¹ Kabili Mose atile, “Kabili twalyalulwike, twakonka no musebo walola ku Bashani. Kanshi imfumu Ogi iya ku Bashani ne fita fyaiko fyonse, baisa mukutulwisha ilyo batukumenye ku Edelei.  ² Yawe epakunjeba ati, ‘Wimutiina, pantu nimupeela mu minwe yobe, kumo kwine ne fita fyakwe fyonse, pamo ne calo cakwe cine. Umucite filya wacitile Sihoni imfumu ya bena Amoli uwaleteeka mu Heshiboni.’ ³ “Kanshi Yawe Lesa wesu nao epakutupeela Ogi imfumu ya ku Bashani ne fita fyakwe fine fyonse. Twabepaya bonsefye, ukwabula ukushapo nangu umo uwakupusuka. ⁴ Pa nshita ilya twapokele ne misumba yakwe yonsefye. Takwashele musumba nelyo umo uo tushapokele pa misumba amakumi mutanda ne citungu conse ica Agobu ico imfumu Ogi iya mu Bashani yaleteeka. ⁵ Yonse iyi misumba yali na malinga ayatali ne mpongolo ne mipilikisho yakwisalilako, kabili kwali ne mishi imbi iyingi iyishakwete malinga.  ⁶ Elyo na ifwe epakupeela imisumba yonse kukonaulwa, nga filya twacitile Sihoni imfumu ya Heshiboni. Twaonaula imisumba yonse no kwipaya abantu balimo abaume, abanakashi na baice.  ⁷ Lelo ifitekwa ne fitapwa ukufuma mu misumba yabo fyena twalifisendele fwe bene. ⁸ “Kanshi pa nshita ilya efyo twapokele ifyalo fya shamfumu ishi shibili isha bena Amoli lubali lwa ku kabanga ka mumana wa Yordani, ukutendeka ku mukonko wa Alinoni ukushinta na ku lupili lwa Hemoni.”  ⁹ (Abena Sidoni beta ulupili lwa Hemoni ukuti lupili lwa Sirioni, abena Amoli nabo balwita ukuti lupili lwa Seni.)  ¹⁰ “Twapoka ne misumba yonse iya mu calo cabatama, na Gileadi yonse, Bashani onse no kuya fikafye ku Saleka na ku Edelei, imisumba ya mu calo cakwa Ogi mu Bashani.” ¹¹ (Ogi eka, imfumu ya Bashani, ewashelepo pa bena Refaimu. Ne mbokoshi ya citumbi cakwe yali iye libwe, na mubwipi yali bamita babili, elyo mubutali bamita bane na citika. Ukushinta na lelo epo icili mu musumba wa bena Amoni mu Laba.) ¹² Pa calo twapokele pa nshita ilya, napeele ku bena Rubeni na bena Gadi icitungu ukutendekela mu musumba wa Aroeli ku kapinda ka ku kuso mupepi no mukonko wa Alinoni, no kulundako iciputulwa ca calo ca mpili ica Gileadi, kumo kwine ne misumba yaciko.  ¹³ Citika wa luko lwakwa Manase naupeele icitungu icasheleko ku calo ca Gileadi, nabikapo ne calo conse icakwa Ogi imfumu ya Bashani.” (Icalo conse ica Agobu mu Bashani caishibikwe ukuti e calo ca bena Refaimu. ¹⁴ Yaili, uwa mu lupwa lwakwa Manase, apokele icalo conse ica Agobu, ukuya fika na mu mupaka wa bena Geshuri no wa bena Maaka. Ici calo conse cainikwe ishina lyakwe, ukufika na lelo citwa Hafoti Yairi.) ¹⁵ “Kabili napeele Gileadi kuli Makiri.  ¹⁶ Lelo napeele ku bena Rubeni na bena Gadi icitungu ukutendekela ku Gileadi ukuya shinta na ku mukonko wa Alinoni, umupaka wabela pakati ka mukonko, elyo no kufika ku mumana wa Yaboku, uwapakanya na bena Amoni. ¹⁷ Ku masamba umupaka wali mumana wa Yordani mu Araba, ukufuma ku Kinereti ukufika kuli bemba wa Araba, bemba wa Mucele, ukuya shintafye mwisamba lya lupili lwa Pisiga. ¹⁸ “Elyo pa nshita ine ilya namukonkomeshe nati, ‘Yawe Lesa wenu namupeela ici calo ukuti cibe cenu. Nomba abaume bonse amalamba nabaipangashe ifyanso fyabulwi, babukile kwishilya lya mumana wa Yordani, batangilile bamunyinenwe bambi abena Israeli. ¹⁹ Kanofye abakashi benu na bana benu ebali nokushala mu misumba namupeela pamo ne fitekwa fyenu, (ninjishiba namukwata ifitekwa ifingi),  ²⁰ mpakafye Yawe akapeele na bamunyinenwe ukutuusha pamo nga imwe. Bakaikwatile nabo icalo ico Yawe Lesa wenu akabapeela kwishilya lya mumana wa Yordani. Lyena elyo mukabwelela cila umo ku citungu cakwe ico namupeela.’ ²¹ “Elyo pa nshita ilya nakonkomeshe Yoshua nati, ‘Nauimwena na menso yobe we mwine fyonse ifyo Yawe Lesa obe acitile kuli shilya mfumu shibili. Yawe akalacita cimo cine ku shamfumu shonse isha uko muleya.  ²² Tecakwesha kushitiina, pantu Yawe Lesa obe e ukalakulwishishako.’ ²³ “Kabili pali ilya nshita napapete Yawe nati,  ²⁴ ‘We Mfumu Yawe, walitampa ukulanga umubomfi obe ubulamba bobe na maka ya kuboko kobe. Bushe mulungu nshi umbi mu mulu na pano isonde uwingacita ifyabulamba ifyo iwe ucita?  ²⁵ Leka njabuke umumana nje moneko icalo cisuma icili kwishilya lya Yordani, icalo cisuma ica mpili na Lebanoni.’ ²⁶ Pa mulandu wa imwe Yawe alimfulilwe, kabili tewakumfwa ifyo nalelanda, ati nokuti, ‘Walanda fyafula. Kabili wibwekeshapo kulanda pali uyu umulandu!  ²⁷ Kabiye pa mulu wa lupili lwa Pisiga, ulolekeshe ku kapinda ka ku kuso, na ku kapinda ka ku kulyo, ku kabanga na ku masamba. Ulolekeshe bwino ifyo uleya mona, pantu iwe tawayabuke mumana wa Yordani. ²⁸ Kanshi upeele Yoshua imilimo, umukoseleshe no kumucincisha, pantu euli nokutungulula aba bantu pakwabuka, kabili eukalenga nokuti bakapoke cilya calo, ico iwe walatamba.’ ²⁹ “Kanshi ifwe epakwikala mwishika mupepi no musumba wa Beti Peori.”