¹ Kabili Mose atile, “Ilyo mukengila mu calo Yawe Lesa wenu alemupeela nge cacishilano, kabili mwacipoka nokulaikalamo,  ² mukabuule ifisabo fyantanshi fimo pafyo mukasombola mu mushili wa mu calo Yawe Lesa wenu alemupeela. Kabili mukafilonge na mu museke mukafitwale ku ncende Yawe Lesa wenu akasala nge cifulo ce shina lyakwe. ³ Elyo mukatile kuli shimapepo alipo pali iyo nshita, ‘Ine ilelo nasosa kuli Yawe Lesa wandi ukuti ninjisa mu calo ico Yawe alapile ku fikolwe fyesu ukuti akatupeela.’ ⁴ “Shimapepo akapoka umuseke mu minwe yenu no kuubika pa ntanshi ya bulambo bwakwa Yawe Lesa wenu. ⁵ Elyo mukasose amashiwi aya pa cinso cakwa Yawe Lesa wenu amuti, ‘Tata ali mwina Aramu, uwalelulumbafye. Kabili aile kukwikala ku Egupto na bantu abanono, basuka basanduluka baba umushobo uukalamba, uwamaka. ⁶ Lelo abena Egupto baletusunga buluku buluku no kulenga ukuti tucule kukubomba imilimo yacibe. ⁷ Kanshi na ifwe epakulilila kuli Yawe Lesa wa fikolwe fyesu, na Yawe aumfwa ishiwi lyesu, kabili amona no bucushi bwesu, ukutitikishiwa ne milimo yacibe. ⁸ Kanshi Yawe epakutufumya mu Egupto ku maka yakwe ayabulamba no kuboko kwakwe ukwatambalala, ku fipeshamano ne finjelengwe, na kufyakutiinya ifikalamba.  ⁹ Ewatuleta kuli cino cifulo kabili atupeela na cino calo icifumfumukamo umukaka no buci. ¹⁰ Eico nomba nakuletela ifisabo fyantanshi ifya mu mushili uo we Yawe wampeela.’ Ukateke umuseke pa cinso cakwa Yawe Lesa obe elyo ukamupepe no kumupepa.  ¹¹ Kanshi iwe na bena Levi na benafyalo abo mwikala nabo mukasansamukile capamo pa fintu ifisuma ifyo Yawe Lesa obe akupeela pamo na ba mu ŋanda yobe. ¹² “Ilyo mwapwisha ukufumyapo icapekumi pafyo mukasombola fyonse mu mwaka wabutatu, umwaka wa pa cekumi, mukalepeela abena Levi, abenafyalo, bakashiwa na bamukamfwilwa pakuti bakalelya no kwikuta mu misumba yenu.  ¹³ Elyo ukasose kuli Yawe Lesa obe auti, ‘Ine nimfumya mu ŋanda yandi icipande camushilo kabili nincipeela ku bena Levi, ku benafyalo, bakashiwa na kuli bamukamfwilwa, ukulingana ngefyo wakonkomesha. Nshipulile amafunde yobe nangu ukulabapo ifunde limo. ¹⁴ Ine nshalyapo nelyo kamo pa cipande camushilo ilyo naleloosha, nangu ukufumyapo kamo ilyo nali uwakowela, nangu ukutuulapo kamo ku bafwa. Nalibeela Yawe Lesa wandi. Nalicita na fyonse ifyo wankonkomesha.  ¹⁵ Lolesha ukufuma ku mulu, icifulo cobe icamushilo uko waikala, kabili upaale na bantu bobe abena Israeli no mushili uo watupeela ngefyo walaile ku fikolwe fyesu no mulapo, icalo icifumfumukamo umukaka no buci.’ ¹⁶ “Ubushiku bwe lelo Yawe Lesa wenu amukonkomesha ukulakonka amafunde ne fipope ifi. Mulefibaka bwino ne mitima yenu yonse ne myeo yenu yonse.  ¹⁷ Namuisosela ilelo ukuti Yawe e Lesa wenu, mwakulaenda mu nshila shakwe, mwakulasunga ifyebo, ifipope na mafunde yakwe nokuti mwakulamubeela. ¹⁸ Kabili Yawe nao nasosa ilelo ukuti muli bantu bakwe abo acindamika, nokuti muli nokulasunga amafunde yakwe yonse.  ¹⁹ Yawe nasosa ukuti akamucita ukuba abalulumbi, abatashiwa kabili abacindami ukucila imishobo yonse iyo apanga, kabili nokuti mukaba abantu bamushilo abakwa Yawe Lesa wenu ngefyo alaile.”