¹ Kabili Mose atile, “Mulecenjela pakukonka amafunde yonse ndemupeela ilelo pakuti muleenda abomi, mulesanda, mukengile no kupoka icalo ico Yawe alaile no mulapo ku fikolwe fyenu. ² Muleibukisha ifintu Yawe Lesa wenu amutungulwile pa lwendo ulutali mu matololo pa myaka amakumi yane pakuti amunashe, amweshe, eshibe ifili mu mitima yenu no kumona nga kuti mwabaka amafunde yakwe. ³ Alimunashishe, amuleka ukuti mumfwe insala elyo kabili amupeela na maana, icakulya ico imwe ne fikolwe fyenu mushaishibe, pakuti amulange ukuti te cakulya ceka cilenga umuntu aleenda umumi, lelo lishiwi lyonse ilifuma ku kanwa kakwa Yawe. ⁴ Pa myaka iyi amakumi yane ifyakufwala fyenu tafyalesapuka, na makasa yenu nayo tayalefimba nakalya. ⁵ Mwishibe kanshi mu mitima yenu ukuti, Yawe Lesa wenu alamufunda nga filya umuntu afunda umwana wakwe umwaume. ⁶ Mulebaka amafunde yakwa Yawe Lesa wenu, mulekonka mu nshila shakwe no kulamucindika. ⁷ Pantu Yawe Lesa wenu alemwingisha mu calo icisuma umwaba imimana, ifishiba fya menshi no tumfukumfuku twa menshi ayapita mu mawanga na mu mpili.  ⁸ Icalo umwaba iŋanu, bale, imyangashi, imikunyu, amateke, amafuta ya miolifa no buci. ⁹ Icalo umushakatale amubula icakulya kabili umo mushakakabile kantu nelyo kamo. Icalo umo amabwe yaba aya fyela kabili na mu mpili kuti mwaimbamo umukuba.  ¹⁰ Ilyo mukalalya no kulaikuta, mukalepaala Yawe Lesa wenu na matotelo pa mulandu wa busuma bwa calo ico amupeela. ¹¹ “Mulecenjela epali mwalaba Yawe Lesa wenu, mwafilwa ukulakonka amafunde, ifyebo ne fipope ifyo namupeela ilelo.  ¹² Pantu limbi ilyo mwalya no kwikuta, mwakuula na mayanda ayasuma, mwaikala na bwino, ¹³ kabili ilyo imikuni ya ŋombe ne mbushi ne mpaanga shenu shafulisha, silifa na golide wenu yafulilako, elyo na fyonse ifyo mwakwata fyafulilako,  ¹⁴ lyena imitima yenu ikaba ne cilumba, mukalaba kuli Yawe Lesa wenu uwamufumishe mu calo ca Egupto umo mwali abasha. ¹⁵ Ewamutungulwile muli yalya matololo ayakalamba kabili ayakutiina, cilya calo ca cilaka umushali amenshi, umwali nsoka shabusungu na bakaliŋongo. Emo amufumishe amenshi mu cilibwe icakosa.  ¹⁶ Amupeele maana mu matololo pakuti mulye, icakulya ico ifikolwe fyenu fishaishibe. Pakumunasha no kumwesha, alefwaya ukuti pakulekelesha cikamuwamine.  ¹⁷ Limbi kuti mwasosa ati, ‘Amaka yandi no bulamba bwa kuboko kwandi efyandetela ubu bukankala.’ ¹⁸ Nomba muleibukisha Yawe Lesa wenu, pantu ewamupeela amaka ayakumona ubukankala. Ico acitila ifyo ni pakuti abe uwacishinka palwa cipangano apangene ne fikolwe fyenu, ngefyo cili ilelo.  ¹⁹ Nga cakuti mwalaba Yawe Lesa wenu, mwakonka ne milungu imbi, mwalaipepa no kuifukamina, ndemusokako ine lelo ukuti cine cine muli nokuloba.  ²⁰ Nga mwakaana ukubeela Yawe Lesa wenu, na imwe bene mukalobafye nge mishobo imbi ilya Yawe alofeshe mu menso yenu.”