¹ Kabili Mose atile, “Umuntu onse uo batungula nangu uo baputula ubwaume tafwile kulongana mu lukuta lwa bantu bakwa Yawe. ² “Umwana wa mu cupo icishasuminishiwa nangu aba mu lupwa lwakwe tabali nakulongana mu lukuta lwa bantu bakwa Yawe ukufika na pa nkulo iyalenga ikumi limo. ³ “Takufwile ukuba umwina Amoni nangu umwina Moabu, nangu umukakonkanina aba mu nkulo shabo ukufika na pa nkulo iyalenga ikumi limo, abakasuminishiwa ukulongana mu lukuta lwakwa Yawe.  ⁴ Pantu tabamusengele ne filyo na menshi mu bulendo bwenu ilyo mwafumine ku Egupto. Kabili mu calo ca Mesopotamia balipile Balamu mwana Beori, umwina Peto, pakuti amutipwile. ⁵ Nomba Yawe Lesa wenu taumfwile kuli Balamu, ena epakwalula ukulapisha ukuba amapaalo, pantu Yawe Lesa wenu alimutemwa.  ⁶ Tecakwesha kupangana nabo icibusa inshiku sha bumi bwenu. ⁷ “Mwikalapata umwina Edomu pantu ni munyinenwe. Kabili mwikalapata umwina Egupto pantu mwaikele nga benafyalo mu calo cakwe. ⁸ Abana babo bakafyalwa ukufuma pa nkulo yalenga butatu, bena kuti balalonganako mu lukuta lwa bantu bakwa Yawe.” ⁹ “Pa nshita ya nkondo na balwani benu, ilyo mukalaba mu nkambi, mukaletaluka kuli fyonse ifyakowela.  ¹⁰ Nga cakuti umo pa baume akowela pa mulandu wakupemena panshi ku tulo ubushiku, alingile ukufumina kunse ya nkambi eko aya ikala. ¹¹ Ilyo caba icungulo ali nokowa, akasuba cilya kawa lyena kuti abwelela ku nkambi. ¹² “Mukasale incende imo kunse ya nkambi eko mukaleya ku cimbusu.  Pa fibombelo fyenu mulekwatapo icakwimbilako. ¹³ Kabili ilyo mwayafwilisha, mukaleimba icilindi umwakushiika ubusali bwenu.  ¹⁴ Pantu Yawe Lesa wenu alendauka mu nkambi pakumucingilila no kuposa abalwani benu mu minwe yenu. Inkambi yenu ili nokuba iyamushilo, pakuti Yawe elamona pakati kenu icintu conse icansoni icingalenga ukumutaluka.” ¹⁵ “Nga cakuti umusha abutukila kuli imwe mwimubweseshamo kuli shikulu wakwe.  ¹⁶ Mulekeni ekale na imwe konse uko atemwa kabili mu musumba umwine alasala. Mwikalamucusha iyoo. ¹⁷ “Kwikalaba umwaume nangu umwanakashi umwina Israeli uwakuba cilende wa ku mfuba. ¹⁸ Ulupiya ulo cilende umwaume nangu umwanakashi akwila telwakwesha kutwala mu ŋanda yakwa Yawe Lesa wenu pakufuta pafyo balaile, pantu Yawe Lesa wenu alibapata bonse babili. ¹⁹ “Wikalafwaya kulundapo pafyo munonko akongola pa ndalama, ifyakulya nangu pa fintu fimbi ifyo wingamwenapo nga wakongwesha.  ²⁰ Umwinafyalo ena kuti alundapo pafyo akukongola, nomba umwina Israeli mubiyo ena iyoo, pakuti Yawe Lesa wenu akalemupaala muli fyonse ifyo mukalacita mu calo mwalaingilamo mukucipoka. ²¹ “Nga cakuti walaya kuli Yawe Lesa obe, wikalashingashinga pakucita ico walaya. Pantu Yawe Lesa obe mu cinefye akacifwaya, kabili ninshi ukaba no mulandu wabubifi.  ²² Lelo nga cakuti wakaana ukulaya, ninshi taukwete mulandu.  ²³ Conse ico walanda, ushininkishe ukuti wacicita. Pantu walaile ukwabula ukupatikishiwa kuli Yawe Lesa obe, walandile na kanwa kobe. ²⁴ “Nga cakuti waingila mwibala lya myangashi ilya mwina Israeli mubiyo, kuti walyamo ifitwalo fya myangashi apo utemenwe, nomba tecakwesha kulonga fimo mu cipe.  ²⁵ Nga cakuti waingila mwibala lya ŋanu ilya mubiyo, kuti watimpulamo imisonso iyo ulefwaya ku minwe walya. Lelo tecakwesha kuseepa iŋanu ku cikwakwa.”