¹ Kabili Mose atile, “Nomba umfwa we Israeli, uli mupepi no kwabuka umumana wa Yordani no kuya poka icalo umwikala imishobo iyikalamba, kabili iyamaka ukucila iwe, iyaba ne misumba ikalamba na malinga ayatali ayalola na mumulu.  ² Abantu babamo batali kabili abamaka, abena Anaki! Mwalibeshiba no kumfwa ifyo casoswa ukuti, ‘Nga nani engalwisha abena Anaki?’ ³ Kanshi mwishibe ilelo ukuti Yawe Lesa wenu eumutangilila ngo mulilo wabonaushi. Akabacimfya no kubalofya, na imwe mukabatamfya no kubalofya mukwangufyanya, ngefyo Yawe amulaile. ⁴ “Ilyo Yawe Lesa wenu atamfyamo aba bantu pa ntanshi yenu, mwikalasosa ati, ‘Yawe atuleta kuno kukwisa poka cino calo, pa mulandu wa bulungami bwesu.’ Awe, ni pa mulandu wa bubifi bwa iyi mishobo, eco Yawe akabatamfisha. ⁵ Te pa mulandu wa bulungami bwenu nangu bucishinka bwenu eco mwalapokela icalo, lelo Yawe Lesa wenu akatamfyamo iyi mishobo pa ntanshi yenu pa mulandu wa bubifi bwabo pakufikilisha icilayo ico alaile ifikolwe fyenu Abrahamu, Isaki, na Yakobo. ⁶ Kanshi mwishibe nomba ukuti, te pa mulandu wakuba abalungami eco Yawe Lesa wenu alemupeelela icalo icisuma ukucipoka, pantu na imwe bene muli nkosamitwe. ⁷ “Muleibukisha no kukanalaba ifyo mwalengele Yawe Lesa wenu akalipe mu matololo. Ukutulafye pa bushiku mwafumine mu Egupto mpaka nelyo mwafikile pano, mwabafye abatalamina Yawe.  ⁸ Na ku Holebu mwalengele Yawe akalipe nganshi kwempefye no kumulofya. ⁹ Ilyo naile pa mulu wa lupili kukupoka amabwe ayapapatala apalembelwe icipangano ico Yawe apangene na imwe, naikelepo inshiku amakumi yane, akasuba no bushiku, nshalelya nangu kamo nangu ukunwa amenshi.  ¹⁰ Yawe epakumpeela amabwe ayapapatala yabili apalembele ukuboko kwakwa Lesa. ¹¹ Pa mabwe ayapapatala palembelwe ifyebo fyonse ifyo Yawe abilile kuli imwe ukufuma mu mulilo pa bushiku mwalongene ku lupili.  Panuma ya nshiku amakumi yane, akasuba no bushiku, Yawe epakumpeela amabwe ayapapatala yabili apalembelwe icipangano.  ¹² Elyo Yawe anjeba ati, ‘Endesha ukubwelelamo nombalinefye, pantu abantu bobe abo wafumishe mu Egupto nabalubana. Tabakokwele kupatuka mufyo nabakonkomesha, nabaipangila akalubi ka cela.’ ¹³ “Kabili Yawe epakunjeba ati, ‘Nimona ukuti aba bantu ni bankosa mitwe icine cine!  ¹⁴ Ndekafye mbalofye pakuti mfuute ne shina lyabo pano calo. Elyo iwe nkakulenga ukaba umushobo uwamaka kabili uukalamba ukubacila.’ ¹⁵ “Kanshi na ine epakupilibuka natentemuka ulupili, ninsenda na mabwe ayapapatala yabili aya cipangano mu minwe yandi, ilyo ninshi ulupili lulebilimafye umulilo.  ¹⁶ Ilyo naloleshe, namwene ukuti namubifya kuli Yawe Lesa wenu. Mwaipangile icilubi ca ciponti ca ŋombe ica golide. Tamwakokwele kupula mwifunde ilyo Yawe amukonkomeshe. ¹⁷ Na ine epakubuula amabwe ayapapatala yabili ayali mu minwe yandi nayaposa, nayatobaula no kutobaula na pa cinso cenu.  ¹⁸ Elyo kabili nawa ubukupeme pa cinso cakwa Yawe, nshalelya cakulya nangu ukunwa amenshi. Napwile inshiku amakumi yane, akasuba no bushiku. Ico nacitile ifyo ni pa mulandu wabubifi mwacita pakucita ifyabipa pa cinso cakwa Yawe no kulenga akalipe. ¹⁹ Ine natiinine ubukali ne cipyu cakwa Yawe, pantu alikalipe nganshi, kwempefye no kumulofya. Lelo nakabili Yawe aliŋumfwile.  ²⁰ Kabili Yawe alifulilwe Aroni nganshi kwempefye no kumulofya, lelo pa nshita ine ilya nao wine nalimupapatileko. ²¹ Kanshi na ine epakubuula icabubifi cenu, iciponti mwaipangile, nacoca mu mulilo. Elyo nacishonaula cabafye ulukungu, nayaposa no lukungu mu kamana kalefuma pa mulu wa lupili. ²² “Kabili mwalengele Yawe akalipe ilyo mwali ku Tabera, na ku Masa, na ku Kibroti Hatafa.  ²³ Kabili na ku Kadeshi Banea ilyo Yawe amutumine amwebele ati, ‘Kabiyeni muye poka icalo namupeela.’ Nako kwine mwalitalamine ifyo Yawe Lesa wenu amukonkomeshe. Tamwamucetekele nangu ukumubeela.  ²⁴ Mulatalamina Yawe ukufumafye apo namwishibila. ²⁵ “Kanshi nalele ubukupeme pa cinso cakwa Yawe pa nshiku amakumi yane, akasuba no bushiku, pantu Yawe atile ali nokumulofya.  ²⁶ Ine nalepapata Yawe nati, ‘We Mfumu Yawe, napapata wilofya abantu bobe abacishilano abo walubula no kubafumya mu calo ca Egupto ku maka yobe no kuboko kobe ukwabulamba. ²⁷ Ibukisha ababomfi bobe, Abrahamu, Isaki na Yakobo. Wilolesha pali bucintomfwa bwa aba bantu na ku bubi bwabo na kufyo babifishe.  ²⁸ Epali abena Egupto balasosa abati, “Pantu Yawe alifilwa ukubatwala mu calo abalaile, kabili alibapata, eco abasendele mu matololo pakuti abepaye.”  ²⁹ Lelo aba bantu bena, bobe abacishilano abo wafumya mu calo ca Egupto ku maka yobe ayakalamba no kuboko kobe ukwatambalala.’”