¹ “Mwilalekela Yawe Lesa wenu ilambo lya ŋombe nangu impaanga iyalemana nangu iyaba na kalema akali konse, pantu fintu fyapatwa kuli Yawe. ² “Nga cakuti umwaume umo nangu umwanakashi umo, uwikala mu musumba uuli onse Yawe alamupeela, asangwa mukucita icabipa pa cinso cakwa Yawe Lesa wenu pakonaula icipangano,  ³ elyo mukukanakonka amafunde yandi apepa imilungu imbi, alatufukamina, nangu alapepa akasuba, umweshi nangu intanda sha mu mulu. ⁴ Ilyo ici caishibikwa kuli imwe, lyena mukalefwailisha bwino umulandu. Nga cakuti cacine ico cintu cabipa calicitika mu Israeli, ⁵ mukafumishe kunse ya mpongolo yenu uyo mwaume nangu umwanakashi, mukamulase amabwe mpakafye akafwe.  ⁶ Umuntu pakumwipaya kano bakambone bali babili nangu batatu ebamushinina, nomba nga kambone ali umofye lyena takuli kumwipaya.  ⁷ Bakambone ebafwile ukubalilapo ukumupola amabwe pakumwipaya, elyo bonse abantu bakakonkepo. Kanshi efyo mufwile ukufumya ububi pakati kenu. ⁸ “Nga cakuti kwaba imilandu iyaletwa ku filye fyenu iyingamukosela ukupingula, kuti yaba yakwipaya umuntu, nangu palwa cuma ca muntu kumo ne nsambu shakwe, nangu palwa kucenana ifilonda, mukaletwala iyi milandu ku ncende iyo Yawe Lesa wenu akasala.  ⁹ Mukaleya kuli bashimapepo abena Levi na kuli kapingula uukabapo pali iyo nshita. Mukalebepusha, nabo bakalamweba ubupingushi. ¹⁰ 10Mukalecita ukulingana nefyo ubupingushi buli pa ncende iyo Yawe akasala. Mube abacenjela mukucita fyonse ifyo bamwebele.  ¹¹ Mukalecita ifintu ukulingana na mafunde bamufunda kabili no kukonka bwino ubupingushi. Mwikalafuma kufyo bamweba, ukuya ku kulyo nangu ku kuso. ¹² Umuntu onse uwacita imisuula pakukanaumfwila bakapingula nangu shimapepo uuletumika Yawe Lesa wenu, wena wakwipayafye. Kanshi efyo mufwile ukufumya ububi mu Israeli.  ¹³ Abantu bonse bakomfwako no kutiina, lyena tabakacite imisuula nakabili.” ¹⁴ “Ilyo mukengila mu calo ico Yawe Lesa wenu alemupeela, kabili mwacipoka, mwalaikalamo, elyo mukatile, ‘Katuikwatile imfumu iyakututeeka pamo nge mishobo imbi iyatushinguluka.’ ¹⁵ Mukaleshininkisha ukuti umuntu uo mwasonta ukuba imfumu yakumuteeka ni Yawe Lesa wenu eumusalile. Afwile afuma muli bamunyinenwe. Tecakwesha kubuula umwinafyalo ukumuteeka uushili mwina Israeli. ¹⁶ Iyo mfumu taili nakuikwatila bakabalwe abengi nganshi, kabili taili nakutuma abantu ku Egupto kukufwailapo bakabalwe na bambi. Pantu Yawe alimweba ati, ‘Mwikatala amubwelelako nakabili.’  ¹⁷ Iyo mfumu taifwile kukwata abakashi abengi, pantu kuti yatalama. Kabili taifwile kukwata silifa na golide uwingi nganshi. 1 ¹⁸ Ilyo aba pa bufumu, ali nokuilembela umwine mu citabo aya mafunde. Akayambule ukufuma mu citabo cisungwa na bashimapepo abena Levi.  ¹⁹ Imfumu ikabe naco, kabili ikalecibelengamo inshiku shonse isho ikekala pa calo. Epakuti ikasambilile ukuba na katiina kuli Yawe Lesa waiko, ikalekonka bwino amashiwi ya aya mafunde nefi fipope fyonse. ²⁰ Kabili ici cikalenga iyo mfumu ukukanaitutumuna pali bamunyina abena Israeli, no kufuma ku mafunde ukuya ku kulyo nangu ku kuso. Lyena iyo mfumu pamo na ba mu lupwa lwaiko bakalateeka pa bufumu bwa bena Israeli inshita ntali.”