¹ Panuma ya nshiku mutanda Yesu asendele Petelo, Yakobo, na Yohane ndume yakwe, nokubaleta pamulu walupili ulutali abene beka. ² Alicinjishiwe pali bena. Icinso cakwe cabengeshime nga kasuba, ne nsalu shakwe shabutile ngo lubuto. ³ Moneni, kwaishile monekela kuli bena Mose na Eliya balelanda nankwe. ⁴ Petelo alyaswike no kutila kuli Yesu, "Shikulu, cawama tubefye kuno kwine. Nga mulefwaya, nalapanga pano insakwe shitatu - imo yobe, kabili imo yakwa Mose, imbi yakwa Eliya." ⁵ Elyo acili alelanda, moneni, ikumbi ilya buta lyalibakupikile, kabili moneni, mwafumine ishiwi mwi kumbi, ukuti, "Uyu e Mwana wandi eo natemwisha, muli ena emo mbekelwa. Kutikeni kuli ena." ⁶ Elyo abasambi baumfwile ici, baponene ubunkupeme kabili bali no mwenso. ⁷ Elyo Yesu aishile no kubekata nokutila, "Imeni kabili mwitina." ⁸ Elyo baloleshe ku mulu lelo tabamwene nangu umo kanofye Yesu eka. ⁹ Elyo baletentemuka ulupili, Yesu aliba konkomeshe, no kutila, "Mwiyebako nangu umo ifyo mwanona mpanka Umwana wa Muntu akabuke ukufuma ku bafwa." ¹⁰ Abasambi bakwe balimwipwishe, ukuti, "Bushe mulandu nshi bakalemba basosela ukuti Eliya afwile abalilapo ukwisa?" ¹¹ Yesu aliyaswike no kutila, "Icine Eliya akesa kabili akabwesha ifintu fyonse. ¹² Lelo ndemyeba, Eliya alisa kale, lelo taba mwishibe. Mucifulo, bacitile fyonse ifyo balefwaya ukucita kuli ena. Munshila imo ine, Umwna Wamuntu nao wine akacula mu minwe yabo." ¹³ Elyo abasambi baishibe ukuti alelanda kuli bena palwa kwa Yohane Kabatisha. ¹⁴ Elyo baishile kwi bumba, umwaume aishile kuli ena, no kumufukamina, kabili atile, ¹⁵ "Shikulu, beleleni uluse umwana wandi umwaume, alilwala icipumputu kabili alacula apakalamba. Pantu ilingiline alaponena mu mulilo nangu mu menshi. ¹⁶ Nacimuleta ku basambi bobe, lelo taba cimundapa." ¹⁷ Yesu alyaswike no kutila, "Wenkulo iyi shasumina kabili iyabubifi, bushe nkekala naimwe ukufika lilali? Bushe nkalanda imiku inga pakuti mukomfwe? Muleteni kuli ine." ¹⁸ Yesu alikalipile ingulu, nayo yafumine muli ena, kabili umulumendo ali undapwa pa nsa ilya ine. ¹⁹ Elyo abasambi baishile kuli Yesu mubumfisolo no kutila, "Bushe mulandunshi tatwaciutamfisha?" ²⁰ Yesu atile kuli bena, "Pantu icitetekelo cenu cinono. Pantu ndemweba icine, nga uli necitetekelo nangu icinono ngoluseke lwa lubanga, kuti wa landa kuli ulu lupili, 'sela apa no kuya uko,' kabili nalo lukasela, kabili tapakabe icikakwansha." ²¹ Lelo ingulu shamusangu uyu tashifuma kanofye nama pepo nokufunga. ²² Lilya baikele mu Galilee, Yesu atile kubasambi bakwe, "Umwana Wamuntu akapelwa mumaboko ya bantu, ²³ kabili baka mwipaya, kabili ubushiku bwalenga shitatu akabushiwa." Na basambi balisakamikwe. ²⁴ Ilyo baishile ku Kapenamu, abaume abapoka umunsoko balishile kuli Petelo nokutila, "Bushe kafundisha wenu tapela musonko?" ²⁵ Atile, "Ee." Ilyo Petelo aishile mu nganda, Yesu alandile nankwe intanshi no kutila, "Bushe uletontonkanya shani, Simoni? Bushe ishamfumu shape sonde shipoka imisonko kuli bani? Ukufuma kubana babo abaume nangu ukufuma kuli bambi?" ²⁶ Petelo alyaswike ati, "kuli bambi. "Kanshi abana baume bantungwa," Yesu atile. ²⁷ Lelo pakuti twilenga ba kasonkesha wa musonko ukuipununa, kabiye kuli bemba, uposemo indobani, kabili ufumye isabi ilileisa pakubala. Ilyo walaisula akanwa kaliko, ulesangamo shekele. Senda kabili upele ba kasonkesha wa musonko pali iwe naine."