¹ Kabili Mose atile, “Ilyo Yawe Lesa wenu akamutwala mu calo ico mukengilamo kukucipoka, akatamfyamo imishobo ya bantu iyingi. Akatamfyamo imishobo cine lubali iyikalamba kabili iyamaka ukumucila imwe, abena Hiti, abena Girigashi, abena Amoli, abena Kenani, abena Perisi, abena Hifi na bena Yebusi. ² Kabili nga Yawe Lesa wenu abaposa mu minwe yenu no kubacimfya mwabacimfya, mukapeela bonsefye kukonaulwa. Tecakwesha kupangana nabo bucibusa, kabili takuli kubabelela luse. ³ Mwikalaupana nabo. Mwikalaleka abana benu abanakashi bakaleupilwako, nangu abana benu abaume bakaleupilako. ⁴ Pantu bakafumya abana benu mukulankonka no kuya mukutumika imilungu imbi. Ninshi ubukali bwakwa Yawe bukamwimina no kumulofya bwangu.  ⁵ Ifi efyo muli nokubacita. Mukabongolole ifibumbili fya malambo fyabo, mukatobolole na mabwe yabo bacindikisha, mukaputaule ne nceshi sha Ashera umulungu wabo, elyo mukoce no tulubi twabo mu mulilo. ⁶ Pantu imwe muli bantu bamushilo abakwa Yawe Lesa wenu. Yawe Lesa wenu, alimupatula ku bantu bonse mpanga yonse pano isonde lyonse, nimwefye aisalila ukuba abantu bakwe abo acindamika. ⁷ “Yawe tamutemenwe no kumusala pantu mwacilile abantu ba mu mishobo imbi ku bwingi, lelo nimwe mwacepeshepo pa mishobo ya bantu yonse.  ⁸ Lelo nico Yawe alimutemwa, alisunga no mulapo alaile ku fikolwe fyenu, ecalenga ukuti amupusushe ku kuboko kwa bulamba bwakwe, amulubule mu calo ca busha, amufumye na mu minwe yakwa Farao imfumu ya mu Egupto. ⁹ Kanshi mwishibe ukuti Yawe Lesa wenu, e Lesa eka, uwacishinka, alasunga icipangano no kulanga icitemwiko icishipwa ku bantu abamutemwa, abakonka na mafunde yakwe, ukufikafye na ku nkulo ikana limo.  ¹⁰ Nomba “abamupata akabalambula ukuloba pa cinso cabo. Takakokole ukubalambula pa cinso cabo bonse abamupata. ¹¹ “Kanshi mulebaka amafunde, amalango ne fipope ifyo namupeela ilelo.” ¹² “Nga mwaumfwila aya mafunde kabili nokuyasunga bwino bwino, lyena Yawe Lesa wenu akalasunga icipangano no kulanga icitemwiko icishipwa kuli imwe ngefyo alaile ifikolwe fyenu.  ¹³ Akamutemwa no kumupaala, kabili akalenga mukasande. Akalapaala na bana mukafyala, ne fisabo fya mu mushili wenu, iŋanu shenu, umwangashi upya na mafuta ya miolifa, iŋombe, impaanga ne fitekwa fyonse mu calo ico alaile ifikolwe fyenu ukuti akamupeela. ¹⁴ Mukapaalwa ukucila abantu bonse. Tapakabe umwaume nangu umwanakashi uushakakwate ubufyashi, nangufye ifitekwa fyenu ifishakakwate abana.  ¹⁵ Yawe akatalusha ubulwele bonse uko muli. Takaleke amalwele ayabipisha yakamwishile nga yalya mwamwene ku Egupto, lelo yena eyo akaletela abalwani benu bonse. ¹⁶ Mufwile ukulofya abantu bonsefye abo Yawe Lesa wenu aposa mu minwe yenu. Mwikalabakwatila luse, mwikalapepa milungu yabo pantu cikaba citeyo kuli imwe. ¹⁷ “Limbi kuti mwasosa amuti, ‘Iyi mishobo naitucila amaka ifwe. Nga kuti twabatamfya shani mu calo?’ ¹⁸ Lelo tecakwesha kubatiina, mwibukishe bwino ifyo Yawe Lesa wenu acitile Farao na bantu bakwe bonse mu Egupto.  ¹⁹ Mwaimwenene na menso yenu amacushi ayakalamba, ifishibilo fyakupapa, ifipeshamano, ukuboko kwakwe ukwabulamba no kuboko kwakwe ukwatambala uko Yawe Lesa wenu abomfeshe pakumufumya mu Egupto. Yawe Lesa wenu akacita cimo cine ku bantu bonse abo mutiina nomba. ²⁰ Kabili Yawe Lesa wenu akatuma amalonda pakati kabo, mpakafye na bakashalapo abakaya mukubelama bakalobe.  ²¹ Mwikalabatiina aba bantu, pantu Yawe Lesa wenu, uwaba na imwe, ena mukulu kabili ni Lesa wakutiina.  ²² Yawe Lesa wenu akalatamfya iyi mishobo pa ntanshi yenu panono panono. Tamwakasuminishiwe ukulofya bonse pa mukufye umo, pantu nga mwacita ifyo, ifinama fya mpanga fikasanda no kulamucusha. ²³ Nomba Yawe Lesa wenu akabaposa uko muli, akabafulunganya amano mpakafye bakalobe.  ²⁴ Akaposa ne mfumu shabo mu minwe yenu, na imwe mukalofya amashina yabo pa calo. Takwakabe nelyo umo uwakumucimfya, mukabalofyafye bonse. ²⁵ Mukaleoca ifimpashanya fya milungu yabo mu mulilo. Mwikalakumbwa silifa nangu golide uo bakambatikako. Tecakwesha kuusenda. Nga mwacita ico, ninshi mwaibika mu citeyo. Pantu Yawe Lesa wenu alifipata.  ²⁶ Kabili mwikengisha icintu icapatwa mu mayanda yenu, pantu imwe pamo nga cena mukapatulwa kukonaulwa. Kanshi na imwe bene muli nokucipatafye pantu capatwilwa kukonaulwa.”