¹ Nakabili ishiwi lyakwa Yawe lyaishile kuli ine aliti, ² “nomba iwe we mwana wa muntu, ale nomba imba ulwimbo ulwakuloosha Turi. ³ Landa pali Tuti, ulya umusumba uwaba mu lulamba lwa bemba, uucita amakwebo na bantu abaikala mu lulamba lonse ulwa bemba. Ifi efyasosa Imfumu Yawe ati, “‘Iwe Turi, ulailumbanya pa busuma bobe. ⁴ Iwe apo waikala ni pali bemba.

Abakukuulile bakucitile uwapwililika kukuyemba.

⁵ Imiti iyo balepwileko imbao ishakukupangilako yafumine ku Seni, umwalo obe baupangile ne cimuti icalepesha ica ku Lebanoni. ⁶ Ifimuti fya oki ifya ku Bashani efyo babashileko inkafi shobe, itangalalwe lyobe balipangile ne mbao sha paini isha ku cishi ca Saiprasi, nasho bashiikeshe ne fiputusha ifya meno ya nsofu. ⁷ Insalu shobe ishakukolelako umwela pakwensha shali ishapikulwa kabili ishisuma, nasho shafumine ku Egupto, kabili eshali uluunga lobe ulo walebomfya. Nasho shintu shafumine ku lulamba lwa Elisha, ishacifufya ne shakashikila. ⁸ Bacoba bobe bantu bafumine mu musumba wa Sidoni no wa Afadi, na bantu bobe abacenjela ebalekwensha iwe we Turi. ⁹ Abakalamba ba ku Gebali ne ncenshi shabo bali mu bwato mukubomba umulimo wakucilika imilale. Aba mu mato yonse pali bemba balekupempula no kulacita nobe amakwebo.’ ¹⁰ “Abashilika ba ku Pesia, na ku Lidia na ku Puti, baishile mukulabombela pamo ne fita fyobe. Balekobeka inkwela shabo ne fisote fyabo mu musumba obe. Ebalengele nokuti ulumbuke.  ¹¹ Abashilika ba ku Afadi na ku Heleke ebalelinda amalinga yobe, na bena Gamadi ebalelinda impungu shobe. Balekobeka inkwela shabo ku malinga yobe. Ebalengele nokuti ube uwapwililika kukuyemba. ¹² “Mwaleshitishanya amakwebo ya fintu na bena Tashishi. Pa fyuma fyobe ifishaifulila, iwe walemwenapo silifa, ne fyela, na malata, ne mitofwe.  ¹³ Walecita amakwebo mu calo ca Yafani, na mu calo ca Tubali, na mu calo ca Mesheki, na mu fyuma fyobe walekabulamo abasha ne fintu ifya mukuba. ¹⁴ Abena Beti Togama balekabula bakabalwe abakubomfya imilimo, na bakwendelapo mu nkondo, pamo pene na bapunda. ¹⁵ Walecita amakwebo na bena Rodesi, na bantu ba mu fyalo ifingi ifya mu lulamba lwa bemba. Walebakabusha ifyuma fyobe, pakuti balekupeelelapo ameno ya nsofu na eboni iya mbao. ¹⁶ Abena Aramu baleshita ifipe fyobe, pantu walepanga ifingi. Balekuletela utumabwe twamutengo twa tokisi kabili utwafitulukila, ne nsalu ishakashikila, ne shapikulwa mumbali, ne shatelela, na kolali, no tumabwe utukankala utwakashikila utwa rubi. Ifi fintu efyo baleshitamo ifyuma fyobe. ¹⁷ “Abena Yuda na bena Israeli nabo bene mwaleshitana nabo ifyuma, bena balekuletela iŋanu ya ku Miniti, na makunyu, no buci, na mafuta ya miolifa, ne fintu ifyanunka ubusaka.  ¹⁸ Abena Damasiko baleshita ifipe fyobe ifingi, pantu ifyo walepanga fyalifulisha. Balekuletela ubwalwa bwa mwangashi uwalefuma ku Heliboni, na masako ya mpaanga ishabuuta aya ku Saha. ¹⁹ Abena Dani na Bagiriki ukufuma ku Usali balekushitisha ne fyela ifyo balefula, ne fintu ifyanunka ubusaka kasia no mumfwemfwe, pakuti nobe ulebashitishako ifyuma fyobe. ²⁰ Abena Dedani baleleta amalangeti yalya bekalapo abendela pali bakabalwe, nabo ni pakuti baleshitamo ifintu fyobe. ²¹ Abena Arabia na bakateeka ba calo ca Keda, nabo baleisa no twana twa mpaanga, na basukusuku, ne mbushi, pakuti baleshitamo ifyuma fyobe. ²² Bashimakwebo ba ku Sheba na ba ku Rama baleisa ne fintu ifyanunka ubusaka nganshi, na mabwe ayamutengo na golide, nabo efintu baleshitamo ifyuma fyobe.  ²³ Aba mu musumba wa Harani, no wa Kane, no wa Edeni, na bashimakwebo ba ku Sheba, na ba mu musumba wa Ashuri, no wa Kilimadi, aba bonse mwaleshitishanya nabo ifintu. ²⁴ Mu ncende shenu isha makwebo balekushitisha insalu ishikankala, ishakashikila, ne shapikulwa mumbali, ne fikuutulo ifyakunyantapo ifyabeka kabili ifyamindoloshi, ne myando iyakosa, ne fitabataba ifyamaka.  ²⁵ Umulongo wa fimato ifikulu ifya ku Tashishi ewaletunta ifyuma fyobe.

“Wali ngo bwato ubuli pali bemba,

ubwiswile ifipe paa.

²⁶ Abalekooba bakutwele pakati ka bemba,

nomba icimwela ca ku kabanga caisa konawila pakati ka bemba.

²⁷  Ifyuma fyobe fyonse ne fyakukabushanya, ne fyamakwebo fyonse fyalobele muli bemba, pamo na bakooba bobe, bonse abakwensha na bakulungisha, na bashimakwebo bobe na bashilika bonse abo usenda, bonsefye balinwenene nakalya nakalya muli bemba,

pa bushiku bwine iwe waonaike.

²⁸ Ku nkuuta iyikalamba iya bakensha wa mato, incende sha mu lulamba shatenta shonse. ²⁹ Na bonse abensha amato, nabafuma mu mato yabo. Aboba amato na bonse ababombela pali bemba, na basha amato bele iminina ku mulundu. ³⁰ Bonse niwe baleloosha nganshi, baleikubaika ulukungu ku mitwe, balealangana na pa fishala pakulanga ubulanda. ³¹ Nababeya ulukuso pakulanga ubulanda, nabafwala ne nsalu shabulanda. Ilyo balelila, awe imitima yabo te pabukali. ³² Ilyo balelila nokukuloosha, balekuloosesha mu lwimbo abati, ‘Nga nani uwaonawilwe nga Turi, ulya Turi wa pakati ka bemba?’ ³³ Ilyo walepatula ifyuma fyobe ifyamakwebo pali bemba, abantu ba mishobo iyingi baleshitako ifyo balefwaya. Ifyuma fyobe ifishaifulila ifyo waleshitisha, ala fyalepulamika ishamfumu. ³⁴ Awe nomba naubongolokela pali bemba, no kwibila nawibila petenga pali bemba. Ifyuma fyobe fibundile pamo na iwe, kumo kwine ne bumba lya bantu abo waleenda nabo. ³⁵ Abantu bonse abaikala mu lulamba lwa bemba bekelefye inkumbabulili pakumona umupamba uukuponene.

Ne shamfumu shabo nasho shine shileikankilafye ku mwenso, na pa finso fyabo palifye cimbi cimbi ku mwenso.

³⁶ Bashimakwebo ba mishobo ya benafyalo nabapapa pali iwe,

nomba impela yobe naifika iyakutiinya, tawakabepo nakabili.”