¹ “Nga wamona iŋombe atemwa impaanga iya mwina Israeli mubiyo ileendaukafye icende ende, wiilekafye, ulingile ukumutwalila.  ² Ngo mwine teshibikwe atemwa ekala ukutali, uli nokuitwala kumobe. Ilyo umwine aisa alefwaya fwaya, uli nokumupeela. ³ Efyo uli nokucita nga wasanga punda, nangu icakufwala nangu icili conse ico umwina Israeli mubiyo alufishe. Wilasuulakofye iyoo. ⁴ “Nga wamona punda atemwa iŋombe ya mwina Israeli mubiyo naiwa pa musebo. Wilasuulakofye iyoo. Ulingile ukumwafwilishako ukuimya. ⁵ “Abanakashi bekalafwala fyakufwala fya baume, abaume nabo bekalafwala fyakufwala fya banakashi. Pantu uyo onse uucita ifya uyu musango, camuselu pa menso yakwa Yawe Lesa wenu. ⁶ “Nga wasanga icisansala ca cuni mumbali ya musebo, nangu ku muti nangu panshi, na nyina nafukatila amani nangu utwana. Wikasenda nyina pamo no twana.  ⁷ Kuti wasendapofye utwana, nyina ena wamulekafye aya, epakuti cikakuwamine kabili ukaleikala inshiku ishingi. ⁸ “Ilyo wakuula iŋanda iyipya, mumbali mukalekuulamo icibumba icakucingililako umutenge. Lyena umuntu nga apona no kufwa afwa, awe iwe tawakakwatilepo mulandu. ⁹ “Wikalabyalamo mwibala lyobe imbuto sha misango ibili. Nga cakuti wacita ifi ninshi ifilimwa fya kuli ishi mbuto pamo pene ne fitwalo fyonse fya mwibala ili fili nokukowela. ¹⁰ “Pakulima, wikalima na pulao naukakila punda ne ŋombe mwikoli limo line. ¹¹ “Wikalafwala nsalu iyapikulwa no bushishi bwa misango ibili ubwa masako no bwa butonge. ¹² “Ku fisempe fyonse fine ifya nsalu shobe ukalebikako insenkebele.” ¹³ “Nga cakuti umwaume aupa umwanakashi, kabili panuma yakusendama nankwe amupata,  ¹⁴ elyo amubepesha mufyo ashacita no kumutunganya ukukanaba nacisungu, ati, ‘Naupile uyu mukashana, lelo ilyo nasendeme nankwe, nshasangile icishininkisho ca bunacisungu bwakwe.’ ¹⁵ Ifi nga efyo caba, lyena wishi na nyina ba mukashana bali nokuleta icishininkisho ca bunacisungu bwakwe ku ntungulushi sha mu musumba pa mpongolo. ¹⁶ 16Wishi kwa mukashana ali nokulanda ku ntungulushi ati, ‘Ine naufishe umwana wandi kuli uyu mwaume nomba namupata.  ¹⁷ Elyo namutunganya no kusosa ukuti, “Ine nshasangile umwana wenu ukuba nacisungu.” Lelo ici e cakushininkishishako icisungu ca mwana wandi.’ Elyo abafyashi bakwe bakafungulule insalu pa cinso ca ntungulushi sha mu musumba. ¹⁸ Elyo intungulushi sha mu musumba shikabuule uyu mwaume no kumukanda.  ¹⁹ Bakalipilishe umwaume amashekeli ya silifa umwanda umo, bakapeele wishi kwa mukashana. Pantu asebanya umukashana umwina Israeli pa lwalala. Kabili umwaume tali nakuleka ulya mukashana, mukashi wakwe mpaka imfwa. ²⁰ “Nomba, nga cakuti cacine, kabili takuli na cakushininkishishako ukuti umukashana ali ni nacisungu,  ²¹ lyena kuti batwala uyo mukashana pa mwinshi wa ŋanda yakwa wishi, epo abaume ba mu musumba wakwe bakamulase amabwe mpaka akafwe. Pantu nacita icamusebanya mu Israeli pakusendama no mwaume ilyo talati opwe, acili mu ŋanda yakwa wishi. Efyo mufwile ukufumya ububi pakati kenu. ²² “Nga cakuti mwasangilisha umwaume nasendama na muka mwine, bonse babili, umwaume uwasendama no mwanakashi elyo no mwanakashi wine bafwile ukufwa. Efyo mufwile ukufumya ububi pakati ka Israeli. ²³ “Nga cakuti mu musumba umwaume akumanya nacisungu uwakobekelwa, elyo asendama nankwe, ²⁴ bonse babili mukalebatwala pa mpongolo ya musumba no kubalasaula amabwe mpaka bafwa. Pantu umukashana ali mu musumba, kabili tapundile mutuule, nao umwaume pantu aonaula icupo ca mwine. Efyo mufwile ukufumya ububi pakati kenu. ²⁵ “Nomba nga cakuti umwaume mu mpanga emo akumanya umukashana uwakobekelwa, amwikata pa bukangalume no kulala nankwe, lyena umwaume eka uwacita ici euli nokufwa. Umukashana ena mwimucita nangu cimo, pantu tacitile bubifi ubwakumwipailapo. ²⁶ Uyu mulandu uli kwati muntu uwaimina umuntu mubiye no kumwipaya.  ²⁷ Uyu mwaume asangile umukashana mu mpanga. Nangu line uyu umukashana uwakobekelwa apundile, takwali uwakumupokololako. ²⁸ “Nga cakuti umwaume akumanya nacisungu uushakobekelwa, amwikata ku bukangalume, alala nankwe elyo babasangilisha,  ²⁹ ali nokulipila wishi kwa mukashana amashekeli ya silifa amakumi yasano. Afwile ukuupa umukashana pantu namonaula pakusendama nankwe. Kabili umwaume tafwile ukumuleka mpaka imfwa. ³⁰ “Umwaume tafwile ukuupa muka wishi. Tafwile kusebanya busanshi bwakwa wishi.”