¹ Pali ilya nshita abasambi baishile kuli Yesu no kutila, ''Nani umukalamba mu bufumu bwa mu mulu?'' ² Yesu aitile umwana umunono kuli ena, no kumubika pakati kabo, ³ No kutila, ''Ndemweba icine, nga tawalwike no kuba nga abana banono, iwe tawakengile mu bufumu bwa mu mulu nakalya. ⁴ Eico, ulyo onse uuicefya no kuba ngo mwana umunono uyu emukalamba mu bufumu bwa mu mulu. ⁵ Uyo onse uwapokelela umwana munono nga uyu mwishina lyandi ninshi apokelela ine. ⁶ Lelo uyo onse uwalenga umo uwa muli aba abanono abo abasumina muli ine ukuipununa, kuti cayana uyo ukukakwa ne cilibwe mu mukoshi, kabili ena akebishiwe pe tenga lya bemba. ⁷ ''Akalanda kwi sonde pamulandu na mabwe ya kuipununako! pantu cili icikankala ukuti ayo mabwe ya kuipununako yese, lelo kalanda kuli uyo muntu uyo aya mabwe yakuipununako yaleishilamo! ⁸ Nga ukuboko kobe nangu ukukasa lobe lwakulenga ukuipununa, kuputule noku ku posa ukufuma kuli iwe. Cayana iwe ukwingile mu mweo wa pee uwaputulwa icilundwa nangu umulema ukucila ukuposwa mu mulilo wa pee na maboko yabili nangu amakasa yabili. ⁹ Nga ilinso lyobe lyakulenga ukuipununa, litonkole no kuliposa ukufuma kuli iwe. Cayana iwe ukwingila mu mweo wape ne linso limo ukucila ukuposwa mu ngehena ya mulilo na menso yabili. ¹⁰ Mumone ukuti tamulesuusha nangu umo pali aba abana banono. Pantu ndemweba ukutila ba malaika babo mu mulu lyonse batamba icinso ca kwa Tata uyo uwaba mu mulu. ¹¹ Pantu Umwana Wamuntu aishile mukupususha abo aba luba. ¹² Mule tontonkanya shani? Nga umo nakwata impaanga umwanda umo, kabili imo pali shene lyaluba, bushe teti ashe shilya ishili amakakumi pabula na pabula pa mbali ya mulundu no kuya alefwaya ilya imo iyilubile? ¹³ Nga ena aisanga, ndemweba icine nati, ena alasekelela pali iyo ukucila shilya amakumi pabula na pabula isho ishisha ciluba. ¹⁴ Munshila imo ine, tebufwayo bwa kwa Shinwe uwa mu mulu ukuti umo pali aba abana banono abe uwakuloba. ¹⁵ ''Nga munyina akubembukila, kabiye no kumukalipila, pakati ka iwe na ena ekafye. Nga cakuti atesha kuli iwe, ninshi iwe naunonka munonko. ¹⁶ Lelo ena nga tomfwile kuli iwe, sendapo umo nangu nabambi babili pamo na iwe pakutila kutunwa twa bantu babili nangu ubunte bwa batatu cila cebo cishininkishiwe. ¹⁷ Kabili ena nga akana ukumfwa kuli bena, twala umulandu ku cilonganino. Kabili nga akana ukumfwa ku cilonganino, lekeni uyo abe kuli imwe ngo mwina fyalo kabili kasonkesha wamisonko. ¹⁸ Ndemweba icine nati, icintu conse ico mwakaka pano calo cikaba icakakwa na mu mulu, kabili icintu conse ico mwakakula pano calo cikaba ica kakulwa na mu mulu. ¹⁹ Nakabili ndemweba iciine, nga imwe babili mwasumininshanya pano calo palwa cili conse ico mulelomba, Tata uyo waba mu mulu ali nokumicitila ico. ²⁰ Pantu apo babili nangu batatu balongene pamo mwishina lyandi, naine ninshi ndi pakati kabo.'' ²¹ Elyo Petelo aishile no kutila kuli Yesu, ''Shikulu, nipamiku inga munyina enga bembukila ine no kumwelela? Bushe ni pamiku cine lubali?'' ²² Yesu atile kuli ena, ''Nshikwebele pa miku cine lubali, lelo pa miku amakumi cine lubali na cine lubali. ²³ Eico ubufumu bwa mu mulu bwapalana ne mfumu imo iyo yalefwaya ukwishiba ifyo abasha bakwe babomfeshe indalama. ²⁴ Ilyo yatendeke ukupitulukamo, umubomfi umo bamuletele kuli yena uyo uwakongweleko amakana ikumi aya ndalama. ²⁵ Lelo ico takwete inshila ya kubweseshamo, shikulu wakwe amupingwile ukushitishiwa, pamo no mukashi wakwe na bana kabili na fyonse efyo akwete, kabili na malipilo ukucitwa. ²⁶ Eico umubomfi awile panshi, amufukamine, kabili atile, 'Shikulu, mpeniko inshita, kabili ndi nokulipila shonse.' ²⁷ Eico na shikulu waulya mubomfi, pantu ena aiketwe ne nkumbu, amubelele uluse pa misha yakwe. ²⁸ Lelo umubomfi ulya afuminepo kabili asangile umo pa babomfi banankwe, uyo wamukwatile imisha indalama umwanda umo. Ena amwikete, atendeke ukulamukama pa mukoshi no kutila, 'Ndipila inkongole.' ²⁹ Lelo umubomfi munankwe awile panshi no ku mupapata, ukutila mpelako akashita nkakulipila imisha yobe.' ³⁰ Lelo umubomfi wa kubalilapo alikene. Eico kanshi, ena aposele umbiye mu cifungo mpakafye ilyo akalipila imisha yakwe. ³¹ Ilyo ababomfi banankwe bamwene ifyacitike, bena balifulilwe icibi. Baishile eba shikulu wabo fyonse ifyacitike. ³² ''Elyo shikulu wa ulya mubomfi amwitile no kutila kuli ena, 'Iwe we mubifi wa mubomfi, ine nalikwelela imisha yonse ilya pantu walipapata kuli ine. ³³ Bushe nga tawakwatile umubomfi munobe uluse, ifyo ine nakukwatile uluse iwe?' ³⁴ Shikulu wakwe alifulilwe kabili amupele ku minwe yaba kalungulusha mpaka akalipile imisha shonse isho akongwele. ³⁵ Eico nefi efyo Tata uwa mumulu akacita kuli imwe nga cakuti tamule elela ba munyina ukufuma pa mutima wenu.