe ukushipwa kuli Abrahamu, nga filya fine walapile kale ku fikolwe fyesu ukuti efyo ukalabacitila.