¹ Elyo Mose alaeba abantu ati, “Nomba mwe bena Israeli, umfwikisheni ifipope na mafunde ndemufunda. Mulekonka fyonse pakuti mukaleyenda abomi, mukengile, mukapoke ne calo ico Yawe, Lesa wa bashinwe ali mukumupeela. ² Pafyo ine ndemukonkomesha, tecakwesha kulundapo nelyo ukufumyapo fimo. Lelo mulesunga amafunde yakwa Yawe Lesa wenu ayo ndemupeela. ³ Mwalimwene na menso yenu mwe bene ifyo Yawe acitile pa Baali Peori. Yawe Lesa wenu alilofeshe bonse abapepeleko umulungu Baali wa ku Peori. ⁴ Nomba mwe bapetamine Yawe Lesa wenu mucili abomi ukufika na lelo. ⁵ “Moneni, nimufunda ifipope na mafunde ngefyo umwine Yawe Lesa wandi ankonkomeshe. Pakuti mukaleyakonka mu calo ico mwalaingilamo pakuti mucipoke.  ⁶ Mukaleyasunga bwino bwino, pakuti aba mishobo ya benafyalo bakalemona ukuti imwe muli bamano kabili abacumfwila. Abakomfwako fyonse ifi, bakalatila, ‘Cine cine uyu mushobo ukalamba wamano kabili uwacumfwila!’ ⁷ “Bushe mushobo nshi na umbi, nangu wingakula shani, uwaba ne milungu mupepi ngefi ifwe Yawe Lesa wesu atupalama ilyo tumwita?  ⁸ Kabili mushobo nshi na umbi, nangu wingakula shani, uwakwata ifipope na mafunde ayalungama ngaya namupeela ilelo? ⁹ Kanshi mulecenjela no kuisunga bwino pakuti mwikalaba ifintu mwamona na menso yenu nangu ukuleka fifume mu mitima ilyo muli abomi pano calo. Mukasambilisheko abana benu na bana babo abakakonkapo.  ¹⁰ Ibukisheni ubushiku mwaiminine pa cinso cakwa Yawe Lesa wenu ku Holebu, lilya anjebele ati, ‘Longanika abantu pa cinso candi pakuti bomfwe amashiwi yandi, basambilile ukunkwatila akatiina ilyo bacili abomi pano calo no kusambilishako abana babo.’ ¹¹ “Na imwe mwalipaleme, mwaiminina mwisamba lya lupili ulwalebilima umulilo uwalefika na ku mulu, ulu lupili lwakupilwe ne ntumba ya cushi icafiita fititi.  Kanshi Yawe epakulanda kuli imwe ukufuma mu mulilo. ¹² Mwaumfwile uko alelanda amashiwi, lelo tamwamumwene mu musango uuli onse. Mwaumfwilefye ishiwi epela. ¹³ Alimwebele icipangano ico mwapangene nankwe, ifi e fyebo ikumi ifyo amukonkomeshe ukulakonka, kabili afilemba na pa mabwe ayapapatala yabili.  ¹⁴ Kabili Yawe ankonkomeshe pali ilya nshita ukuti mfunde ifipope na mafunde muli nokulakonka mu calo ico mwalapoka nga mwayabuka Yordani.” ¹⁵ “Ubushiku Yawe alandile na imwe ukufuma mu mulilo pa lupili lwa Holebu, tamwamumwene mu musango uuli onse. Kanshi cenjeleni, muleisunga bwino ¹⁶ pakuti tamuilufyenye no kuipangila akalubi, icimpashanya ca musango onse, cibe icapala umwaume nangu umwanakashi, ¹⁷ nangu icapala inama yonse pano calo, nangu icuni icipupuka mu lwelele, ¹⁸ nangu icibumbwa icikulika panshi, nangu isabi lya mu menshi. ¹⁹ Kabili nga mwapunamina mu mulu, mwamona akasuba, umweshi ne ntanda, ifitafye fyonse ifyaba mu mulu, mwilatunkwa ukufifukamina nangu ukupepa ifintu ifyo Yawe Lesa wenu ayakanya abantu ba mishobo yonse iyaba pano calo.  ²⁰ Lelo imwe ni Yawe ewamubuulile no kumufumya mwilungu lya mulilo, mu Egupto, pakuti mube abantu bakwe ngefi fine mwaba ukushinta na lelo. ²¹ Nomba ni pa mulandu wenu Yawe amfulilwe, alapa nokuti nshakabukeko umumana wa Yordani no kwingila muli cilya calo cisuma Yawe Lesa wenu alemupeela nge cacishilano cenu.  ²² Ine ndefwila muli cino calo, nshakabuke mumana wa Yordani. Lelo imwe muli mukwabuka, mukaya poka na cilya calo cisuma. ²³ Kanshi muleisunga, mwikalaba ne cipangano cakwa Yawe Lesa wenu, ico apangana na imwe. Tecakwesha kuipangila akalubi mu cipasho icili conse Yawe Lesa wenu amulesha.  ²⁴ Pantu Yawe Lesa wenu, mulilo uoca fyonse, kabili ni Lesa uwabufuba. ²⁵ “Panuma yakukwata abana na beshikulu, mwakokola muli cilya calo, nga cakuti mwailufyanya no kupanga akalubi akali konse, ukucita icabipa pa cinso cakwa Yawe Lesa wenu no kulenga akalipe,  ²⁶ naita umulu ne calo nga bakambone pali imwe mu bushiku bwe lelo ukuti mukalobe bwangu ukufuma mu calo ico muleyabukila umumana wa Yordani mukuya cipoka. Tamwakekalemo inshita iyitali lelo mukalobelelafye. ²⁷ Yawe akamusalanganishisha mu bantu bambi, elyo pali imwe pakashalafye impendwa inono mu mishobo Yawe akamutwalamo.  ²⁸ Kulya kwine mukalapepa imilungu iyo abantu bapanga ku fimuti na ku mabwe, iyishimona, nangu ukumfwa nangu ukulya, nangu ukununsha. ²⁹ Lelo kulya kwine nga eko mwatendekela ukufwaya Yawe Lesa wenu ne mitima yenu ne myeo yenu yonse, lyena mukamusanga. ³⁰ Ilyo mukaba mu macushi na fyonse ifi nga fyamufikila, elyo pakulekelesha mukabwelela kuli Yawe Lesa wenu no kumupetamina.  ³¹ Pantu Yawe Lesa wenu ena ni Lesa waluse. Takamulekeleshe nangu ukumulofya nangu ukulaba icipangano ico apangene ne fikolwe fyenu no mulapo. ³² “Nomba ipusheni pa nshiku shakale ilyo tamulabako, ukufuma pa bushiku ilyo Lesa abumbile umuntu pano isonde, ipusheni ukufuma ku mpela ya mulu ukufika na ku mpela ibiye. Bushe kwalitala akucitika icintu nangu cimo icacindama ifi? Bushe kwatala akumfwika icintu ca uyu musango?  ³³ Bushe bantu nshi abaumfwa ishiwi lya mulungu uko ulelanda ukufuma mu mulilo, nga filya imwe mwaumfwile, nomba mucili abomi? ³⁴ Bushe kwalitala akuba mulungu uwaeshako ukuibuulila umushobo umo ukufuma mu mushobo umbi ku fyakwesha, ku fishibilo fyakupapa ne fipeshamano, ku nkondo, ku kuboko kwabulamba no kuboko ukwatambalala nangu ne fyakutiinya ifikalamba nge fintu fyonse ifyo Yawe Lesa wenu acitile pa menso yenu mu Egupto? ³⁵ Mwalangilwe ifi fyonse pakuti mwishibe ukuti Yawe e Lesa ekafye, takwaba na umbi iyoo.  ³⁶ Alekele nokuti mumfwe ishiwi lyakwe ukutula ku mulu, epakuti amufunde. Pano isonde napo amulekele ukuti mumone umulilo wakwe, kabili mwaumfwile amashiwi yakwe ukufuma mu mulilo. ³⁷ Pa mulandu wakutemwa ifikolwe fyenu no kusala indupwa shabo ishakonkelepo, amufumishe mu Egupto mukuba na imwe na ku maka yakwe ayakalamba.  ³⁸ Kabili pakumutemwa atamfishe imishobo iyikalamba iyamaka ukumucila, pakuti amwingishe mu calo cabo no kumupeela nge cacishilano ngefi fine cili nomba. ³⁹ Eico mucishibe ilelo, mucibike na mu mitima yenu icakuti Yawe e Lesa ekafye uwa mu mulu na pano isonde, takwaba na umbi iyoo.  ⁴⁰ Mulesunga ifipope na mafunde yonse ayo namupeela lelo pakuti cikamuwamine imwe na bana benu, elyo mukatwalilila ukwikala pe mu calo Yawe Lesa wenu ali mukumupeela pakuti cibe cenu pe.” ⁴¹ Kanshi Mose asontele imisumba itatu ku kabanga ka Yordani,  ⁴² iyakubutukilako nga cakuti umuntu aipaya umuntu mubiye ukushili ku mufulo. Kuti abutukila ku musumba wa musango uyu, pakupususha umweo wakwe.  ⁴³ Abena Rubeni babapeela umusumba wa Beseri, uwaba mu matololo yabatama, abena Gadi babapeela umusumba wa Ramoti uwa mu Gileadi, elyo abena Manase babapeela umusumba wa Golani uwaba mu Bashani. ⁴⁴ Aya e mafunde Mose apeele abana bakwa Israeli. ⁴⁵ Abapeele amafunde, ifipope ne fyebo, ilyo abana bakwa Israeli bafumine ku Egupto,  ⁴⁶ ninshi bacili ku kabanga ka mumana wa Yordani, mwishika lyalungatana no musumba wa Beti Peori, mu calo ca mfumu Sihoni, iyaleteeka abena Amoli mu Heshiboni. Mose na bana bakwa Israeli balimucimfishe ilyo bafumine ku Egupto. ⁴⁷ Bapokele icalo cakwe ne calo cakwa Ogi imfumu ya Bashani. Ishi mfumu shibili isha bena Amoli shaleikala lwa ku kabanga ka Yordani.  ⁴⁸ Bapokele icalo ukufuma mu musumba wa Aroeli, uwaba mu lulamba lwa mukonko wa Alinoni, ukufika na ku lupili lwa Sirioni, (ulu e lupili lwa Hemoni), ⁴⁹ ukubikapofye ne citungu ca Araba ku kabanga ka Yordani, ukushinta na kuli bemba wa Araba,  mwisamba lya lupili lwa Pisiga.