¹ Mose aitile abena Israeli bonse, elyo asosa ati, “We Israeli umfwa ifipope na mafunde nalakweba ayo walaumfwa ilelo, uyeshibe kabili uleyasunga. ² Yawe Lesa wesu apangene na ifwe icipangano pa lupili lwa Holebu.  ³ Te fikolwe fyeka Yawe apangene nabo icipangano, lelo na ifwe bene, na bonse fwe bacili abomi ilelo. ⁴ Yawe alandile na imwe pa lupili, ukufuma mu mulilo, ninshi namuloshanya amenso.  ⁵ Pali ilya nshita naiminine pakati, uku ni Yawe na imwe lubali lumbi, pakuti ndemweba ifilelanda Yawe. ⁶ Pantu imwe tamwaile pa mulu wa lupili ico mwaletiina umulilo. “Kabili Yawe atile,  ‘Nine Yawe Lesa wenu, uwamufumishe mu calo ca Egupto umo mwali abasha. ⁷ “‘Wilaba ne milungu imbi kanofye ine. ⁸ “‘Wilaipangila kalubi nangu icintu conse icakupashanya icaba mu mulu umutali, nangu icaba pano isonde, nangu icaba mu menshi pesamba lya calo. ⁹ Wilafukamina utulubi nangu ukutupepa. Pantu ine ne Yawe Lesa obe, ndi Lesa wabufuba, nkanda abana pa bubifi bwa bashibo ukufika na ku nkulo yalenga butatu ne yalenga bune iya bampata.  ¹⁰ Lelo ndalanga icitemwiko icishipwa ku nkulo amakana na makana isha bantu abantemwa, abasunga na mafunde yandi. ¹¹ “‘Wilalumbula ishina lyakwa Yawe Lesa obe apafye, pantu Yawe takalekepofye uyo onse uulumbula ishina lyakwe apafye. ¹² “‘Ulebaka ubushiku bwe Sabata no kubusunga ubwamushilo, ngefyo Yawe Lesa obe akukonkomeshe.  ¹³ Ulebomba mu nshiku mutanda kabili emo ulebomba imilimo yobe yonse,  ¹⁴ lelo ubushiku bwalenga cine lubali bwena Lisabata lyakwa Yawe Lesa obe. Wilabombamo mulimo uuli onse, we mwine, nelyo bamwano abaume na banakashi, nelyo ababomfi abaume atemwa na banakashi, nelyo iŋombe nangu kabalwe nangufye icitekwa icili conse, nelyo abenafyalo wikala nabo, pakuti umubomfi umwaume no mwanakashi batushe pamo nga iwe wine. ¹⁵ Uleibukisha ukuti wali umusha mu Egupto, kabili nokuti Yawe Lesa obe ewakufumishemo ku kuboko kwabulamba no kuboko ukwatambalala. E mulandu Yawe Lesa obe akukonkomeshe ukubaka ubushiku bwe Sabata. ¹⁶ “‘Ulecindika wiso na noko, ngefyo Yawe Lesa obe akukonkomeshe. Lyena ukekala inshiku ishingi kabili cikakuwamina mu calo Yawe Lesa obe alakupeela. ¹⁷ “‘Wilaipaya. ¹⁸ “‘Wilacita bucende. ¹⁹  “‘Wilaiba. ²⁰  “‘Wilapeela bunte bwabufi pa mubiyo. ²¹ “‘Wilakumbwa muka mubiyo. Wilakumbwa ŋanda ya mubiyo, nangu impanga yakwe, nangu umusha wakwe umwaume nelyo umwanakashi, nangu iŋombe yakwe, nangu punda wakwe, nangufye icili conse ico akwata.’ ²² “Aya e mafunde Yawe abilile ne shiwi likalamba kwibumba lyonse palya pa lupili ukufuma mu mulilo, mwikumbi na mu mfifi iyafiita fititi. Apeele aya mafunde ukwabula ukulandapo na yambi. Elyo alemba na mafunde pa mabwe ayapapatala yabili no kumpeela. ²³ “Ilyo ulupili lwalebilima umulilo ne shiwi lyaleumfwika ukufuma mu mfifi, intungulushi shenu na bakalamba ba nko shenu baishile kuli ine.  ²⁴ Kabili mwanjebele amuti, ‘Yawe Lesa wesu natulanga ifwe ubucindami no kupulama kwakwe, kabili natuyumfwila ishiwi lyakwe ililefuma mu mulilo! Ilelo twaimwena ukuti umuntu kanshi kuti aba umumi nangu Lesa alanda nankwe. ²⁵ Nga nomba cinshi twalafwila? Uyu mulilo ushaikulila uletulofya, kabili nga cakuti twatwalilila ukumfwa ishiwi lyakwa Yawe Lesa wesu tulefwa. ²⁶ Bushe kwatala akuba umuntunse uwaumfwapo uko Lesa umumi alelanda ukufuma mu mulilo, nga ifwe, kabili ashala umumi?  ²⁷ Kabiye mupepi uye umfwikishe fyonse ifyo Yawe Lesa wesu alelanda. Elyo wise utwebe fyonse ifyo Yawe Lesa wesu aleya kweba. Kabili na ifwe tuleisa umfwa no kukonka twakulakonka.’ ²⁸ “Yawe alimumfwile ilyo mwalandile kuli ine, elyo anjeba ati, ‘Niŋumfwa ifyo abantu balandile kuli iwe. Fyonse fintu balandile nabalungika.  ²⁹ Iyee, nga kuti cawama bakwata imitima yakuntiina no kubaka amafunde yandi inshiku shonse pakuti cikabawamine pamo na bana babo bene pe na pe!  ³⁰ Kabiye, uye beba babwelele ku matenti yabo. ³¹ Nomba iwe, shala kuno na ine, pakuti nkupeele amafunde yonse, amalango ne fipope ifyakuya bafunda, pakuti bakalefikonka mu calo ico nkabapeela ukupoka.’ ³² “Kanshi cenjeleni mukucita ifyo Yawe Lesa wenu amukonkomesha. Tecakwesha ukupilibukila ku kulyo nangu ku kuso.  ³³ Muleendela mu nshila shonse isho Yawe Lesa wenu amukonkomeshe pakuti mukabe abomi, cikamuwamine, mukekale ne nshiku ishingi mu calo ico mukaya poka.”