¹ Kabili Mose atile, “Ilyo mukalaya ku nkondo kukulwisha abalwani benu, elyo mwamona bakabalwe na maceleta ne bumba lya fita ilikulu ukumucila, tecakwesha kubatiina. Pantu Yawe Lesa wenu, uwamufumishe mu Egupto, akalaba na imwe. ² Ilyo tamulati mutendeke ukulwa, shimapepo akaleisa kukulanda ne fita.  ³ Akalesosa ati, ‘Umfweni, mwebena Israeli! Ilelo muleya ku nkondo kukulwisha abalwani benu. Tecakwesha kubatiina nangu ukufupuka, mwikwata umwenso nangu ukutunsha imitima pa menso ya balwani benu. ⁴ Pantu Yawe Lesa wenu muleya nankwe, akulamulwishishako kabili aleya lenga ukuti muye cimfya.’ ⁵ “Elyo bakangalila ba fita fyankondo bakalanda ku fita ati, ‘Bushe palipo umuntu uukuulile iŋanda ipya, lelo tailapaalwa? Nabwelele kumwakwe, epali aya fwila mu nkondo, elyo no muntu umbi eo akalenge ikapaalwe. ⁶ Bushe palipo umuntu uulimbile imyangashi mwibala, iyo talatampa kulyako? Nabwelele kumwakwe, epali aya fwila mu nkondo, elyo no muntu umbi eo akashale alelyako. ⁷ Bushe palipo umuntu uwakobekela umwanakashi, uo ashilaupa? Nabwelele kumwakwe, epali aya fwila mu nkondo, elyo no muntu umbi eo akashale amuupa.’ ⁸ “Kabili bakangalila ba fita fyankondo bakalakonkanyapo ukweba ifita ati, ‘Bushe pano tuli palipo umuntu uuletiina nangu ukufupuka? Nga epo ali nabwelele kumwakwe, epali aya fupula abanankwe.’  ⁹ Nga bakangalila ba fita fyankondo bapwa ukulanda ku fita, bafwile ukusonta abakalamba ba fita. ¹⁰ “Nga mwalaya kukulwisha umusumba, abena musumba kuti mwabatumina amashiwi yakubepusha nga balefwaya icibote.  ¹¹ Nga cakuti basumina, baisula ne mpongolo shabo, bonse bali nokubafye abasha benu, kabili bali nokulabombela imwe umulaasa. ¹² Nomba nga bakaana icibote, babusha ne nkondo, ninshi mushinguluke uyo musumba.  ¹³ Ilyo Yawe Lesa wenu alenga ukuti mupoke uyo musumba, imwe mukaleipaya bonse abaume ababamo. ¹⁴ Nomba kuti mwaisendelamo abanakashi, abaice ne fitekwa, elyo na fyonse ifyaba muli uyo musumba nge fitapwa. Kuti mwalabomfya ifintu fyonse ifyo mwatapa ku balwani benu, pantu ni Yawe Lesa wenu ewamupeele.  ¹⁵ Ifi efyo mukalecita ku misumba yonse iyikaba ukutali na imwe, iyishili ya mishobo imbi mupepi. ¹⁶ “Nomba mu misumba iyaba mu calo Yawe Lesa wenu alemupeela nge cacishilano, mukaleipayamo fyonse ifipema.  ¹⁷ Mukapeele bonsefye kukonaulwa, abena Hiti, abena Amoli, abena Kenani, abena Peresi, abena Hifi na bena Yebusi, ngefyo Yawe Lesa wenu amukonkomeshe. ¹⁸ Pantu limbi, kuti bamusambilishako ukukonka imisango yabo yonse iyabipisha iyakupepelamo imilungu yabo. Na imwe ninshi mwabifya kuli Yawe Lesa wenu. ¹⁹ “Ilyo mwashinguluka umusumba pa nshita iyitali, mwalwisha pakuti muupokolole, mwikalaonaula miti mukukomaulamo amasembe, pantu kuti mwalyako ifitwalo fyauko. Mwikalaitema iyoo. Bushe imiti ya mu mabala bantu abakuti mushinguluke?  ²⁰ Lelo kuti mwatema imiti iyo mwishibe ukuti teyafitwalo, kuti mwaibomfya ilyo muleshinga umusumba mulelwisha mpakafye mwaupoka.”