¹ Kabili Mose atile, “Nga cakuti umwaume aupa umwanakashi uushimusekeshe pantu amonamo kamo akabi, elyo alemba kalata wakumulekelapo, apeela no mwanakashi, amutamfya na mu ŋanda yakwe.  ² Kabili nga cakuti afuma mu ŋanda yakwe aya upwa ku mwaume umbi, ³ no mulume wacibili nao amupata, kabili amulembela na kalata wakumulekelapo, amupeela, amutamfya na mu ŋanda yakwe, nangu nga cakuti uyu mulume wacibili afwa, ⁴ lyena ninshi umwaume wapakubala uwamutamfishe tasuminishiwe ukumubwesha nakabili. Pantu balimukowesha. Elyo nga amubwesha, cintu cabipa mu menso yakwa Yawe. Mwikalaleta ububifi pa calo Yawe Lesa wenu ali mukumupeela nge cacishilano.” ⁵ “Nga cakuti umwaume elyo opile, tafwile kuya ku nkondo nangu ukupeelwa umulimo umbi. Pa mwaka umo ali nokulaikalafye pa ŋanda pamwakwe, alesansamusha umukashi wakwe uo opile. ⁶ “Tecakwesha kubuula impelo shonse shibili nangu umwana wa mpelo ukuba icikatilo ca pa nkongole, pantu cimo no kubuula ubumi bwa muntu ukuba icikatilo. ⁷ “Nga cakuti umuntu asangwa mukwiba umwina Israeli munankwe no kumucita umusha, nangu ukumushitisha, uwamwibile wakwipayafye. Efyo mufwile ukulapwisha ububi pakati kenu. ⁸ “Nga ni pa mulandu wa malwele ya fibashi, mukalesakamana ukulacita ngefyo bashimapepo abena Levi bakulamweba. Mufwile ukukonka bwino ifyo nabakonkomesesha. ⁹ Muleibukisha ifyo Yawe Lesa wenu acitile kuli Miriamu mu nshila ilyo mwafumine mu Egupto. ¹⁰ “Ilyo wakongwesha umubiyo icili conse, tecakwesha kuya ingila mumwakwe mu ŋanda kukuya buulamo ico alefwaya ukukupeela nge cikatila mulandu.  ¹¹ Iwe iminina panse no kulolela umwine uo wakongwesha eo ese akupeele. ¹² Nga cakuti umuntu mulanda, wikaya kukusendama ilyo ucili ne cikatila mulandu.  ¹³ Umubweseshe icakufimbana cakwe lintu akasuba takalawa pakuti akwate icakufimbana. Lyena akakutotela. Kabili umulimo ukamoneka uwalungama pa cinso cakwa Yawe Lesa obe ¹⁴ “Wikalacenjelela mubomfi uo waingisha incito umulanda kabili uukabila, nangu engaba mwina Israeli mubiyo, nangufye umwinafyalo uwikala mu musumba wenu umo.  ¹⁵ Cila bushiku ilyo akasuba takalawa uli nokumulipila, pantu mulanda alekabila ayo malipilo yene. Nga taulemulipila kuti akulilila kuli Yawe, nobe ninshi ukakwatilapo umulandu ¹⁷ “Mwikalapoka abenafyalo nangu bakashiwa insambu, nangu ukupokolola mukamfwilwa icakufimbana, pakuba icikatila mulandu.  ¹⁸ Mukaleibukisha ukuti nemwe bene mwali abasha mu Egupto, kabili Yawe Lesa wenu ewamulubwile no kumufumyamo. E mulandu wine namukonkomesesha ukulacita ici. ¹⁹ “Ilyo mulelobolola ifisabo mwibala lyenu, nomba mwalaba umwanshi, mwikabwelelamo kukuya buula. Ifyo fisabo mukalefishila abenafyalo, bakashiwa na bamukamfwilwa pakuti Yawe Lesa wenu akalemupaala mu fintu fyonse ifyo mukalabomba.  ²⁰ Ilyo mulelukusha imiolifa yenu umuku wakubalilapo mwikalabwelela ku misambo ukuyalukusha umuku wabubili no tusheleko. Utusheleko twena mukalelekela abenafyalo, bakashiwa na bamukamfwilwa. ²¹ Ilyo mwapwisha ukusaba ifitwalo fya myangashi mwibala lyenu, mwikalabwelelako no kuya saba utusheleko. Utusheleko twena mukalelekela abenafyalo, bakashiwa na bamukamfwilwa.  ²² Mukaleibukisha ukuti nemwe bene mwali abasha mu Egupto. E mulandu wine namukonkomesesha ukulacita ici.