¹ Kabili Mose atile, “Mukalebaka umweshi wa Abibu no kusefya Ipasaka lyakwa Yawe Lesa wenu, inshikunkulu ya Cakucilila, pantu Abibu e mweshi amufumishemo mu calo ca Egupto pa nshita ya bushiku.  ² Mukaleleka ilambo nge Pasaka kuli Yawe Lesa wenu ilya nama ukufuma pa mpaanga nangu imbushi shenu pa ncende iyo Yawe akasala nge cifulo ce shina lyakwe. ³ Mwikalalya iyo nama kumo ne mikate iyatutumuka, lelo mukalelya imikate iyishatutumuka pa nshiku cine lubali, e mikate ya mu bucushi, pantu mwafumine mu lubilo mu calo ca Egupto, epakuti inshiku shonse isha bumi bwenu mukaleibukisha inshita mwafumine mu Egupto.  ⁴ Pa nshiku cine lubali mwikalasangwa intutumushi mu calo cenu conse. Mwikalaleka inama mwalekela ilambo pa bushiku bwakubalilapo icungulo ishaleko mpaka ulucelo. ⁵ “Mwikalalekela ilambo lye Pasaka mu musumba uuli onse Yawe Lesa wenu alemupeela,  ⁶ kanofye pa ncende iyo Yawe Lesa wenu akasala nge cifulo ce shina lyakwe. Epantu mukalalekela ilambo lye Pasaka mu cungulo, ilyo akasuba kawa, pakwibukisha inshita ilya ine mwafuminepo mu Egupto. ⁷ Muli nokoca inama no kuilya pa ncende ine Yawe Lesa wenu akasala. Elyo akacelo mwabwelelamo ku matenti yenu.  ⁸ Pa nshiku mutanda mukalelya imikate iyishatutumuka, nomba pa bushiku bwalenga cine lubali mukalelongana pamo pakucindika Yawe Lesa wenu, kabili mwikalabombapo imilimo iyoo.” ⁹ “Mukalependa imilungu cine lubali ukufuma ubushiku mwatampa ukulobolola iŋanu.  ¹⁰ Elyo mukalesefya inshikunkulu ya milungu, iyakucindikilamo Yawe Lesa wenu, pakumuletela umutuulo wakuitemenwafye ukulingana ne paalo ilyo amupaala. ¹¹ Kabili mukalesansamuka pa cinso cakwa Yawe Lesa wenu, pa ncende iyo Yawe Lesa wenu akasala nge cifulo ce shina lyakwe. Mukalesansamukila pamo imwe, abana benu abaume na banakashi, ababomfi benu abaume na banakashi, na bena Levi abaikala mu misumba yenu, kabili na benafyalo, bakashiwa, na bamukamfwilwa abo mwikala nabo.  ¹² Muleibukisha ukuti mwali abasha mu calo ca Egupto, kanshi mulekonka bwino aya mafunde ¹³ “Mulesefya inshikunkulu ya Nsakwe pa nshiku cine lubali ilyo mwapwisha ukututila iŋanu, elyo no kukama ifitwalo fya myangashi.  ¹⁴ Mukalesansamuka mu nshikunkulu shenu, imwe, abana benu abaume na banakashi, ababomfi benu abaume na banakashi, abena Levi, abenafyalo, bakashiwa na bamukamfwilwa abekala mu misumba yenu. ¹⁵ Pa nshiku cine lubali mukalesefya inshikunkulu mukucindika Yawe Lesa wenu, pa ncende iyo Yawe akasala. Pantu Yawe Lesa wenu akamupaala mu busomboshi bwenu ne milimo ya maboko yenu, elyo ne nsansa shenu shikaba ishapwililika. ¹⁶ “Abaume benu bonse bali nokuya monekela pa cinso cakwa Yawe Lesa wenu imiku itatu pa mwaka pa ncende iyo akasala, emukuti, Inshikunkulu iyakulyamo Imikate Iyishatutumuka, Inshikunkulu ya Milungu elyo ne nshikunkulu ya Nsakwe. Takuli mwaume wakumonekela pa cinso cakwa Yawe iminwe nkutwa.  ¹⁷ Cila muntu ali nokusenda icabupe ukulingana ngefyo Yawe Lesa wenu amupaala.” ¹⁸ “Mukasonte abapingushi na bacilolo ba cila luko mu misumba Yawe Lesa wenu akamupeela, ebakalapingwila abantu no mulinganya. ¹⁹ Bekalacita lufyengo pakupingwila, bekalacita mucishacinani, kabili bekalapoka mafisakanwa. Pantu amafisakanwa yapofwisha abamano amenso, kabili no kupondamika amashiwi ya balungami.  ²⁰ Mukalecita umulinganya, umulinganya wekafye, epakuti muleenda abomi, mukapoke ne calo Yawe Lesa wenu alemupeela.” ²¹ “Nga mwakuulila Yawe Lesa wenu ubulambo, tecakwesha kushimpa mumbali uluceshi lwa cimuti ulwa mulungu Ashera.  ²² Kabili mwikalakuulapo luceshi lwa mabwe bacindikisha, pantu fyonse ifi Yawe Lesa wenu alifipata.