¹ “Kabili nga cakuti mukalaumfwila Yawe Lesa wenu no kulakonka bwino amafunde yakwe yonse ayo ine namupeela ilelo, Yawe Lesa wenu akamucita umushobo ukalamba ukucila imishobo yonse iya pano isonde.  ² Amapaalo yonse aya yakesa pali imwe, kabili mukalaba nayo nga mwalapetamina Yawe Lesa wenu. 3 ³ “Mukapaalwa mu musumba kabili mukapaalwa na mu mpanga. ⁴ “Ubufyashi bwa mwifumo lyenu bukaba ubwapaalwa pamo ne fisabo fya mu mushili wenu, abana ba fitekwa fyenu, abana ba ŋombe shenu elyo na bana ba mpaanga shenu. ⁵ “Imiseke yenu ne fyakukashilamo imifuba fili nokupaalwa. ⁶ “Muli nokupaalwa ilyo mukalaingila, nelyo mukalafuma. ⁷ “Yawe akamupeela amaka yakucimfya abalwani benu nga bamwimina. Pakumulwisha bakatula ku ntungafye imo, lelo pakufulumuka lyena bakalasalanganina mu ntunga cine lubali. ⁸ “Yawe akatuma ipaalo pa matala yenu na pa cintu conse ico mukekatako ne minwe yenu. Yawe Lesa wenu akamupaala mu calo alamupeela. ⁹ Yawe akamucita abantu bakwe abamushilo, ngefyo alaile no mulapo, nga mwalasunga amafunde yakwa Yawe Lesa wenu no kulaenda mu nshila shakwe.  ¹⁰ Elyo abantu bonse pano isonde bakamona ukuti mwaitwa kwishina lyakwa Yawe, elyo nokutiina bakalamutiina. ¹¹ Yawe akamupeela ubukankala nganshi mu bufyashi bwa mwifumo lyenu, ifitekwa fyenu na mu fisabo fya mu mushili wenu mu calo alaile ifikolwe fyenu ukumupeela. ¹² Yawe akamwiswila umulu, umo atutila ifya bukankala bwakwe. Akalatuma imfula pa nshita yaiko, kabili akapaala ne milimo ya maboko yenu. Mukalaashimishako imishobo iyingi ifintu, lelo imwe tamwakaashime kantu ku mushobo nangu umo. ¹³ Yawe akamucita ukuba imitwe, te micila iyoo. Mukalaba aba pamulu, tamwakaleba aba pesamba iyoo. Lelo kwena cikulu mukalekonka bwino amafunde yakwa Yawe Lesa wenu no kuyasunga yonse, ayo ine namupeela lelo.  ¹⁴ Kanshi tecakwesha kupulapo ifunde nangu limo payo namupeela ilelo, ukwalukila ku kulyo nangu ku kuso mukukonka imilungu imbi no kuitumika. ¹⁵ “Nomba nga cakuti mwakaana ukulaumfwila Yawe Lesa wenu, kabili mwakaana no kulakonka bwino amafunde ne fipope fyakwe fyonse ifyo ine ndemupeela ilelo, ukulapisha konse uku kukamwishila no kumucimfya. ¹⁶ “Mukalapishiwa mu musumba, kabili mukalapishiwa mu mpanga. ¹⁷ “Imiseke yenu ne fyakukasawilamo umufuba fili nokulapishiwa. ¹⁸ “Ubufyashi bwa mwifumo lyenu bukalapishiwa pamo ne fisabo fya mushili wenu, abana ba ŋombe shenu elyo na bana ba mpaanga shenu. ¹⁹ “Muli nokulapishiwa ilyo mukalaingila nelyo mukalafuma. ²⁰ “Yawe akatuma pali imwe ukulapishiwa, icimfulunganya elyo no kukalipilwa muli fyonse ifyo mukalacita ne minwe yenu, mpakafye mukonaike no kuloba bwangu pa mulandu wa bubi mwacita ubwakusuula Yawe.  ²¹ Yawe akamuletela icikuko ca malwele mpakafye akamulofye mu calo mwalaingila mukucipoka. ²² Yawe akamulwalika amalwele ya ntandabwanga, cifimba ne mpepo. Akaleta ne cilala icikali no kukabisha no bulwele bwakukonkotanika amabula no kufufuma. Ifikuko fikaba pali imwe mpaka mukalobe. ²³ Umulu ukakosa ngo mukuba, no mushili uo ukanyantapo ukaba nge cela.  ²⁴ Yawe akaalula imfula ya calo cenu ukuba ulukungu no lufukutu, efikalafuma mu mulu mpakafye mukalobe. ²⁵ Yawe akalenga abalwani benu ukumucimfya. Pakuya kukubalwisha mukalatula ku ntungafye imo, lelo pakufulumuka lyena mukalasalanganina mu ntunga cine lubali. Kabili aba mu bufumu bonse ubwa pano isonde bakapapa no kumfwa umwenso.  ²⁶ Ifitumbi fyenu fikaba ifyakulya fya fyuni fya mu lwelele ne fiswango fya mu mpanga. Kabili takwakaleba nangu umo uwakufitamfyapo. ²⁷ Yawe akamulwalika ifipute fya ku Egupto elyo na bamumena, ifilonda fya pa nkanda ne fiseseya, amalwele ayashakaleposhiwa.  ²⁸ Yawe akalamulwalika ubushilu, ubupofu no kufulungana kwa mano.  ²⁹ Nangu akasuba kali pakati ka mutwe, imwe mukalapulumpunta nge mpofu mu mfifi. Tamwakaleba ne shuko mu cintufye conse ico mukalacita. Cila bushiku, bakalamufyenga no kulamwibilafye pe, lelo takwakaleba nelyo umo uwakumupokololako. ³⁰ “Mukalakobekela abakashana bakuupa, lelo ni bambi bakababuula no kusendama nabo ku maka. Mukalakuula amayanda, lelo tamwakaleikalamo. Mukalabyala imyangashi, lelo tamwakatale amulyako fisabo fyaiko.  ³¹ Bakalaipaila iŋombe shenu pa cinso cenu, lelo imwe tamwakalelyako. Bakalasenda bapunda benu ku maka no kubabwesha iyoo. Bakalapeela abalwani benu impaanga shenu, lelo takwakaleba uwakushipokololako. ³² Abana benu abaume na banakashi, bakalabapeela ku mushobo umbi, elyo cila bushiku mukalakalifyafye amenso pakuti mumone uko abana benu balebwela, lelo mukabulwa amaka yakucitapo cimo. ³³ Abantu abo mushaishiba ebakalalya ifisabo ifikafuma mu mushili na mu maka yenu, lelo imwe mukalapelwapofye no kulaculilapo buluku buluku cila bushiku.  ³⁴ Ifintu ifyo mukalamona fikamupenya.  ³⁵ Yawe akalamulwalika ifipute ifikali ku molu na mu makufi ifishakaleposhiwa ukufuma ku makasa ukushinta na ku mutwe. ³⁶ “Yawe akamutwala, imwe pamo ne mfumu mukasonta, ku mushobo umbi uo imwe nangu ifikolwe fyenu fishatala afishiba. Kulya eko mukalapepa imilungu imbi, iyapangwa ku fimuti na ku mabwe.  ³⁷ Abakalamona bakapapa no kumfwa umwenso. Bakalamuwela nokumuseka ku mishobo yonse uko Yawe akamufulumwina. ³⁸ “Mukalabyala imbuto ishingi mu mabala, lelo mukalasombola utunono pantu makanta akalya ifisabo fyenu.  ³⁹ Mukalima amabala ya myangashi no kuyasekwila, lelo tamwakanweko mwangashi nangu ukusombolako ifisabo, pantu ifinsenda fikalya. ⁴⁰ Mukakwata imiti ya miolifa mu calo cenu conse, lelo tamwakengeko mafuta no kuyabomfya, pantu imiolifa ikalukuta. ⁴¹ Mukalakwata abana abaume na banakashi, lelo tamwakabe nabo pantu bakasendwa muli bunkole.  Makanta akonaula imiti yenu yonse ne filimwa fya mu mushili wenu onse. ⁴² Makanta akonaula imiti yenu yonse ne filimwa fya mu mushili wenu onse. ⁴³ “Abenafyalo abo muleikala nabo mu calo cenu bakalacindaminakofye, elyo imwe mwakulabwelelafye kunuma.  ⁴⁴ Bena ebakalamukongwesha, lelo imwe tamwakalebakongwesha. Bena bakaba imitwe, lelo imwe mukaba imicila. ⁴⁵ “Ukulapisha konse uku kukesa pali imwe, kukamukonka no kumusanga mpaka mukalobe, pantu mwakene ukubeela Yawe Lesa wenu nokulakonka amafunde ne fipope amupeele. ⁴⁶ Efikaba icakwishibilako ne cisungusho kuli imwe na ba mu ndupwa shenu pe na pe. ⁴⁷ Yawe alimupaalile muli fyonse, nomba imwe mwalifililwe ukumubombela ne mitima yenu yonse ne nsansa mu nshita ya bukankala.  ⁴⁸ Eico nomba mukalabombela abalwani Yawe akamutumina abakumulwisha, kabili ni mu nsala ne cilaka, mukusapula ne cipowe icishaibipila. Akamukulikila ikoli lya cela mu mikoshi mpaka akamulofye. ⁴⁹ Yawe akamuletela umushobo wakumulwisha ukufuma ukutali, ukufuma ku mpela ye sonde, nga kapumpe afukukila icintu, abantu abo mukafilwa ukutesha ululimi lwabo.  ⁵⁰ Mushobo wa bantu abakatama ifinso, uwabula umucinshi ku bakalamba kabili uwabula uluse ku baice.  ⁵¹ Ebakesa onaula utwana twa fitekwa fyenu ne fisabo fya mu mushili wenu mpakafye mukalobe. Tabakamushileko iŋanu, nangu umwangashi upya, nangu amafuta nangu abana ba ŋombe nangu impaanga pa fitekwa fyenu, mpakafye na imwe bene mukalobelele. ⁵² Bakashinguluka imisumba yenu yonse mu calo cenu mpaka amalinga ayashailepela ayo mwacetekelamo yakabongoloke. Bakashinguluka imisumba yonse mu calo Yawe Lesa wenu alamupeela. ⁵³ “Pa mulandu wa bucushi abalwani benu bakamuletela ilyo bakamushinguluka, mukalalya abana ba mwifumo lyenu, umunofu wa bana benu abaume na banakashi abo Yawe Lesa wenu amupeela. ⁵⁴ Kabili no mwaume wamutembo nganshi kabili uwanakilila pakati kenu, takakwatile munyina wakwe inkumbu nangufye umukashi wakwe uo atemwisha, nangu abana bakwe bashelepo.  ⁵⁵ Kabili takapeleko nangu umo umunofu wa bana abo alelya. Pantu e cakulya akashalafye naco, pa mulandu wa balwani abakashinguluka imisumba no bucushi bakamuletela. ⁵⁶ Umwanakashi wamutembo nganshi kabili uwanakilila pakati kenu, icakuti tekuti anyante akatende kakwe panshi, takaakanyeko umulume wakwe uo atemwa no mwana wakwe umwaume, nangu umwanakashi,  ⁵⁷ icisa cabufyashi icikafuma mwifumo lyakwe na bana akafyala. Pantu akafwaya ukufilya mu bumfisolo ilyo abalwani bakashinguluka imisumba yenu no bucushi bakamuletela. ⁵⁸ “Nga cakuti tamulekonka bwino amashiwi ya mu mafunde aya, ayalembwa muli ici citabo, kabili tamulecindika ishina lyalulumbi ilyakupapa ilyakwa Yawe Lesa wenu,  ⁵⁹ ninshi Yawe akamuletela ifikuko ifyakutiinya, imwe pamo na ba lupwa lwenu, ifinkunka ifyabipisha kabili ifishakapwe, amalwele ayabi kabili ayashakapole. ⁶⁰ Akamuletela amalwele yonse aya ku Egupto, ayo mwatiinine, kabili tayakatale ayapwa.  ⁶¹ Yawe akamuletela amalwele ya misango misango ne finkunka ifishatala afilembwa muli ici citabo ca mafunde, mpakafye mukalobelele.  ⁶² Imwe mwe bafulisha nge ntanda sha mu mulu, banono bakashalapo abampendwafye. Pantu mwalikene ukumfwila Yawe Lesa wenu. ⁶³ Nga filya fine casekeshe Yawe ukuti mube abakankala no kumufusha mu mpendwa, kanshi efyo cikamusekesha ukumulofya no kumonaula. Mukanukulwa mu calo mwalaingilamo kukucipoka. ⁶⁴ “Elyo Yawe akamusalanganishisha pakati ka mishobo yonse, ukufuma ku mpela ya calo ukufika na ku mpela ibiye. Kulya kwine eko imwe mukalapepa imilungu imbi, imilungu iyabaswa ku fimuti na ku mabwe, uto imwe nangu ifikolwe fyenu fishatala afishiba. ⁶⁵ Ilyo mukaba pakati ka mishobo imbi tamwakamone kutuusha, kabili na makasa yenu tayakakwate pakunyanta na pakutuusha. Kabili kulya kwine, eko Yawe akamupeela amano aye sakamiko, amenso ayanakuka ukupembelela no mutima uwabula isubilo.  ⁶⁶ Imikalile yenu ikaba iyakutwishika lyonse. Mukaba no mwenso akasuba no bushiku, ukwabula ukushininkisha palwa bumi bwenu. ⁶⁷ Imitima yenu ikalaba iyabebuka ku fintu ukalatiina, na menso ku fintu yakalamona. Ulucelo mukalati, ‘Kanshi nga caciba icungulo,’ kabili icungulo naco amuti, ‘Kanshi nga caciba ulucelo!’  ⁶⁸ Yawe akalamubweseshamo ku Egupto mu mato, ubulendo ubo ine namuleseshe. Kulya kwine imwe eko mukalaishitisha mwe bene ku balwani benu pakuti mube abasha babo abaume na banakashi, lelo takwakabe nangu umo uukafwaya ukumushita.”