¹ Mu mwaka walengele ikumi na umo, pa bushiku bwakutampa umweshi, ishiwi lyakwa Yawe lyaishile kuli ine aliti,  ² “We mwana wa muntu, abantu ba mu musumba wa Turi balalanda ne nsansa abati, ‘Eya umusumba wa Yerusalemu uwaba inshila ya ku makwebo naubongoloka. Impongolo shauko shishelefye pwampwa, apo Yerusalemu acimbile, nomba nifwe twalaba abakankala.’ ³ Amulandu, ifi efyasosa Imfumu Yawe asosa, ‘Imwe mwe bena Turi, ne mulwani wenu nomba nine. Ine nine nkemya abantu bambi aba mu mishobo iyingi pakuti bakese musansa imwe, bakesa nga filya amatamba ya muli bemba yacita. ⁴ Bakesa onaula amalinga ya musumba wenu, no kubongolola impungu shenu. Elyo na ine nkasendamofye umushili, mukashalefye umwalala wa cilibwe. ⁵ Akasanguka incende apo abalondo bakalakanika amasumbu yabo, kabili akashalafye ifyo fine muli bemba.’ Efyasosa Imfumu Yawe. Abantu ba mishobo ya benafyalo ebakatapa Turi, ⁶ na balya bene abantu abekala ku mulundu bakabepaila ku lupanga. Elyo abena Turi bakashininkisha ukuti kanshi ine nine Yawe. ⁷ “Ifi efyasosa Imfumu Yawe ati, ‘Nalaswa ndete Nebukadinesa, imfumu ya ku Babiloni, imfumu ya shamfumu, ndemuleta kukusansa Turi. Aletulila ku kapinda ka ku kuso, aleisa ne fita ifingi nganshi pamo na bakabalwe, na maceleta, ne fita ifyendela pali bakabalwe.  ⁸ Abantu abekala mu mishi iyafumamo iyabela pa mulundu, balefwa ku buta. Abalwani baleisa imba icilindi icashika pakulanga ifyo bakutebelele, bacite ne fibumbili, batantike ne nkwela ishakuubamo pakukulwisha iwe Turi. ⁹ Amalinga yobe balayabongolola ku fyakututawilako, ne mpungu shobe balashibongolola kuli bancinde.  ¹⁰ Walaisa kungwa no lukungu ulo bakabalwe balaisa mukulafutumuna. Icongo ca bakabalwe babo abatinta ifyakusendelamo ifipe, neca maceleta yene, ala calaisa tenkanya amalinga yobe, ilyo balaisa mukulapitila pa mpongolo sha musumba, uwalaisa shala icibolya.  ¹¹ Abendela pali bakabalwe balaisa mukulapitana mu misebo yobe, baleipayamo na bantu bobe ku lupanga. Inceshi shobe ishamaka shalaisa bongololwa. ¹² Abalwani bobe balaisa kutapila ifyuma, kumo kwine ne fintu ifyo ushitisha. Balaisa bongolola amalinga yobe na mayanda yobe yene ayacindama. ¹³ Balaisa sendapo amabwe ne myalo ne fibungulubwe fyonse, bakafiposa na muli bemba.  Kanshi ine nalakulesha ukwimba inyimbo shobe shonse, no kulisha amaseese yobe yene.  ¹⁴ Nalaleka pabefye umwalala we bwe, uwakuti abalondo balekanikapo amasumbu yabo. Iwe we musumba tawakabukululwe nakabili iyoo.’ Efyasosa Imfumu Yawe. ¹⁵ “Ifi efyasosa Imfumu Yawe ku bena Turi ati, ‘Bushe abekala mu lulamba lwa bemba tabakatutume pakumfwa icongo ca kuwa kobe no kuteta kwa bacenenwe no kukoma kwa lupanga ifikacitwa kuli imwe?  ¹⁶ Ishamfumu shonse ishateeka imishobo ya bantu abendauka pali bemba, shikema pa fipuna fyashiko, shikafuula imingila na malaya ayayemfiwa shikekala panshi no kulaikankilafye ku mwenso. Shikekatwa no mwenso pa mulandu wa fintu ifikakuponena, icakuti shikafilwa no kuleka ukulakanka.’ ¹⁷ Pakuloosha shikalakwimbila ulu lwimbo ashiti,

“‘Owe ifyo waonaika no kulobela muli bemba,

iwe we musumba walulumbi!

Abantu bobe bali e bene ba bemba,

kabili ebaletiinya na bantu bonse abekala kulya.

¹⁸ Ubushiku waonaikamo ifyalo fya ku lulamba lwa bemba fileitutuminafye ku mwenso,

na bantu abaikalamo nacibapesha na mano,

pakumona ifyo iwe waonaika.’

¹⁹ “Ifi efyasosa Imfumu Yawe ati, ‘Iwe nalakwalula icibolya nga ilya misumba yaonaika, umushaikala muntu. Nalakwibisha petenga pali bemba.  Nalakuposa mu nindi umwakuti uleikala pamo na bantu abaliko kale pano calo. ²⁰ Nalakubika panshi mu calo icaonaika, icaba icibolya ca pe, umwakuti uleikala pamo na bafwa. Tawakatale aubwelako pakwisa ikala nakabili na bomi iyoo.  ²¹ Nalakucita icilangililo icakutiinishako bambi, nobe ninshi e milobele waloba. Abantu bakalakufwaya fwaya, nomba tabakatale abakusanga nakalya.’ Efyasosa Imfumu Yawe.”