¹ Elyo Yesu atungulwilwe no mupashi ukuya mu matololo ku kutunkwa na kasebanya. ² Ilyo alekele ukulya pa nshiku amakumi yane akasuba no bushiku, aliiketwe ne nsala. ³ Katunka aishile no kutila kuli ena, ''Nga uli Mwana wakwa Lesa, eba aya mabwe ukwaluka umukate.'' ⁴ Lelo Yesu amwaswike no kutila kuli ena, ''Calilembwa aciti, 'Umuntu teti ekalile ku mukate weka, lelo ku cebo conse icifuma kukanwa kakwa Lesa.'' ⁵ Elyo kasesebanya amutwele mu musumba wa mushilo no kumutwala pakansoshi kacikulwa ce tempele, ⁶ kabili atile kuli ena, ''Nga uli Mwana wakwa Lesa, ipose we mwine panshi, pantu cali lembwa aciti, 'Akakonkomesha ba malaika bakwe uku kusunga,' 'Bakakwimya mu maboko yabo pakuti tauipunwine ulukasa lobe kwi libwe.''' ⁷ Yesu atile kuli ena, ''Nakabili cali lembwa aciti, 'Wila esha Shikulu Lesa obe.'' ⁸ Nakabili, kasebanya amusendele pamulu walupili ulwasansamisha no kumulanga amabufumu yonse aya calo no bukata bwayako bonse. ⁹ Atile kuli ena, ''Fyonse ifi fintu ndekupela, nga wawa panshi noku nshinshimuna ine.'' ¹⁰ Elyo Yesu atile kuli ena, ''Fuma pano, Kasebanya! Pantu calilembwa aciti, 'Ule pepa Shikulu Lesa obe, kabili ekafye eo ulepyungila.''' ¹¹ Elyo Kasebanya amushile, kabili moneni, bamalaika baishile no kupyungila. ¹² Nomba ilyo Yesu aumfwile ukuti Yohane na bamwikata, afumineko nokuya ku Galili. ¹³ Afumine ku Nazareti aile no kwikala mu Kapenamu, iyo iyaba mululamba lwa Bemba wa Galili mu mipaka yakwa Sebuluni na Nafutali. ¹⁴ Ifi fyacitike mukufikilisha ku fyasoselwe na Esaya kasesema, ¹⁵ ''Icalo cakwa Sebuluni ne calo cakwa Nafutali, ukulola kuli bemba, kwi shilya lya Yodani, Galili wa bena fyalo! ¹⁶ Abantu abaikele mu fimfi bamona ulubuto ulukalamba, kabili kuli abo abaikele mu citungu ne cinshingwa ca mfwa, pali bena epo lubuto lwimine.'' ¹⁷ Ukufuma pali ilya nshita Yesu atendeke uku shimikila no kusosa ati, ''Lapileni, pantu ubufumu bwa mu mulu nabwisa mupepi.'' ¹⁸ Ilyo aleenda mululamba lwa Bemba wa Galili, amwene bamunyina babili, Simoni uwitwa Petero, na Andreya munyina baleposa isumbu pali bemba, pantu bali balondo be sabi. ¹⁹ Yesu atile kuli bena, ''Iseni, nkonkeni, kabili nkamulenga ukuba abalondo ba bantu.'' ²⁰ Palya pene bashile amasumbu noku mukonka. ²¹ Ilyo Yesu aleya pantanshi ukufuma palya amwene nabambi bamumina babili, Yakobo umwana mwaume wakwa Sebedi na Yoani munyina. Bali mu bwato na Sebedi wishibo balelunda amasumbu yabo. Ali betile, ²² na palyapene balishile ubwato na wishibo kabili balimukonkele. ²³ Yesu aile monse mu Galili, alesambilisha muma sinagogi yabo, ukushimikila imbila nsuma yabu fumu no kuposha imisango ya kulwala konse na malwele yonse pa bantu. ²⁴ Ilyashi pali ena lyaile mu Silia monse, na bantu baletele kuli ena bonse abo aba cushiwe ku malwele yalekana lekana no bukali bonse, abo abawilwa ne ngulu, aba cipumputu, naba bulebe. Yesu alibaposeshe. ²⁵ Amabumba yakalamba yamukonkele ukufuma ku Galili, Dakapoli, Yerusalemu, na Yudea, na kwi shilya lya Yodani.