¹ “Na pa nshita ilya Yawe anjebele ati, ‘Pekanya amabwe ayapapatala yabili nga yalya ayapakubala, elyo wise kuli ine pa mulu wa lupili. Kabili upange ne mbokoshi iya fimuti.  ² Nkalemba pa mabwe amashiwi nga yalya nalembele pa mabwe yapakubala ayo watobele. Elyo ukayabike na mu mbokoshi.’ ³ Kanshi na ine epakupanga imbokoshi ya mbao ya cimuti ca akasia, napekanya na mabwe ayapapatala yabili nga yalya ayapakubala. Nanina no lupili na mabwe ayapapatala yabili mu minwe yandi.  ⁴ Kanshi Yawe epakulemba pali yalya mabwe amashiwi yamo yene nga yakubalilapo, e fyebo ikumi limo ifyo amupeele ilyo alebila kuli imwe ukufuma mu mulilo, bulya bushiku mwalongene ku lupili. Elyo Yawe ayapeela kuli ine. ⁵ Kabili na ine epakwaluluka, natentemuka no lupili no kubika na mabwe ayapapatala mu mbokoshi intu napangile. Umo yacili na nomba, ngefyo Yawe ankonkomeshe.” ⁶ (Abena Israeli balifumine ku fishima fya bena Yaakani, baya na ku Mosera. Kulya kwine eko Aroni aya fwila, no kushiika eko bamushiikile. Umwana wakwe Eleasa ewamupyene pali bushimapepo.  ⁷ Ukufuma kulya baya ku Gudigoda, kabili batwalilila no kuya ku Yotibata, icalo icabamo utumana utwingi. ⁸ Pa nshita ilya Yawe aipatwilile aba mu luko lwa bena Levi ukulasenda Imbokoshi ya Cipangano cakwa Yawe no kulabomba nga bashimapepo pa cinso cakwa Yawe no kulapaala amapaalo mwishina lyakwe. Ukufika na lelo ebabomba uyu mulimo.  ⁹ E mulandu wine abena Levi bashapeelelweko icakaniko nangu icishilano pakati ka bamunyina. Yawe e cishilano cabo, ngefyo Yawe Lesa wenu abebele.) ¹⁰ “Kanshi napwile inshiku amakumi yane pa lupili, akasuba no bushiku, nga filya nacitile pakubala, nalyo line Yawe aliŋumfwile. Tacali bufwayo bwakwe ukumulofya. ¹¹ Elyo Yawe anjeba ati, ‘Kabiye, kabili ubatungulule mu nshila, pakuti bakengile no kupoka icalo ico nalaile ifikolwe fyabo ukubapeela.’” ¹² “Kanshi nomba we Israeli, cinshi Yawe Lesa obe afwaya ulecita? Ala, kuba na katiina kuli Yawe Lesa obe, ukwenda mu nshila shakwe, ukumutemwa, ukutumika Yawe Lesa obe no mutima obe onse no mweo obe onse,  ¹³ no kubaka amafunde ne fipope fyakwa Yawe ifyo ndekweba ilelo nga cikakuwamine. ¹⁴ Nangu umulu pamo pene ne myulu ya mumulu, isonde na fyonse ifyabamo, fyonsefye fyakwa Yawe Lesa obe.  ¹⁵ Nomba Yawe abikile umutima pa fikolwe fyenu no kufitemwa, epakumusala imwe mwe ba mu ndupwa shabo, ukucila aba mishobo imbi ngefyo cili ukushinta ilelo. ¹⁶ Kanshi imwe mulebeela Yawe, kabili mwilaba bankosa mitwe.  ¹⁷ Pantu Yawe, Lesa wenu, ni Lesa wa milungu kabili ni Mfumu ya shamfumu, Lesa Mukulu, uwamaka, uwakukwatila akatiina, taba na mucishacinani, kabili tapoka mafisakanwa. ¹⁸ Acita umulinganya kuli bakashiwa na bamukamfwilwa, alitemwa na beni, eubapeela ifyakulya ne fyakufwala.  ¹⁹ Kabili na imwe bene mulingile ukutemwa abeni, pantu na imwe mwali abeni mu Egupto. ²⁰ Muleba na katiina kuli Yawe Lesa wenu, kabili eo muletumika. Mulekonena kuli ena no kulapa mulelapila mwishina lyakwe.  ²¹ Mulemulumbanya, ni Lesa wenu, uwamucitile ifintu ifikalamba, ifipapwa fyakutiinya ifyo mwaimwenene na menso yenu. ²² Ifikolwe fyenu ifyaile ku Egupto fyalifye amakumi cine lubali ( fyonse pamo. Nomba Yawe Lesa wenu namusandulula, mulifye nge ntanda sha mu mulu ku bwingi.