¹ Ilyo yesu amwene amabumba, aninine palupili. Elyo aikeleko panshi, abasambi bakwe baishile kuli ena. ² Aiswile akanwa kakwe no kubasambilisha, ukutila, ³ ''Balipalwa ababusu mu mupashi, pantu ubufumu bwa mu mulu bwabo. ⁴ Balipalwa abo abalosha, pantu bakatalalikwa. ⁵ Balipalwa abaicefya, pantu bakapyana isonde. ⁶ Balipalwa abo abakwata insala ne cilaka ca bulungami, pantu bakesushiwa. ⁷ Balipalwa abaluse, pantu bakapokelela uluse. ⁸ Balipalwa abasanguluka mu mitima, pantu bakamona Lesa. ⁹ Balipalwa abalenga umutende, pantu baketwa abana abaume bakwa lesa. ¹⁰ Balipalwa abo abapakashilwa pamulandu wa bulungami, pantu ubufumu bwa mu mulu bwabo. ¹¹ ''Mwalipalwa imwe ilyo abantu bamituka no kumipakasa no kusosa ifintu fyonse ifya lekana lekana ifya bufi pa mulandu waine. ¹² Sangalaleni no kwanga, pantu icilambu cenu cikalamba kumulu. Pantu muli inshila abantu balipakese bakasesema abaliko ilyo taulabako. ¹³ ''Muli mucele we sonde. Lelo umucele nga walusa bu mucele, kuti walengwa shani ukuba umucele nakabili? Tawakayane nakabili kucili conse kanofye ukuposwa kunse no kunyantwapo namakasa ya bantu. ¹⁴ Muli Lubuto lwa calo. Umusumba uwabikwa palupili teti ufiswe. ¹⁵ Nangu abantu tabasanika inyali nokubika panshi yamuseke, lelo babika pamulu wacakuteekapo inyali, kabili ilasanikila onse uuli mu nganda. ¹⁶ Lekeni ulubuto lwenu lusanike pa bantu munshila yakuti benga mona ificititwa fyenu ifisuma no kupela ubukata kuli Shinwe uwaba mu mulu. ¹⁷ "Mwitontokanya ukutila naisa mukonaula amalango nangu ba kasesema. Nshaisa mukubonaula, lelo mukuba fikilisha. ¹⁸ Pantu mucine ndetila kuli imwe ukuti mpakafye umulu ne sonde fikapite, takuli akalitoni kamo nangu akasengo akakapita munshila iili yonse ukufuma mumalango, mpakafye fintu fyonse fyafikilishiwa. ¹⁹ Eico onse uwatobamo limo ilya cepesha pali aya mafunde no kusambilisha bambi ukucita ico aketwa uwacepesha mu bufumu bwa mu mulu. Lelo onse uuyasunga noku yasambilisha aketwa umukalamba mu bufumu bwa mu mulu. ²⁰ Pantu natila kuli imwe ukuti kanofye ubulungami bwenu bwacila ubulungami bwa bakalemba na ba Falise, tamwakengile mu bufumu bwamu mulu munshila iili yonse. ²¹ "Mwalyumfwa ukuti calisoselwe kuli bena munshita shakale, 'Wilaipaya, kabili, 'Onse uwaipaya akaba mukayofi ku bupingushi.' ²² Lelo natila kuli imwe ukuti onse uwa fulilwa munyina akaba mukayofi ku bupingushi; na onse uwatila kuli munyina, Iwe we cinangwa camuntu!' akaba mukayofi kacilye; kabili onse uwatila, 'We cipumbu we!' akaba mukayofi ka mulilo wa kumbo. ²³ Eico nga ulepela icabupe cobe pacipailo elyo palya waibukisha ukutila munonko nakwata icintu naiwe, ²⁴ sha ica bupe cobe pa ntanshi ya cipailo, no kuya mu nshila yobe. Ica ntanshi wikishanyeni na munonko, kabili elyo ubwelele no kupela icabupe cobe. ²⁵ Suminishanyeni na umulwani obe mukwangufyanya ilyo muli nao mu nshila yakuya ku cilye, pantu umulwani obe kuti akupela kuli ba kapingula, naba kapingula kuti bakupela ku mushilika, kabili kuti waposwa mu cifungo. ²⁶ Mucine natila kuli iwe, tawakafumemo mulya mpakafye walipila indalama yakulekelesha pafyo wakongola. ²⁷ "Mwalyumfwa casoselwe ukuti, 'wilacita bucende.' ²⁸ Lelo ine natila kuli imwe ukuti onse uwa lolesha pa mwanakashi no lunkumbwa ninshi nacita kale ubucende nankwe mu mutima wakwe. ²⁹ Ilinso lyobe ilya ku kulyo nga lile kupunwisha, lilobolemo nokuliposa ukufuma kuli iwe. Pantu cakuwaminapo ukuti icilundwa cobe cimo caonaika ukucila umubili obe onse ukuposwa kumbo. ³⁰ Nga cakuti ukuboko kobe ukwa ku kulyo kule kupunwisha, kuputuleko nokukuposa ukufuma kuli iwe. Pantu cawamapo icilundwa cobe cimo ukonaika ukucila umubili obe onse wingaya kumbo. ³¹ Calisoselwe nakabili, 'onse uwatamfya umukashi wakwe, lekeni amupele icitupa cakulekana.' ³² Lelo ndetila kuli imwe uyo onse uwaleka umukashi wakwe, kanofye pa mulandu wabucende, amulenga ukuba umwankashi umucende. Onse uwamupa panuma bamuleka acita ubucende. ³³ Nakabili, mwalyumfwa ukuti cali soselwe kuli abo munshita shakale, 'wilalapa umulapo wabufi, lelo panga imilapo yobe kuli Shikulu.' ³⁴ Lelo nasosa kuli imwe, mwila esha ukulapa, nangula ukupitila mu myulu, pantu cipuna cakwa Lesa; ³⁵ Nangu ukupitila mwi sonde, pantu pa kunyanta amakasa yakwe; nangu kupitila muli Yerusalemu, pantu musumba wa mfumu nkalamba. ³⁶ Nangu cibe kulapa pa mutwe obe, pantu teti ulenge umushishi umo ukubuta nangu ukufita. ³⁷ Lelo lekeni ukulanda kwenu kube, 'Eee, eee,' Nangula 'Awe awe.' Ifili fyonse ukucila pali ifi fya kufuma ku mubifi. ³⁸ "Mwalyumfwa calisoselwe ukuti, 'ilinso pe linso, ne lino pa lino.' ³⁹ Lelo natila kuli imwe, mwikana umu bifi. Icilingile, onse uwakuma kwisaya lya ku kulyo, mupili bukile naku libiye. ⁴⁰ Nga uuli onse alefwaya ukulubulula naiwe nokusenda umwingila obe, leka uyo muntu asende ne laya lyobe. ⁴¹ Onse uwakupatikisha ukwenda nao umulundu umo, endeni nankwe ibili. ⁴² Pela kuli onse uwa kulomba, kabili mwi aluka kuli onse uulefwaya ukwashima kuli imwe. ⁴³ "Mwalyumfwa casoselwe ukuti, 'Ufwile watemwa umwina mupalamano no kupata umulwani obe.' ⁴⁴ Lelo natila kuli imwe, temweni abalwani benu kabili pepelini abo bonse abamipakasa. ⁴⁵ Pakuti mwingaba abana baume bakwa Shinwe uwaba mumulu. Pantu alalenga akasuba kakwe ukubalika pa babi na basuma, no kutuma imfula pa balungami na bashili abalungami. ⁴⁶ Pantu nga watemwa abo abakutemwa, cilambu nshi ulesenda? Bushe tefyo naba kasonkesha wa misonko bacita fimo fine? ⁴⁷ Nga waposhafye ba munonko, finshi wacita ukucila bambi? Bushe na bena fyalo taba cita fimo fine? ⁴⁸ Eico mufwile ukuba abapwililika, ngefyo Shinwe wa mu mulu apwililika.