¹ “Ilyo abantu babili bafilwa ukumfwana, bali nokutwala uyu umulandu ku cilye, na bakapingula bali nokuputula uyu umulandu. Uushili na mulandu bali nokumweba ukuti wakaele, umbi ena ali nokupeelwa umulandu.  ² Uwamulandu nga bali nokumuma ifikoti, kapingula ali nokulalika uyo muntu panshi pakumuma ifikoti pa cinso cakwe, impendwa ukulingana no mulandu acitile. ³ Nomba tabali nakumuma ifikoti ukucila pa makumi yane . Nga fyacilapo kuti munyinenwe asebanina pa menso yenu. ⁴ “Wilakaka ŋombe ku kanwa ilyo ilenyantaula iŋanu pakushisokola.” ⁵ “Nga cakuti bamunyina bekala pamo, elyo umo afwa ukwabula ukufyalapo umwana umwaume, mukamfwilwa talingile kupwa ku muntu umbi uushili wa mu lupwa lwakwa wiba. Munyina wa mulume ali nokumusenda ukuba umukashi wakwe, alebomba ne milimo munyina alebomba.  ⁶ Umwana wantanshi umwaume uo umwanakashi akafyala, ali nokulaitwa ishina lya uyo uwafwa, munyina kwa wishi, pakuti ishina lyakwe likaloba mu Israeli. ⁷ Nomba, nga cakuti munyina akaana ukupa uyo mwanakashi, ali nokuya ku bakalamba pa mpongolo ya musumba no kuya beba ati, ‘Munyina kwa mulume wandi nakaana ukubuula ishina lyakwa munyina mu Israeli. ⁸ Taalemombela ifyo munyina alemombela.’ Abakalamba ba musumba bakete uyu munyina no kulanshanya nankwe. Nga cakuti atwalilila ukusosa ukuti, ‘Nshilefwaya ukumuupa,’ ⁹ mukamfwilwa akamupalamina pa cinso ca bakalamba, akamufule ulusapato lumo, elyo akamufwishile amate ku menso no kusosa ati, ‘Ifi efyo bacita umwaume uwakaana ukulundulula ulupwa lwakwa munyina.’  ¹⁰ Mu calo ca Israeli ishina lya ulo lupwa lwa mwaume bakalalwita abati, ‘Ulupwa Lwakwa Mufulwa Lusapato.’ ” ¹¹ “Nga cakuti abaume babili balelwa, elyo muka umo pa balelwa aisa kukupokolola umulume wakwe ku ulemuma, aikata ku fyamfwalo fya uyo umbi,  ¹² uyo mwanakashi mufwile ukumuputulako icisansa, tecakwesha kumubelela luse. ¹³ “Mwikalakwata fipimino fibili mu mufuko wenu, icafina ne cayanguka.  ¹⁴ Mwikalakwata mu ŋanda yenu ifipimo fya misango ibili, icikulu na kanono. ¹⁵ Mukalekwata ifipimo ifyalingana kabili ifyacishinka, pakuti mukekale inshiku ishingi mu calo Yawe Lesa wenu alemupeela. ¹⁶ Pantu Yawe Lesa wenu alipata umuntu onse uucita ifi fintu mu bucenjeshi bwa uyu musango. ¹⁷ “Mukaleibukisha ifintu abena Amaleki bamucitile mu nshila lilya mwafumine mu Egupto.  ¹⁸ Ilyo mwali abanaka no kufwa ulushile bamukumenye pa bulendo bwenu, balimuwililile kabili baipeye na bonse abali kunuma. Tabali na katiina kuli Lesa. ¹⁹ Kanshi ilyo Yawe Lesa wenu akamulenga ukutuusha ku balwani benu bonse abakamushinguluka mu calo alemupeela ukucipoka cibe icacishilano, muli nokulofya abena Amaleki bonsefye, epakuti kwikaba wakubebukishako pano calo. Tecakwesha kulaba!”