¹ "Cenjeleni ukuti mwicita imilimo yenu iya bulungami ukuti abantu bamumone, pantu tamwakakwate icilambu ukufuma kuli shinwe uwaba mu mulu. ² Eico Ilyo mwapela ifya nkumbu, mwiilishisha intandala ngefyo ba bumbi munda bacita mu ma Sinagogi na mu misebo, ukuti bacindikwe nabantu. Icine nalanda kuli imwe, naba pokelela icilambu cabo mukupwililika ³ Lelo ilyo mwapela ifya nkumbu, mwileka ukuboko kwaku kuso kwishibe ifyo ukuboko kwaku kulyo kulecita ⁴ pakuti ifya nkumbu fyenu finga pelwa munkama. Elyo Shinwe uumona munkama aka mulambula. ⁵ "Ilyo mulepepa, mwiba nga ba bumbi munda, pantu batemwa ukwiminina nokupepa muma Sinagogi na mufifuti fya misebo ukuti babamone ku bantu. Cine nalanda kuli imwe, naba pokelela icilambu cabo. ⁶ Lelo imwe, ilyo mulepepa, ingileni mu muputule wenu uwa mukati. Isaleni icibi no kupepa kuli Shinwe, uwaba munkama. Elyo Shinwe uumona mu nkama aka mulambula imwe. ⁷ Ilyo mulepepa, mwisosa cisose sose noku bwelela muli fimo fine ngefyo abena fyalo bacita, ba tontokanya ati balabomfwa pa mulandu wa mashiwi yabo ayengi. ⁸ Eico, mwiba nga bena, pantu Shinwe alishiba ifintu ifyo mufwaya ilyo tamulamulomba. ⁹ Eico pepeni amuti: 'Tata wesu mu mulu, lekeni ishina lyenu libe ilya cindikwa nge lya mushilo. ¹⁰ Lekeni ubufumu bwenu bwise. Lekeni ubufwayo bwenu bucitwe pano isonde ngefyo mu mulu mwaba. ¹¹ Tupeleni lelo umukate wa nshiku shonse. ¹² Tweleleni ku misha yesu, ngefyo naifwe twelela abatukwatila imisha. ¹³ Mwitutwala mu kweshiwa, lelo mutu pokololeko ku mubifi.' ¹⁴ Pantu nga mwaelela abantu impulumushi, Shinwe uwa mumulu nao aka mwelela. ¹⁵ Lelo nga tamwelele impulumushi shabo, Shinwe uwa mumulu nao taka mwelele impulumushi shenu. ¹⁶ "Ilyo mwaleka ukulya, mwikwata icinso ca bulanda ngefyo ba bumbi munda bacita, pantu bafinya pa menso pakuti abantu ba mone ati nabaleka ukulya. Icine nasosa kuli imwe, naba pokelela icilambu cabo mukupwililila. ¹⁷ Lelo iwe, ilyo waleka ukulya, suba umutwe obe no kusamba pa menso ¹⁸ ukuti cimoneka kuli bambi ukuti na uleka ukulya, kano kuli Wiso uwaba munkama; na Wiso uumona munkama aka kulambula. ¹⁹ "Mwilonganika ifyuma fyenu pano isonde, apo ifi pelebesha ne ndalawa fyonaula, naba pupu ba toba no kwiba. ²⁰ Lelo, longanikeni ifyuma mu mulu, umo nangu fipelebesha ne ndalawa teti fyonaule, kabili umo aba pupu taba toba no kwiba. ²¹ Pantu ukuli ifyuma fyenu, eko no mutima wenu ukaba ²² Ilinso e nyali ya mubili. Eico, nga ilinso lyobe lili bwino, umubili onse na wisulamo no lubuto. ²³ Nomba nga ilinso lyobe libi, umubili obe onse na wisulamo ne mfifi. Eico, nga ulubuto ululi muli iwe nga ni mfifi, ifyo ya fitisha iyo imfifi! ²⁴ Takuli uwinga bombela ba shikulu babili, pantu kuti apatapo umo noku temwa umubiye, nangu kuti aipela kuli umo nokusula umubiye. Teti ubombele Lesa no bunonshi. ²⁵ Eico ndesosa kuli imwe, mwisakama palwa mweo wenu, ifyo mwalalya nangu ifyo mwalanwa; nangu pa mulandu wa mubili wenu, ifyo mwala fwala. Bushe umweo tawacila ifyakulya, no mubili ukucila ifyakufwala? ²⁶ Moneni ifyuni mulwelele, tafitanda nangu ukusepa nangu ukulonganika mu matala, lelo Shinwe wa mumulu ala filisha. Tamwaba no mutengo ukucila fyena? ²⁷ Ni nani pali imwe uwo ukusakamana kunga lunda umulingo pa myaka ya mweo wakwe? ²⁸ Ninshi mwasakamanina pa kufwala? Tontokanyeni pa maluba mu mabala, ifyo yakula. Taya tukuta, kabili tayapikula nsalu. ²⁹ Eco ndesosa kuli imwe, nangu Solomoni muli fyonse ifya bukata bwakwe tafwikilwe nga cimo palifi. ³⁰ Nga Lesa kuti afwika ifyani fya mu mpanga, ifyo ifibapo lelo kabili mailo fya poswa mu mulilo, nga imwe tacakacilepo ukumufwika, mweba cicetekelo ica cepa? ³¹ Eico mwisakamana nokusosa, 'Twalalya inshi?' Nangu 'Twalanwa inshi?' nangu 'Twalafwala finshi?' ³² Pantu abena fyalo bafwaya ifi fintu na Shinwe wa mumulu alishiba ukuti mulafikabila. ³³ Nomba fwayeni icakubalilapo ubufumu bwakwe no bulungami bwakwe, na fyonse ifi fikapelwa kuli imwe. ³⁴ Eico, mwisakamana pali mailo, pantu mailo ikaisakama iyine yeka. Cila bushiku bwali kwata ifingi ifibi fya buko.