¹ Kabili Mose atile, “Nga cakuti mwasanga umuntu nabamwipaya, alele mu mpanga, mu calo ico Yawe Lesa wenu alemupeela ukucipoka, nomba uwamwipaya teshibikwe.  ² Intungulushi shenu na bakapingula bali nokuya pima ubutali ukufuma apabelele icitumbi ukuya fika na ku misumba iyili mupepi. ³ Kanshi intungulushi sha mu musumba uupalamishe pa ncende pali icitumbi shikabuule umusepela wa ŋombe iyikota, uushatala aubombapo nangu ukufwala ikoli mu mukoshi.  ⁴ Bakaleutwala mwishika umushatala amulimwa nangu ukubyalwamo kabili ukuli umumana uulepisha amenshi. Mwishika mwine mulya emo bakafunine uyo umusepela wa ŋombe umukoshi. ⁵ Bashimapepo, abana baume bakwa Levi bakapalame, pantu Yawe Lesa wenu alibasala pakuti ebo balebomba no kulapaala amapaalo mwishina lyakwa Yawe no kupingula imilandu yonse palwa fikansa na palwa kucenana. ⁶ Elyo intungulushi shonse isha mu musumba uupalamishe pa ncende pali icitumbi, shili nokusamba iminwe pa mulu wa musepela wa ŋombe uyo bafunine umukoshi mwishika,  ⁷ no kulasosa ashiti, ‘Te minwe yesu yasumishe uyu mulopa, kabili na menso yesu tayamwene uko calecitika. ⁸ Belela uluse abantu bobe abena Israeli abo walubula, we Yawe, elyo witupeelelapo mulandu pa mfwa ya muntu wakaele.’ Kabili no mulopa ukafutila pa fyabubifi.  ⁹ Kanshi efyo mukafumya pakati kenu umulandu wa kusumya konse ukwa mulopa wakaele, pantu namucita icalungama pa cinso cakwa Yawe.” ¹⁰ “Ilyo mwaya kukulwisha abalwani benu, na Yawe Lesa wenu alenga ukuti mucimfye mu nkondo no kusenda bankole.  ¹¹ Nga wamonapo nkole umo umwanakashi umusuma nganshi uo watemwa, kuti wamubuula ukuba umukashi obe.  ¹² Uyo mwanakashi umusende kumobe, abeye ne mishishi, asembe ne ngala, ¹³ elyo afuule ifyakufwala fya bunkole. Panuma yakwikala mu ŋanda umweshi utuntulu no kuloosha wishi na nyina, lyena kuti wamuupa waba umulume nao aba umukashi.  ¹⁴ Nomba nga takusekeshe, lyena muleke aye konse uko engatemwa ukuya. Tauli na kumushitisha, nangu ukumucita ngo musha, pantu wamupatikishafye pakulasendama nankwe. ¹⁵ “Nga cakuti umwaume umo ali na bakashi babili, atemwapo umo umbi iyoo, elyo bonse babili bamufyalila abana abaume. Elyo ibeli lyafyalwa mu mukashi ashatemwa.  ¹⁶ Ilyo uyo muntu alefwaya ukwakanya ifyuma ku bana, tafwile nakuba na mucishacinani, tafwile kupeela ifyuma fye beli ku mwana uwa mukashi uo atemwa.  ¹⁷ Pakupeela umwana wakwe uwe beli fyuma, alingile ukucishapo imiku ibili pali munyina. Nangu line tali mwana wa mu mukashi uo atemwisha. Pantu ibeli elyo ailangilepo amaka. Kanshi insambu ne cuma cine icabubeli, cakwe ¹⁸ “Nga cakuti umuntu umo alikwata umwana uwatalama kabili cintomfwa, umwana uushumfwila bafyashi bakwe, nangufye bamukande shani.  ¹⁹ Abafyashi bakwe, wishi na nyina bali nokumutwala ku ntungulushi sha mu musumba pa mpongolo ya musumba wakwe. ²⁰ Abafyashi balaeba intungulushi abati, ‘Uyu mwana wesu ni cintomfwa, kabili alitutalamina. Takonka nefyo tumweba kabili ni cakolwa.’  ²¹ Elyo abaume bonse aba mu musumba wenu bamupole amabwe imfwila. Lyena mukalapwisha ubo bubi pakati kenu. Umuntu onse mu calo ca Israeli ilyo akomfwako akalatiina.” ²² “Umuntu nga acita umulandu ukulu nganshi, bamwipailapo, bakulikila icitumbi cakwe na ku muti,  ²³ icitumbi cakwe tacili nakulala ku cimuti iyoo. Mufwile ukucishiika ubo bwine bushiku, pantu umuntu uwakulikwa pa cimuti ninshi alitipwa kuli Lesa. Mukaleshiika ifitumbi epakukanakowesha icalo Yawe Lesa wenu ali mukumupeela.