¹ Kabili Mose atile, “Aya e mafunde, amalango ne fipope ifyo Yawe Lesa wenu ankonkomeshe ukumufunda, ukuti mukaleyabaka mu calo ico mwalaswa mwabukilemo mwishilya lya Yordani pakucipoka.  ² Ndemufunda pakuti imwe pamo na bana benu na bana babo mukaleba na katiina kuli Yawe Lesa wenu, mukubaka ifipope na mafunde ayo namupeela pakuti mukekale ne nsansa inshita iyitali. ³ Umfwa we Israeli, kabili ucenjele ukubeela pakuti cikuwamine kabili epakuti mukasande nganshi mu calo icifumfumukamo umukaka no buci. Nga mulya mwine Yawe, Lesa wa fikolwe fyenu amulaile. ⁴ “Umfwa we Israeli! Yawe Lesa wesu, e Yawe ekafye.  ⁵ Uletemwa Yawe Lesa obe no mutima obe onse, no mweo obe onse, na maka yobe yonse. ⁶ Aya mafunde nakupeela lelo uleyabaka.  ⁷ Uleyafunda na ku bana bobe. Muleyakomailapo ilyo mwikele pamyenu, kabili nelyo muleenda pa musebo, na pakusendama, kabili na lintu mwabuka mu tulo. ⁸ Muleyakakila pakuyafwala pa mpumi shenu na pa maboko yenu, pantu e cishibilo cakumwibukishako.  ⁹ Mukayalembe na pa filu fya minshi ya mayanda yenu, na pa mpongolo shenu. ¹⁰ “Kabili Yawe Lesa wenu akamufisha mu calo alaile ifikolwe fyenu Abrahamu, Isaki na Yakobo, ukuti akamupeela imwe icalo ca misumba ikalamba, kabili iyikankala, iyo imwe mushakuula. ¹¹ Akamupeela amayanda ayaisulamo ifintu ifisuma fyonse ifyo imwe mushabikamo, ifishima ifyo imwe mushaimba, amabala ya myangashi na ya miolifa ayalimwa ayo imwe mushalimba. Nomba ilyo mukalalya nokwikuta mwaikuta,  ¹² cenjeleni, tecakwesha ukulaba Yawe, uwamufumishe mu calo ca Egupto umo mwali abasha. ¹³ Muleba na katiina kuli Yawe Lesa wenu, eo mulebombela ekafye, kabili mukalelapafye mwishina lyakwe epela.  ¹⁴ Mwikalakonka milungu imbi, iya bantu bambi abakaba mumbali.  ¹⁵ Pantu Yawe Lesa wenu, uo mwaba nankwe ni Lesa wabufuba, no bukali bwakwe bukamwishila ngo mulilo, kabili akamulofya mpanga yonse pano isonde lyonse. ¹⁶ “Mwilaesha Yawe Lesa wenu nga filya mwacitile ku Masa.  ¹⁷ Mumone ukuti mwabaka amafunde, ifyebo ne fipope ifyo Yawe Lesa wenu amupeela. ¹⁸ Mulecita ifisuma kabili ifyalungama pa menso yakwa Yawe, pakuti lyena cikamuwamine. Elyo mukengile no kuya poka icalo icisuma ico Yawe alapile ku fikolwe fyenu,  ¹⁹ mukufulumunamo abalwani pa cinso cenu nga mulya mwine Yawe asosele. ²⁰ “Mu nshiku sha kuntanshi umwana obe nga akwipusha ati, ‘Bushe calola mwi ici Yawe Lesa wesu amukonkomeshe ukulakonka amafunde, ifyebo ne fipope fyakwe?’  ²¹ Kuti mwamweba ati, ‘Ifwe twali abasha bakwa Farao mu Egupto, nomba Yawe atufumishe mu Egupto ku kuboko kwakwe ukwabulamba.  ²² Twalimwene na menso yesu uko Yawe alecita ifipeshamano ne finjelengwe ifikalamba kabili ifyabipisha pa bena Egupto na Farao kumo na ba ŋanda yakwe yonse.  ²³ Lelo atufumyako no kutuleta kuno, atupeela na cino calo alaile no mulapo ku fikolwe fyesu. ²⁴ Yawe alitukonkomeshe ukulabeela ifipope ifi fyonse, no kukwatila Yawe Lesa wesu akatiina pakuti cikatuwamine lyonse, tuleenda abomi, ngefi fine cili ilelo.  ²⁵ Kabili nga twalabeela amafunde aya pa cinso cakwa Yawe Lesa wesu ngefyo atukonkomesha, cikaba e bololoke bwesu.’”