¹ Kabili Mose atile, “Bashimapepo abena Levi, emukuti uluko lwakwa Levi lonse, bena tabakakwatemo citungu nangu icacishilano mu Israeli. Bena bakalalyafye imituulo na malambo yakoca ifikatuulwa kuli Yawe. Pantu ici e cacishilano cabo.  ² Tabakakwate icacishilano muli bamunyina, lelo Yawe e cacishilano cabo ³ “Ici e cakaniko cili nokupeelwa kuli bashimapepo ukufuma ku bantu abaleka cilume wa ŋombe nangu impaanga, ukuboko, inshetelo elyo ne fyamumala. ⁴ Mukalebapeela ifisabo fyantanshi ifya ŋanu shenu no mwangashi upya na mafuta ya miolifa, elyo na masako ya mpaanga ayakubalilapo.  ⁵ Pantu Yawe Lesa wenu alibasala pamo ne ndupwa shabo ukufuma mu nko shenu shonse pakuti baleiminina no kubomba mwishina lyakwa Yawe inshiku shonse. ⁶ “Ngo mwina Levi afuma mu musumba wenu umo uwa mu Israeli umo ekala, aisa mukuitemenwa umwine ku ncende iyo Yawe akasala,  ⁷ kuti abomba umulimo wa bushimapepo mwishina lyakwa Yawe Lesa wakwe nga bena Levi bambi ababombela kulya kwine pa cinso cakwa Yawe.  ⁸ Ali nokupeelwako ifyakaniko ukulinganafye na bashimapepo bambi, nangu engapokelela ulupiya lwafuma mukushitisha ifyuma fya lupwa.” ⁹ “Ilyo mukafika mu calo ico Yawe Lesa wenu alemupeela, mwikalakonkelela imicitile iyapatwa iya mishobo ya kulya.  ¹⁰ Pekasangwa nangu umo pakati kenu uwakuleka umwana wakwe umwaume nangu umwanakashi nge lambo lyakoca mu mulilo, ababuka imbuko, abakuuta imipashi, abapendula, abaloshi,  ¹¹ abalanda amashiwi ya filayi, abepusha abawilwa nangu imipashi, atemwa abepusha imipashi ya bafwa. ¹² Onse uucita ifi fintu ifyamakankamike alipatwa kuli Yawe. Ni pa mulandu wa iyi micitile yamuselu, Yawe Lesa wenu akafulumwina ilya mishobo pa ntanshi yenu. ¹³ Kanshi imwe mufwile ukuba abapwililika pa cinso cakwa Yawe Lesa wenu.” ¹⁴ “Imishobo iyo imwe mwalapokolola icalo yumfwila ku bakuuta imipashi na kuli bakabuka wa mbuko. Nomba imwe, Yawe Lesa wenu alimubinda ukulacita ifi fintu. ¹⁵ Kanshi Yawe Lesa wenu akamwimisha kasesema nga ine ukufuma pali bamunyinenwe. Mukalemumfwila uyo wine.  ¹⁶ Pantu ici eco mwalombele kuli Yawe Lesa wenu ku Holebu ubushiku mwalongene ilyo mwatile, ‘Tekuti tumfwe ishiwi lyakwa Yawe Lesa wesu nangufye ukumona umulilo ukalamba nakabili, pantu kuti twafwa.’ ¹⁷ “Kanshi Yawe epakunjeba ati, ‘Ifyo abo bantu balanda nafilungama.  Ine nkabemisha kasesema nga iwe ukufuma pali bamunyinabo. ¹⁸ Ine nkalamweba ifyakulanda, kabili eukalaeba abantu fyonsefye ifyo nkalakonkomesha.  ¹⁹ Nga cakuti umo akaana ukumfwila amashiwi kasesema akalanandilako, uyo muntu wena ine nkamupeela umulandu. ²⁰ Lelo kasesema nga apamafye ukulanda mwishina lyandi ifyo ine nshimukonkomeshe ukulanda, nangu kasesema uwalandila mwishina lya milungu imbi, afwile ukwipaiwa.’ ²¹ “Limbi kuti mwasosa mwe bene amuti, ‘Kuti twaishiba shani amashiwi ayashisoselwe na Yawe?’ ²² Nga cakutila kasesema alandila mwishina lyakwa Yawe elyo ifyo asosele taficitike nangu tafifikilishiwe, ninshi te mashiwi yakwa Yawe ayo alandile. Kasesema uyo aitendekefye. Tecakwesha kumutiina iyoo.”