¹ Kabili Mose atile, “Ilyo Yawe Lesa wenu akalofya imishobo ya bene ba calo ali nokumupeela, kabili ilyo mukabafulumunamo no kwikala mu misumba yabo na mu mayanda yabo,  ² mukapatulepo imisumba itatu iyaba pakati ka calo Yawe Lesa wenu ali nokumupeela ukucipoka.  ³ Mukapangileko imisebo, kabili mukakanya mu fiputulwa fitatu icalo Yawe Lesa wenu ali nokumupeela nge cacishilano. Epakuti onse uwaipaya umuntu mubiye eko abutukila. ⁴ Ili e funde pa muntu uwaipaya umuntu mubiye ukwabula umufulo kabili ukwabula impatila yakale, elyo abutukila kuli iyi misumba pakupususha ubumi bwakwe.  ⁵ Tutile, abantu babili nga baya mu mpanga mukuteta ifimuti, elyo pakusunsha isembe lilya aletema, lyasokoka, lyakoma no munankwe, afwa no kufwa. Uyo muntu kuti abutukila mu musumba wa musango uyu, lyena ninshi apusuka ⁶ Epali kalandula wa mulopa amukonka mu cipyu, amusanga pantu umusumba wakubutukilako uli ukutali nganshi, kabili amwipaya, nelyo ashilingile kufwa, nangu ulya muntu aipeye umunankwe ukwabula impatila yakale.  ⁷ E mulandu wine namukonkomesha ukuti mukwatepo imisumba itatu iyakubutukilako. ⁸ “Lesa akamupeela icalo conse ico alaile ifikolwe fyenu nga mwalakonka bwino amafunde yonse aya namukonkomesha ilelo, ukutemwa Yawe Lesa wenu no kulaenda lyonse mu nshila shakwe. ⁹ Nomba nga Yawe Lesa wenu akushishako icalo cenu, ngefyo alaile no mulapo ku fikolwe fyenu, lyena mukapatulepo imisumba na imbi itatu. ¹⁰ Mukalecita ici pakuti umulopa wakaele wikalasuma mu calo cenu, ico Yawe Lesa wenu ali nokumupeela nge cacishilano. Kabili epakuti mwikakwata mulandu wakusumya umulopa. ¹¹ “Nomba nga cakuti umuntu alipata umubiye, kabili amubelamina, amusansa, amwipaya no kumwipaya, elyo abutukila ku musumba umo pali ilya itatu, ¹² lyena abakalamba ba mu musumba wakwe bakatume abakuya mubwesha kuli ulya musumba no kwisa mulubwila kuli kalandula wa mulopa, pakuti nao amwipaye.  ¹³ Mwikalamukwatila luse. Kanshi mufwile ukufumya umulandu wakusumya umulopa wakaele mu Israeli, epakuti cikalemuwamina ¹⁴ “Mwikalasesha amabwe ya mipaka ya banenu, iyapiminwe kale na bantu babalilepo mu calo ico Yawe Lesa wenu ali nokumupeela ukucipoka.” ¹⁵ “Kambone umo tekuti ashinine umuntu uupeelwe umulandu uuli onse nangu icilubo ico nalimo acicita. Pakuti kube ukupeela umulandu, kano kwaba bakambone babili nangu batatu abakushininkisha.  ¹⁶ Nga cakuti kambone walufyengo aiminina pakubepesha umuntu umulandu, ¹⁷ bonse babili abali mu mulandu bali nokwiminina pa cinso cakwa Yawe pantanshi ya bashimapepo na bakapingula abakabapo pali iyo nshita. ¹⁸  Bakapingula bakafwailishe umulandu bwino. Kabili nga basanga ukuti kambone wabufi, alebepesha umunankwe, ¹⁹ ninshi uyo kambone wabufi mumucitile ifyo acilafwaya umunankwe bamucitile. Kanshi efyo mufwile ukufumya ububi pakati kenu. ²⁰ Ilyo bonse bakomfwako, bakalatiina, kabili takwakabe nangu umo uukabwekeshapo ukucita nakabili icintu icabipa ifyo pakati kenu. Mwikalakwata luse iyoo. ²¹ Mukalelinganyafye ubumi pa bumi, ilinso pa linso, ilino pa lino, icisansa pa cisansa, ulukasa nalo pa lukasa.”