¹ Kabili Mose atile, “Kanshi na ifwe twalyalulwike no kulakonkafye umusebo wa mu matololo walola kuli Bemba Wakashika, ngefyo Yawe anjebele. Pa nshita iyitali twalelulumbafye mu calo ca mpili ica ² Seiri. Elyo Yawe anjebele ³ ati, ‘Namukokola ukululumba mu calo ca mpili, nomba alukileni ku kapinda ka ku kuso.’ ⁴ Yawe anjeba ukukonkomesha abantu ukuti, ‘Mwalapita mu calo ca bamunyinenwe aba mu lupwa lwakwa Esau, abaikala mu calo ca Seiri. Bali nokumutiina, lelo mube abacenjela nganshi.  ⁵ Tecakwesha kubalwisha, pantu ine nshakamupeele calo cabo, nangu pakunyantafye ulukasa. Pantu icalo ca mpili sha Seiri napeela kuli Esau ukuti cibe cakwe. ⁶ Ifyakulya na menshi fyena mukaleshita ne ndalama sha silifa.’  Yawe Lesa wenu alimupaala muli fyonse ifyo mwabomba. ⁷ Yawe alamusakamana ilyo mululumba mu matololo ayashaikulila nganshi. Pa myaka amakumi yane iyi, Yawe Lesa wenu aba na imwe, elyo mulakwata na fyonse ifyo mukabila. ⁸ Kanshi na ifwe epakuya, twasha na bamunyinefwe aba mu lupwa lwakwa Esau, abaleikala mu Seiri. Twalola ukufuma mu musebo walola ku Araba, uwafuma ku Elati na Esioni Geberi, twalola mu matololo ya mu musebo wa Moabu. ⁹ Elyo Yawe anjeba ati, ‘Tecakwesha kulwisha abena Moabu nangu ukubacusha, pantu ine nshakamupeele calo cabo. Pantu umusumba wa Ari napeela ku ba mu lupwa lwakwa Loti.’ ” ¹⁰ (Abena Emi ebaleikala kulya. Bali fipokapoka kabili abengi. Elyo bali abatali nga bena Anaki.  ¹¹ Nga bena Anaki nabo bene baleitwa abena Refaimu, nomba abena Moabu baleita abena Anaki ati bena Emi. ¹² Abena Hori kale ebaleikala mu calo ca Seiri, nomba aba mu lupwa lwakwa Esau babatamfyamo. Babalofya ukufuma pa cinso cabo, balaikala namo nga filya fine abena Israeli bafulumwine abalwani babo mu calo Yawe abapeele.) ¹³ “Elyo Yawe atile, ‘Nomba imeni no kwabuka ishika lya Seredi.’ Elyo twayabuka ishika nga fintu Yawe atukonkomeshe.  ¹⁴ Na panuma ya myaka amakumi yatatu na cine konse konse ukutuula apo twaimine ku Kadeshi Banea ukushinta napo twayabukile ishika lya Seredi, ninshi ne nkulo yamalamba ya baume bonse ababulwi balipwa ukufwa pa nkambi nga mulya mwine Yawe alapile.  ¹⁵ Ukuboko kwakwa Yawe kwali pali bena mpaka abalofyafye bonse mu nkambi. ¹⁶ “Nomba ilyo amalamba ya bantu babulwi yapwile ukufwa, ¹⁷ Yawe epakunjeba ati,  ¹⁸ ‘Ilelo mulepita mu citungu ca Moabu ku Ari. ¹⁹ Ilyo mukapalama ku bena Amoni, tecakwesha ukubalwisha nangu ukubacusha, pantu ine nshakamupeele icalo cabo, ici calo nacipeela ku ba mu lupwa lwakwa Loti.’ ²⁰ (Ici calo naco caishibikwe ukuti ca bena Refaimu, pantu ebaleikalamo kale, lelo abena Amoni balebeta abati bena Samusumimu. ²¹ Bali abengi nganshi, abamaka kabili abatali nga bena Anaki. Nomba Yawe alibalofeshe ukufuma pa cinso ca bena Amoni, nabo babafulumuna mu calo ebalaikalamo. ²² Efyo Yawe acitile na bena Edomu aba mu lupwa lwakwa Esau, abaleikala mu Seiri, ilyo alofeshe abena Holi ukufuma pa cinso cabo. Nabo abena Edomu bafulumuna abena Holi mu calo, ebalaikalamo ukufika na lelo. ²³ Elyo palwa bena Afimu abaleikala mu mishi ukufikafye na ku Gaza, abena Kafito abafumine ku Kafito, ebabalofeshe baikala na mu calo cabo.) ²⁴ ‘Nomba imeni, mwabuke no mukonko wa Alinoni. Moneni, nimbika mu maboko yenu Sihoni umwina Amoli, imfumu ya mu Heshiboni, pamo pene ne calo cakwe. Muwililileni, mutampeko ukupoka icalo.  ²⁵ Ukutampa lelo ndelenga imishobo yonse pano calo ilemutiina no kumukwatila umwenso. Bonse bakulaitutuminafye no kulilishika ilyo baumfwa ululumbi lwenu.’ ²⁶ “Ukufuma mu matololo ya Kedemoti, natumine inkombe ku mfumu Sihoni iya ku Heshiboni ishakuya mweba palwa cibote ukuti, ²⁷ ‘Leka tupitemo mu calo cobe, twakulakonkafye inshila, tatwakapatukile ku kulyo nelyo ku kuso. ²⁸ Muletushitishafye ifilyo twakulalya na menshi twakulanwa pa mutengo wa silifa. ²⁹ Lekafye tupite mu calo cobe pa makasa, pamo ngefyo aba mu lupwa lwakwa Esau abekala mu calo ca Seiri na bena Moabu abekala mu calo ca Ari, batusuminishe ukupita mu fyalo fyabo mpakafye twayabuka umumana wa Yordani, ukuya mu calo ico Yawe Lesa wesu ali nokutupeela.’ ³⁰ Nomba imfumu Sihoni iya ku Heshiboni atukaanya ukupitamo mu calo cakwe. Pantu Yawe Lesa wenu amukoseshe amano no kumutalamika umutima, pakuti amupose mu minwe yenu ngefi fine acita na nomba.  ³¹ Elyo Yawe epakunjeba ati, ‘Mona, nintendeka ukukulubwila Sihoni pamo ne calo cakwe. Kanshi nomba tendekeni ukupoka icalo cibe cenu.’ ³² Ilyo Sihoni ne fita fyakwe fyonse baishile kukutulwisha mupepi no musumba wa Yahasi, ³³ Yawe Lesa wesu amuposele mu minwe yesu. Twamucimfya, pamo na bamwane ne fita fyakwe fyonse. ³⁴ Pali iyo nshita, twapoka imisumba yakwe yonse no kuipeela kukonaulwa, twaipaulula na bantu abalimo, abaume, abanakashi na baice. Takwali wapuswike nakalya.  ³⁵ Kanofye ifitekwa ne fitapwa fya mu misumba iyo twapokele, efyo twaibuulile nokusenda fwe bene. 36Yawe Lesa wesu ewalengele tupoke imisumba yonse ukutampila ku Aroeli ukukonka no mukonko wa Alinoni. ³⁶ Ukufuma ku musumba wa mukonko ukushinta na ku Gileadi, takwali musumba nangu umo uwatwanshishe.  ³⁷ Lelo ku calo ca bena Amoni kwena tamwapalemeko, nangu ku lulamba lwa mumana wa Yaboku, nangufye imisumba iyaba mu calo ca mpili nangu kumbi konse uko Yawe Lesa wesu atukonkomeshe ukukanafikako.”