¹ Ishiwi lyakwa Yawe lyaishile kuli ine ukuti,  ² “We mwana wa muntu, losha amenso ku bena Amoni, kaseseme pakubakalipila. ³ Kabebe bena Ammoni, ‘Umfweni amashiwi yakwa Yawe umwine wa maka yonse ayakuti, ifi efyasosa Imfumu Yawe ati, imwe mwalisansamuka pakumona ifyo bakowesha icifulo candi icamushilo. Mwalitemwa pakumona ifyo icalo ca Israeli caonaika, na pakumona uko abena Yuda balesendwa bunkole. ⁴ Pa mulandu wakuti imwe mwalitemwa, na ine kanshi nkamupeela ku bantu ba mishobo iyaba mu matololo ya ku kabanga nge cikwatwa cabo. Mu calo cenu bakesa kuulamo insakwe, no kwikala emo bakaleikala. Bakesa mukulamuliila ifisabo, no kulamunwena umukaka. ⁵ Umusumba wenu uwa Raba nkausangula itanga lya ngamila, ne calo cenu conse imwe mwe bena Amoni ine nkacisangula incende iyakucemenamo impaanga, epakuti mukashininkishe ukuti kanshi ine nine Yawe.’ ⁶ “Pantu ifi efyasosa Lesa Yawe ati, ‘Imwe mulatota amapi no kulacinda ne nsansa pakuseka icalo ca Israeli no musaalula wa mu mitima yenu yonse.  ⁷ Cisuma, na ine kanshi nomba nkamuposa ku mishobo ya benafyalo, uleke ikamutape fyonse. Nkamulofyafye bonse, epakuti umutundu wenu ukalobe. Lyena elyo mukashininkisha ukuti kanshi ine nine Yawe.’”

Ubusesemo bwa fikaponena abena Moabu

⁸ Ifi efyasosa Lesa Yawe ati, “Pantu abena Moabu na bena Seiri balasosa abati, ‘Moneni aba ŋanda yakwa Yuda baisa linganafye na bantu ba mishobo imbi yonse.’ ⁹ Cisuma, na ine kanshi nkaleka ikasanswe imisumba iyilinda imipaka ya calo ca bena Moabu, no musumba wabo uwawamisha uwa Beti Yeshimoti, no wa Beti Meoni, no wa Kiriataimu. ¹⁰ Nkaleka abantu ba mishobo iyabela mu matololo ya ku kabanga bakacimfye abena Moabu, kumo kwine na bena Amoni, epakuti umushobo wabo ukalobe.  ¹¹ Ine nkapesha abena Moabu, elyo nabo bakashininkisha ukuti kanshi ine nine Yawe.”

Ubusesemo bwa fikaponena abena Edomu

¹² Kabili ifi efyasosa Imfumu Yawe ati, “Pa mulandu wakuti abena Edomu balandwile pa bena Yuda, no kuiletelela umulandu abene palwa cilandushi cabo,  cisuma, ¹³ ifi efyasosa Imfumu Yawe ati, ‘Ine nkabalimuna, kabili nkabepaila bonse kumo kwine ne fitekwa fyabo. Icalo cabo ine nkacisangula amatololo, ukutampilafye ku musumba wa Temani ukuya fika na ku musumba wa Dedani, na bantu bakafwa ku nkondo. ¹⁴ Abantu bandi abena Israeli ebakanandwilako abena Edomu, bakomfwikishe apapela ubukali bwandi ne cipyu candi. Elyo abena Edomu bakeshiba ifyo ciba ku bantu abo nacitapo icilandushi.’ Efyasosa Imfumu Yawe.” Ubusesemo bwa fikaponena abena Filisiti ¹⁵ Kabili ifi efyasosa Imfumu Yawe ati, “Pa mulandu wakuti abena Filisiti bacitile icilandushi no kulandula no musaalula mu mitima yabo pa balwani babo, abo bapatana nabo nakale, no kufwaya ukubalofya kumpatilafye,  ¹⁶ cisuma, ifi efyasosa Imfumu Yawe ati, ‘Nomba ndelanda ukuti nkabasansa abena Filisiti, no kubalofya nkabalofya. Nkalofya na bena Kereti, na bonsefye abashala mu lulamba lwa bemba.  ¹⁷ Nkacita kuli bena icilandushi icikalamba no kubakanda apapela icipyu candi. Elyo bakashininkisha ukuti kanshi ine nine Yawe, ilyo nkacita icilandushi pali bena.’'