¹ Mose pamo na bakalamba ba mu Israeli bakonkomeshe abantu ati, “Mulebaka amafunde yonse ayo namupeela ilelo.  ² Ilyo mukaabuka Yordani no kwingila mu calo Yawe Lesa wenu alemupeela, mukemike amabwe yamo ayakulu, elyo mukayamase.  ³ Mukalembepo pa mabwe amashiwi ya mafunde aya ilyo mukaabuka pakwingila mu calo Yawe Lesa wenu alemupeela, icalo umufumfumuka umukaka no buci ngefyo Yawe Lesa wa fikolwe fyenu amulaile. ⁴ Kanshi ilyo mukaabuka Yordani, mukemike aya mabwe pa lupili lwa Ebali, ngefyo namukonkomesha ilelo, kabili nokuyamasa ⁵ Mukakuule palya pene ubulambo bwakwa Yawe Lesa wenu ubwa mabwe. Mwikabomfya icibombelo ca cela pali aya mabwe. ⁶ Mukakuule ubulambo bwakwa Yawe Lesa wenu na mabwe ayashaputulwa ayatuntulu, epo mukatuulile amalambo yakocela Yawe Lesa wenu. ⁷ Palya pene epo mukalekele amalambo yakwampana, ukuyalya no kusansamuka pa cinso cakwa Yawe Lesa wenu.  ⁸ Pali ayo mabwe mukemika, mukalembepo bwino bwino amashiwi ya mafunde aya.” ⁹ Elyo Mose na bashimapepo abena Levi baebele Israeli onse ati, “Ikala tondolo, we Israeli, kabili umfwe! Imwe nomba mwaba abantu bakwa Yawe Lesa wenu.  ¹⁰ Mulebeela Yawe Lesa wenu no kulakonka amafunde ne fipope ifyo namupeela ilelo.” ¹¹ Pa bushiku bwine bulya, Mose akonkomeshe abantu ati,  ¹² “Ilyo mukaabuka Yordani, ishi nko shikeminine pa lupili lwa Gerisimu no kupaala abantu. Ne nko ni ishi: Abena Simeoni, abena Levi, abena Yuda, abena Isaka, abena Yosefu na bena Benjamini. ¹³ Kabili ishi nko shena shikeminine pa lupili lwa Ebali pakulapisha abantu. Ne nko ni ishi: abena Rubeni, abena Gadi, abena Asheri, abena Sebuloni, abena Dani na bena Naftali.  ¹⁴ Abena Levi bakekatishe pakwankula aya mashiwi, bakebe abena Israeli bonse abati, ¹⁵ “‘Abe uwalapishiwa umuntu uubasa icakupashanya nangu ukwenga akalubi, akapangwa na maboko ya bantu, elyo no kulakapepa mu bumfisolo, icintu ico Yawe apata.’ “Elyo abantu bonse bakaasuke abati, ‘Ameni!’ ¹⁶ “‘Abe uwalapishiwa umuntu uukasuula wishi na nyina.’ “Elyo abantu bonse bakaasuke abati, ‘Ameni!’ ¹⁷   “‘Abe uwalapishiwa uukasesha ilibwe lya mupaka wa mubiye.’ “Elyo abantu bonse bakaasuka abati, ‘Ameni!’ ¹⁸ “‘Abe uwalapishiwa umuntu uukalenga impofu ukuluba inshila.’ “Elyo abantu bonse bakasuka abati, ‘Ameni!’ ¹⁹ “‘Abe uwalapishiwa uukalafyengelesha abenafyalo, bakashiwa nangu bamukamfwilwa.’ “Elyo abantu bonse bakasuka abati, ‘Ameni!’ ²⁰ “‘Abe uwalapishiwa uukasendama na bamuka wishi pantu asebanya ubusanshi bwakwa wishi.’ “Elyo abantu bonse bakasuka abati, ‘Ameni!’ ²¹  “‘Abe uwalapishiwa uukasendama ne nama iyili yonse.’ “Elyo abantu bonse bakasuka abati, ‘Ameni!’ ²² “‘Abe uwalapishiwa uukasendama na nkashi yakwe uwafyalwa kuli wishi nangu kuli nyina.’ “Elyo abantu bonse bakasuka abati, ‘Ameni!’ ²³   “‘Abe uwalapishiwa uukasendama na nyinafyala.’ “Elyo abantu bonse bakasuka abati, ‘Ameni!’ ²⁴ “‘Abe uwalapishiwa uukepaya umubiye nangu ni mu bumfisolo.’ “Elyo abantu bonse bakasuka abati, ‘Ameni!’ ²⁵ “‘Abe uwalapishiwa uukapoka amafisakanwa pakuti epailepo umuntu uwakaele.’ “Elyo abantu bonse bakasuka abati, ‘Ameni!’ ²⁶ “‘Abe uwalapishiwa uukakaana ukubika umutima ku mafunde aya yonse no kukanayakonka.’ “Elyo abantu bonse bakasuka abati, ‘Ameni!’”