¹ Kabili Mose atile, “Muletemwa Yawe Lesa wenu, mulekonka ifyo afwaya, amafunde, ifipope ne fyebo fyakwe. ² Mwibukishe ilelo ukuti te bana benu bamwene no kwishiba ukusambilisha kwakwa Yawe Lesa wenu, ubucindami bwakwe, ukuboko kwakwe ukwabulamba no kuboko kwakwe ukwatambalala, ³ ne fisungusho acitile, na fyonse ifyo acitile mukati ka calo ca Egupto, kuli Farao imfumu ya mu Egupto na ku calo cakwe conse. ⁴ Mwibukishe ifyo Yawe acitile ifita fya bena Egupto, kumo kwine na bakabalwe babo na maceleta yabo, ifyo banwenene muli Bemba Wakashika ilyo bamusupile panuma, nefyo Yawe abalofya mpaka na lelo.  ⁵ Te bana benu bamwene ifyo Yawe amucitile mu matololo ilyo tamulati mwise pali ino ncende. ⁶ . Mwibukishe ifyo acitile kuli Datani na Abiramu, abana abaume bakwa Eliabu, uwa luko lwakwa Rubeni, ilyo umushili waceneme no kubamina kumo kwine ne ndupwa shabo, amatenti yabo na fyonse ifyo bakwete mu menso ya bena Israeli.  ⁷ Lelo menso yenu yaimwenene ifintu fyonse ifyakupapa ifyo Yawe acita.” ⁸ “Mulekonka amafunde yonse ayo nalamupeela ilelo, pakuti mukabe na maka ayakupoka icalo ico mwalaswa mwingilemo ilyo mwalayabuka Yordani. ⁹ Kabili epakuti mukaye ikala inshita iyitali mu calo ico Yawe alaile ukupeela ifikolwe fyenu pamo na ba mu ndupwa shabo, icalo icifumfumukamo umukaka no buci. ¹⁰ Icalo mwalayabukilamo no kucipoka, tacili nge calo ca Egupto ico mwafumako, uko mwalebyala imbuto no kushitapilila nganshi kwati ni mwibala lya musalu.  ¹¹ Nomba icalo mwalayabukilamo no kucipoka calo ca mpili na mawanga, umuloka imfula ukufuma mu mulu.  ¹² Calo ico Yawe Lesa wenu asunga. Amenso yakwa Yawe Lesa wenu lyonse epo yalolesha ukufuma ku kutampa kwa mwaka mpaka na ku mpela. ¹³ “Kanshi imwe nga mukalakonka amafunde bwino bwino ayo namupeela ilelo, ayakutemwa Yawe Lesa wenu no kulamubombela ne mitima yenu yonse ne myeo yenu yonse,  ¹⁴ lyena ninshi nkalamutumina imfula mu calo cenu ilyo ilekabilwa, pa mibundo na mu mainsa, pakuti mukalesombola iŋanu, umwangashi upya, na mafuta ya miolifa. ¹⁵ Nkamesha ifyani mu mabala ifyakuti iŋombe shenu shikalelya, kabili na imwe mukalalya no kwikuta. ¹⁶ Muleba abacenjela epali mwasangukila Yawe no kulapepa imilungu imbi no kulaifukamina.  ¹⁷ Nga mukalacita ifyo, lyena ubukali bwakwa Yawe bukamwishila. Akesala ne myulu pakuti akaleshe imfula ukulaloka, no mushili ukakaane no kumesha ifisabo. Ninshi nemwe bene tamwakakokole ukuloba muli cilya calo cisuma Yawe akamupeela. ¹⁸ “Kanshi bikeni amashiwi yandi aya mu mitima yenu na mu mano yenu. Muleyakakila na ku maboko yenu, no kuyafwala pa mpumi shenu, nge fishibilo fyakwibukishishako.  ¹⁹ Muleyasambilisha na ku bana benu. Muleyakomailapo ilyo mwikele pa mayanda yenu, na lintu muletandala mu misebo, na pakusendama kabili na lintu mwabuka mu tulo. ²⁰ Muleyalemba na pa filu fya minshi ya mayanda yenu, na pa mpongolo shenu,  ²¹ pakuti lyena inshiku shenu pamo ne sha bana benu shikabe ishingi ishakwikala muli cilya calo, ico Yawe alapile ukupeela ifikolwe fyenu, ukushinta napo umulu ukekalila pa mulu wa calo. ²² “Nga mwalabaka amafunde yonse namupeela, ukutemwa Yawe Lesa wenu, mukwenda mu nshila shakwe shonse kabili no kukonena kuli ena,  ²³ lyena Yawe akafulumuna imishobo iyi yonse pa ntanshi yenu, kabili mukapokolola ifyalo ku mishobo ikalamba, iyamaka ukucila imwe. ²⁴ Impanga yonse umo mukalanyanta ikalaba yenu. Icalo cenu cikalunduluka ukufuma ku matololo ukufika na ku Lebanoni, kabili ukufuma ku mumana wa Yufurate ukuya fika na kuli bemba wa ku masamba.  ²⁵ Takwakabe uwakumwansha imwe, konsefye uko mukalaya. Yawe Lesa wenu akalenga abantu bonse ukulamutiina, ngefyo amulaile. ²⁶ “Moneni, nabika ilelo pa ntanshi yenu ipaalo atemwa ukulapishiwa.  ²⁷ Lipaalo, nga cakuti mwabeela amafunde yakwa Yawe Lesa wenu ayo namupeela ilelo.  ²⁸ Kulapishiwa, nga tamulebeela amafunde yakwa Yawe Lesa wenu, kabili no kufuma mufyo ndemukonkomesha ilelo mukukonka imilungu imbi iyo mushatala amwishiba. ²⁹ Ilyo Yawe Lesa wenu akamufisha mu calo ico mwalaingilamo mukupoka, mukabile ipaalo pa lupili lwa Gerisimu, elyo ukulapisha nako pa lupili lwa Ebali.  ³⁰ Mwalishiba ukuti ishi mpili shibili shabela mwishilya lya mumana wa Yordani ku masamba ya musebo ukuwila akasuba, mupepi na ku miti ikalamba iya More mu calo ca balya abena Kenani abekala mu Araba apalungatana na Giligali. ³¹ Muli mupepi no kwabuka umumana wa Yordani, kukwingila no kupoka icalo ico Yawe Lesa wenu alemupeela. Nga mwacipoka no kulaikalamo, ³² mukalesakamana ukubeela amafunde ne fipope ifyo ndemupeela ilelo.”