¹ “Kabili aya e mafunde ne fipope ifyo muli nokubaka bwino bwino mu calo ico Yawe, Lesa wa fikolwe fyenu amupeela ukupoka, ilyo lyonse mukalaikalamo.  ² Mukonaule incende shonse ishaba pa mpili ishitali, pa tupili na pesamba lya cimuti conse icayandalala umo imishobo mupokolweleko icalo yalepepela imilungu yaiko. ³ Mukabongololemo ifibumbili fya malambo fyabo, mukatobaule amabwe yabo bacindikisha kabili mukoce inceshi sha Ashera, umulungu wabo, mu mulilo. ⁴ Mukakomaule ifimpashanya fya milungu yabo, kabili mukalofye na mashina yatuko pali isho ncende. ⁵ “Tecakwesha kulapepa Yawe Lesa wenu mu musango bapepelamo.  ⁶ Lelo mukafwayepo incende Yawe Lesa wenu ali nokusalapo pa nko shenu apo akabika Ishina lyakwe nge cifulo cakwikalamo. Kuli ilya incende eko mufwile ukuya. Kuli ilya ncende eko mukalaleta amalambo yakoca, imituulo, ifya pa cekumi, ifyabupe fimbi ifyaibela, ifyabupe ifyo mukalalaya Yawe, ifyabupe ifyakuitemenwafye, amabeli ya ŋombe na ya mbushi ne mpaanga shenu. ⁷ Palya pene pa cinso cakwa Yawe Lesa wenu, epo imwe ne ndupwa shenu mukalelya no kusansamuka pa fintu fyonse ifyo mwabomba ne minwe yenu pantu Yawe Lesa wenu alimupaala. ⁸ “Mwikalacita ngefi tucita kuno ilelo, cila muntu acitafye icamuwamina,  ⁹ apo tamulati mufike mu cifulo cakutuushamo icikaba icacishilano, ico Yawe Lesa wenu ali nokumupeela. ¹⁰ Lelo muli nokwabuka umumana wa Yordani no kwikala mu calo Yawe Lesa wenu alemupeela nge cacishilano, kabili akalenga mukatushe ku balwani benu abamushinguluka bonse epakuti mukekale umutelelwe.  ¹¹ Kanshi ku ncende Yawe Lesa wenu akasala nge cifulo cakwikalamo Ishina lyakwe, kulya eko mukalatwala fyonse ifyo namukonkomesha, amalambo ya cakoca, imituulo, ifyapekumi, ifyabupe fimbi ifyaibela na fyonse ifyo mwalaya ukupeela Yawe. ¹² Kabili kulya kwine eko mukalesansamuka pa cinso cakwa Yawe Lesa wenu, imwe, abana benu abaume na banakashi, ababomfi benu abaume na banakashi, na bena Levi abakalaikala mu misumba yenu, abashakwata icitungu nangu icacishilano cabo ¹³ Tecakwesha kulekela amalambo yenu ayakoca pa ncendefye yonse iyo mwatemwa.  ¹⁴ Mukalalekelafye amalambo yakoca pa ncende imofye iya ba mu luko lwenu lumo iyo Yawe akasala, kulya kwine eko mukalekonka fyonse ifyo namukonkomesha. ¹⁵ “Lelo kuti mwaipaya inama shenu mu musumba uuli onse, no kulya apo mulefwaila nga filya fine mulelya insebula nangu impombo ukulingana na mapaalo umo Yawe Lesa wenu amupeelela. Bonse abashasangululwa na basangululwa kuti balyako. ¹⁶ Nomba mwilalya mulopa, wena mukalewitila panshi nga menshi. ¹⁷ Mwilalya mu misumba yenu icapekumi ca ŋanu shenu, umwangashi upya na mafuta, nangu na mabeli ya ŋombe na ya mbushi ne mpaanga shenu nangu conse ico mwalaya ukupeela ne fyabupe fyenu ifyakuitemenwa, nangu ifyabupe fimbi. ¹⁸ Lelo mukalelya fyonse pa cinso cakwa Yawe Lesa wenu pa ncende apo Yawe Lesa wenu ali nokusala. Mukalelya pamo, imwe, abana benu abaume na banakashi, ababomfi benu abaume na banakashi, na bena Levi abaikala mu misumba yenu. ¹⁹ Muli nokusansamuka pa cinso cakwa Yawe Lesa wenu pa fintu fyonse mwabomba ne minwe yenu. ²⁰ “Ilyo Yawe Lesa wenu akalundako icalo cenu ngefyo amulaile, elyo na imwe mwaumfwa icikasha kabili mwasosa amuti, ‘tulefwaya inama,’ lyena kuti mwalya inama umo mulefwaila. ²¹ Nga cakuti incende iyo Yawe Lesa wenu asala nge cifulo cakwikalamo Ishina lyakwe ili ukutali nganshi, kuti mwaipayapo iŋombe nangu impaanga Yawe amupeela. Kabili ngefyo amukonkomeshe, mukalelya mu misumba yenu umo mulefwaila.  ²² Bonsefye abashasangululwa na basangululwa kuti balyako isho nama, nga filya fine mulya insebula nangu impombo. ²³ Lelo tecakwesha kulya kumo no mulopa pantu ubumi bwaba mu mulopa. Mwikalalya ubumi kumo ne nama.  ²⁴ Kanshi mwilalya mulopa. Wena mukalewitila panshi nga menshi.  ²⁵ Mwikalalya mulopa pakuti ifintu fikamuwamine imwe pamo na bana benu. Pantu ninshi mukalacita icalungama pa cinso cakwa Yawe. ²⁶ Nomba ifintu ifyamushilo na fyonse mwalaya ukupeela, mulefisenda ku ncende imofye iyo Yawe akasala.  ²⁷ Mukalalekela amalambo yakoca pa bulambo bwakwa Yawe Lesa wenu, fyonse inama no mulopa. Umulopa wa malambo yenu wena mukalewitila lubali lwa bulambo bwakwa Yawe Lesa wenu, lelo inama yena mukalelya.” ²⁸ Mukalebeela bwino amafunde aya yonse ndemupeela pakuti ifintu fikamuwamine, imwe pamo na bana benu, pantu mukalacita icisuma kabili icalungama pa cinso cakwa Yawe Lesa wenu. ²⁹ “Yawe Lesa wenu akonaula imishobo pa ntanshi yenu iyo mwalaya lwisha no kucimfya kabili mukabafulumunamo no kwikala mu calo cabo. ³⁰ Lelo panuma yakulofya imishobo pa ntanshi yenu, imwe mukacenjele mukukanawila mu citeyo cakwipusha pa milungu yabo, amuti, ‘Bushe iyi mishobo ipepa shani imilungu yaiko, pakuti na ifwe efyo tulecita?’ ³¹ Imwe tecakwesha kulapepa Yawe Lesa wenu mu musango wabo, pantu mukupepa imilungu yabo, bena balacita ifintu ifingi ifyamuselu ifyo Yawe apata. Bena baloca na bana babo abaume na banakashi pakutuula amalambo ku milungu yabo. ³² “Muleshininkisha ukuti mulekonka fyonse ifyo namukonkomesha, mwilalundapo atemwa ukufumyapo fimo.”