¹ Aya e mashiwi ya cipangano Yawe akonkomeshe Mose ukupangana na bena Israeli mu calo ca Moabu, ukulunda pa cipangano ico apangene nabo ku Horebu. ² Mose alonganika abena Israeli bonse, alabeba ati, “Amenso yenu yalimwene fyonse ifyo Yawe acitile mu Egupto kuli Farao, bacilolo bakwe bonse elyo na ku calo cakwe conse.  ³ Na menso yenu mwalimwene ifyamesho ifikalamba, ifishibilo fyacipeshamano ne fisungusho ifikalamba.  ⁴ Nomba ukushinta na pa bushiku bwa lelo, Yawe tamupeela amano yakwishiba nangu amenso ayamona nangu amatwi ayomfwa. ⁵ Pa myaka amakumi yane iyo namutungulula mu matololo, ifyakufwala fyenu tafyalepukapo nangu indyato shenu nasho tashalepukapo.  ⁶ Tamwalyapo mukate nangu ukunwa umwangashi nangu conse icikola. Nacitile ifi pakuti mwishibe ukuti nine Yawe Lesa wenu. ⁷ Ilyo twafikile pali ino ncende, imfumu Sihoni iya ku Heshiboni ne mfumu Ogi iya Bashani, balishile kukutulwisha, nomba twalibacimfishe.  ⁸ Twabapoka ne calo, twacipa nge cacishilano ku bena Rubeni, na ku bena Gadi, na kuli citika wa luko lwakwa Manase. ⁹ Mulebaka bwino amashiwi ya cipangano ici, epakuti mukabe abakankala mu fintu fyonse mwakulacita. ¹⁰ “Imwe bonse ilelo namwiminina pa cinso cakwa Yawe Lesa wenu, intungulushi shenu na bashimucindikwa, abakalamba, bacilolo na bantufye bambi bonse abena Israeli,  ¹¹ pamo pene na bana benu, abakashi benu, na benafyalo abekala mu nkambi shenu, abamutebela inkuni no kumutapilako amenshi. ¹² Namwiminina pano pakuti mupangane icipangano na Yawe Lesa wenu, icipangano Yawe alepangana na imwe no kucikaka no mulapo,  ¹³ pakuti amusuminishe ilelo ukuba abantu bakwe, ukuti abe Lesa wenu ngefyo alaile ifikolwe fyenu Abrahamu, Isaki, na Yakobo. ¹⁴ Ndepangana ici cipangano no mulapo waciko tekuli imwe mweka  ¹⁵ mwe beminine pano na ifwe ilelo pa cinso cakwa Yawe Lesa wesu, lelo na bashili pano ilelo. ¹⁶ “Imwe mwe bene mwalishiba ifyo twaleikala mu Egupto nefyo twapitile mu fyalo ilyo twaleisa kuno. ¹⁷ Mwalimwene pakati kabo ifimpashanya fyabo ifyapatwa no tulubi twa fimuti na mabwe, utwa silifa na golide.  ¹⁸ Muleshininkisha ukuti tapali mwaume nangu umwanakashi, umukowa nangu uluko pali imwe mwe bali pano ilelo, uwakutalusha umutima wakwe ukufuma kuli Yawe Lesa wesu nokuya mukulapepa imilungu ya mishobo ilya. Mushininkishe ukuti peba mushila pakati kenu uufumya ubusungu ubwalula filya. ¹⁹ Ilyo uyu umuntu aumfwa aya mashiwi ya uyu mulapo, elyo aipaala umwine kabili alatontonkanya ukuti, ‘Nkabafye umutende nangu ningatwalilila ukulakonka inshila yandi.’ Ici cikaleta ifinkunka pa mushili uwatapililwa na pa mushili uwauma wine. ²⁰ Yawe takatale afwaya ukubelela umuntu wa musango uyu uluse. Ubukali bwakwe ne cipyu fikemina uyu muntu. Ukulapisha konse ukwalembwa muli ici citabo kukamuponena, na Yawe akalofya ishina lya uyo muntu pano calo. ²¹ Yawe akamusobolola ukufuma mu nko shonse isha bena Israeli pakumuletela ifinkunka, ukulingana no kulapishiwa kwa cipangano kwalembwa muli ici citabo ca mafunde. ²² “Mu nkulo sha kuntanshi, abana benu abakamukonkapo elyo na benafyalo bakafuma mu fyalo fyakutali bakamona ifinkunka ifikapona pa calo na malwele ayo Yawe akacushishako icalo. ²³ Icalofye conse cikaba mito ya mucele na salufa, tapakabe cakubyalamo, tapakabe icakumenamo, kabili tamwakakule fimuti fya mpanga. Cikaba ngo konaika kwa Sodoma na Gomora, Adima na Seboyimu, imisumba Yawe aonawile ilyo akalipe nganshi.  ²⁴ Elyo imishobo yonse ikepusha aiti, ‘Bushe cinshi Yawe acitile ifi kuli ici calo? Ngeci cifukushi cabukali cilolele mwi?’ ²⁵ Ubwasuko bwa bantu bukaba nifi, ‘Ni pa mulandu wakuti aba bantu baonawile icipangano cakwa Yawe, Lesa wa fikolwe fyabo. Icipangano apangene nabo ilyo abafumishe mu calo ca Egupto. ²⁶ Baleitumika no kupepa imilungu imbi, kabili no kuifukamina, iyo bashatalile abeshiba, imilungu Yawe ashabapeele. ²⁷ Kanshi ecalengele icipyu cakwa Yawe cimine ici calo, icakuti aleta nokulapisha konse ukwalembwa muli ici citabo.  ²⁸ Mu kukalipa kwakwe ukukalamba, kabili na mu cipyu cakwe, Yawe alibafumya mu calo cabo, abatamfisha mu calo cimbi, ngefi fine cili na nomba.’ ²⁹ “Ifyankaama fyonse fyakwa Yawe Lesa wesu, lelo ifyo atusokolwela fyesu ifwe na bana besu pe na pe, pakuti tulekonka amashiwi yonse aya mafunde aya.”