¹ Aba Falise naba Saduki balishile muku mwesha paku mwipusha ati abalange icishibilo ukufuma mu lwelele. ² Lelo ali baswike nokutila kuli bena, "Ilyo caba icungulo, mutila kulebafye bwino, pantu mu lwelele na mukashika.' ³ Ngacaba ulucelo, mutila, 'takwabe bwino pantu mu lwelele namukashika elyo kuli na makumbi.' Mwalishiba ifya kwilula ifya mulwelele ifyo mulemoneka, lelo teti mwilule ifi shibilo fya nshita. ⁴ Nkulo yababi naba bacende ifwaya icishibilo, lelo tapali icishibilo icikapelwa kuli yena kanofye icishibilo cakwa Yona." Elyo Yesu alibashile nokuya aya. ⁵ Elyo abasambi bafikile kwi shilya, balilabile ukusenda umukate. ⁶ Yesu atile kuli bena, ''Loleni nokucenjela ku citutumushi caba Falise naba Saduki." ⁷ Abasambi balilanshenye umo babelele no kutila, "Nico tatwa cisenda umukate." ⁸ Yesu alishibe pali ici elyo atile, "Imwe mweba cicetekelo icinono, cinshi mule lanshanya umo mubelele no kutila nico tamwacisenda umukate? . ⁹ Bushe tamwiluka? Bushe tamwibukisha ilya mikate isano iya makana yasano, kabili ne miseke mwalongenye? ¹⁰ Nangu ilya mikate cine lubali iya makana yane, elyo ne miseke mwasendelepo? ¹¹ Bushe mwafilwa shani ukwiluka ukuti nshalelanda kuli imwe pa lwa mikate? Loleni noku cenjela ku citutumushi caba Falise na ba Sadduki." ¹² Elyo nomba baishile iluka ukutila talebeba ati bacenjele ku citutumushi caali mumukate, lelo ku cenjele ku fisambilisho fyaba Falise naba Sadduki. ¹³ Nomba ilyo Yesu aishile ku fitungu ifyali mupepi na ku Kaesari Filipi, aipwishe abasambi bakwe, ukutila, "Bushe abantu batila Umwana wa Muntu ninani?" ¹⁴ Batiile, "Bambi balanda ati Yohane kabatisha; bambi, Eliya; Kabili bambi, Yelemiya, nangu umo uwa muli ba kasesema." ¹⁵ Atile kuli bena, ''Lelo imwe mutila nine ani?" ¹⁶ Mukwasuka, Simoni Petelo atile, "Niwe Kristu, Umwana wakwa Lesa wa mweo.'' ¹⁷ Yesu alyasuke no kutila kuli ena, "Walipalwa iwe, Simoni mwana Yona, pantu umubili no mulopa tefisokolwele ici kuli iwe, lelo ni Tata wandi uuli ku mulu. ¹⁸ Kabili natila kuli iwe nati niwe Petelo, kabili pali ili libwe epo nkakula ulukuta lwandi. Impongolo sha kumbo tashakalwanshe nakalya. ¹⁹ Nkakupela imfungulo sha bufumu bwa mu mulu. Conse ico uka kaka pano isonde cikakakwa na mu mulu, kabili conse ico ukakakula pano isonde cikakakulwa na mu mulu." ²⁰ Elyo Yesu akonkomeshe abasambi ukuti tabafwile ukwebako nangu umo ukuti ni Kristu. ²¹ Ukufuma pali ilya nshita Yesu atampile ukweba abasambi bakwe ukuti bafwile ukuya ku Yerusalemu, ukucula mu fintu ifingi mu minwe ya bakalamba na bashimapepo mukalamba na bakalemba, no kwipaiwa, kabili no kubushiwa ku mweo pa bushiku bwalenga shitatu. ²² Elyo Petelo amusendele lubali no ku mukalipila, ukuti, "Lekeni ici cibe ukutali naiwe, Shikulu! Lekeni ici cikacitika kuli imwe!" ²³ Lelo Yesu alipilibwike no kutila kuli Petelo, "Kabiye kunuma yandi, iwe Satana! Iwe ulicipunwisho kuli ine, pantu iwe tautontokanya pa fintu fyakwa Lesa, lelo pa fintu ifya bantu." ²⁴ Elyo Yesu atile kubasambi bakwe, "Nga cakuti umo alefwaya ukunkonka, afwile aikana umwine, asende ulupanda lwakwe, no kunkonka. ²⁵ Pantu uyo onse uulefwaya ukupususha umweo wakwe akaulofya, kabili uyo onse uwalofya umweo wakwe pamulandu wa ine akausanga. ²⁶ Pantu cinshi umuntu enga nonkelamo nga akwata icalo conse lelo alofya umweo wakwe? Cinshi umuntu engapela mu kukabushanya no mweo wakwe? ²⁷ Pantu Umwana wa Muntu akesa mubukata bwakwa Wishi na ba malaika bakwe. Elyo akalambula umuntu onse ukulingana ne milimo yakwe. ²⁸ Mucine natila kuli imwe, kuli bamo pali imwe mwebeminine apa abashaka sonde imfwa mpaka bakamone Umwana wa Muntu aleisa mu bufumu bwakwe."