¹ 1Kabili Mose atile, “Ilyo aya mapaalo yonse no kulapisha konse uko mbikile pali imwe nga kwamufikila, elyo mukaleibukisha mu mitima yenu konse ku mishobo uko Yawe Lesa akamupashila.  ² Kabili imwe na bana benu kuti mwabwelela kuli Yawe Lesa wenu, no kulamubeela ne mitima yenu yonse ne myeo yenu yonse ukulingana na fyonse ifyo namukonkomesha ilelo. ³ Elyo Yawe Lesa wenu akamukwatila uluse no kumubwesesha ishuko lyenu, elyo nokumubwesha ukufuma mu mishobo amupashilemo. ⁴ Nangufye cakuti mwasalanganina ukwapelela isonde pesamba lya kasuba, ukufuma kulya Yawe Lesa wenu akamubwesha no kumukolonganya pamo.  ⁵ Yawe Lesa wenu akamubwesha mu calo icali ca fikolwe fyenu no kucipoka cikabe cenu. Kabili akamulenga ukuba abakankala no kusanda ukucila pa fikolwe fyenu. ⁶ Yawe Lesa wenu akasembulula imitima yenu, ne mitima ya ndupwa shenu, pakuti mukalemutemwa ne mitima yenu yonse ne myeo yenu yonse, elyo mukaba no bumi.  ⁷ Yawe Lesa wenu akalwila ukulapisha konse pa balwani benu abamupata no kumucusha.  ⁸ Nakabili imwe mukalaumfwila no kulakonka amafunde yakwe yonse ayo nalamupeela ilelo. ⁹ Elyo Yawe Lesa wenu akamulenga ukuba abakankala mu fintu fyonse mukalabomba ne minwe yenu na mu bufyashi bwa mu mafumo yenu, abana ba fitekwa fyenu elyo ne fisabo fya mushili wenu. Yawe Lesa wenu akasekela muli imwe no kumulenga ukuba abakankala ngefyo asekele mu fikolwe fyenu,  ¹⁰ nga cakuti mwalabeela Yawe Lesa wenu no kulasunga ifyebo ne fipope ifyalembwa mu citabo ca mafunde no kubwelela kuli Yawe Lesa wenu ne mitima yenu yonse ne myeo yenu yonse. ¹¹ “Nomba ico ndemukonkomesha ilelo te funde lingamwafya kabili talili ukutali na imwe.  ¹² Talili mu mulu, icakuti mwingepusha amuti, ‘Bushe nani enganina mu mulu aye apoke no kwisa twebako, uleke tulelibeela?’ ¹³ Kabili talili kwishilya lya bemba, icakuti mwingepusha amuti, ‘Bushe nani aleyabuka bemba, aye apoke no kwisa twebako pakuti tulelibeela?’  ¹⁴ Iyoo, ishiwi lilifye mupepi na imwe. Lili mu kanwa kenu na mu mitima yenu pakuti mulelibeela. ¹⁵ “Moneni, nabika ku cinso cenu ilelo ubumi no bukankala, ukuloba ne mfwa.  ¹⁶ Pantu ilelo namukonkomesha ukutemwa Yawe Lesa wenu, ukulaenda mu nshila shakwe kabili no kulasunga amafunde yakwe, amalango yakwe ne fipope fyakwe. Lyena mukaba no bumi, kabili mukasanduluka, na Yawe Lesa wenu akamupaala mu calo mwalaingilamo no kucipoka. ¹⁷ Lelo nga cakuti imitima yenu yatalama, mwakaana no kulabeela, kabili nga cakuti mwalakonkelela ukulafukamina no kupepa imilungu imbi,  ¹⁸ ine ndemweba ilelo ukuti cine cine mukaloba. Tamwakakokolemo muli cilya calo mwalaabukila Yordani ukwingilamo no kucipoka. ¹⁹ . Ilelo naita umulu ne calo ukuba bakambone bandi pali imwe ukuti nabika pa cinso cenu ubumi ne mfwa, amapaalo no kulapisha. Nomba salenipo ubumi pakuti imwe na bana benu mukabe abomi. ²⁰ Muletemwa Yawe Lesa wenu, muleumfwa kwishiwi lyakwe kabili eo mulekonenamo. Pantu Yawe e bumi bwenu, kabili akamupeela ukwikala imyaka iyingi mu calo ico alaile ifikolwe fyenu, Abrahamu, Isaki, na Yakobo.”