¹ Nikwisa ubulaki no kukansana kufuma pakati kenu? Bushe tafifuma kulunkumbwa ululwisha mu filundwa fyenu? ² Mulakabila, kabili tamukwata. Mulepaya no kukumbwa, kabili tamukwata. Mulalwa no kukansana. Tamukwata pantu tamulomba. ³ Mulalomba kabili tamupokelela pantu mulomba bubi-bubi, pakwebati mwinga fibomfya kufya kukabila kwenu. ⁴ We mwanakashi umucende! Tawaishiba ukwebati ukuba icibusa ne calo bulwani kuli Lesa? Onse uyo uukabila ukuba cibusa ne calo ailenga ukuba umulwani wakwa Lesa. ⁵ Nangu bushe utontonkanya ukwebati amalembo yalanda apafye ati, ''Umupashi uo alengele ukwikala muli fwebo ulikwete ubufuba apakalamba''? ⁶ Lelo Lesa alapela ukusenaminwa kwacilapo, ngefyo amalembo yalanda ati, "Lesa alacincintila aba cilumba, lelo apela ukusenaminwa ku baicefya." ⁷ Eco nakileni kuli Lesa. Kaneni kasebanya, kabili akafulumuka kuli mwebo. ⁸ Palamineni kuli Lesa, kabili akapalama kuli mwebo. Sambeni iminwe yenu, mwe babembu, kabili sangululeni imitima yenu, mwe bantu bamitima ibili. ⁹ Beni no bulanda, losheni, kabili lileni! Lekeni inseko shenu shaluke ukulosha ne nsansa shenu shalukile mu nkumba-bulili. ¹⁰ Icefyeni kuli Shikulu, nao akamisumbula. ¹¹ Mwilekulanda ifyabubi pali umbi, mwe bamunyinane. Umuntu uulanda ifyabubi pali munyina nangu uupingula munyina alanda ifyabubi pa malango kabili alapingula amalango. Umfwa wapingula amalango, ninshi tauli kacita wa malango, lelo uli kapingula. ¹² Umuntu fye umo ekapela wa malango kabili kapingula. Ewakwata amaka ya kupususha no konaula. Bushe niwebo nani, weupingula umwina mupalamano obe? ¹³ Nomba kutika, webo weulanda ati, "Ilelo nangu mailo nkaya muli uyu musumba, nkaya kupwishako umwaka kulya, no kushitisha, ne cuma cikalundwepo." ¹⁴ Nani waishiba ifikacitika ubushiku bukoisa, kabili umweo obe ulishani? Pantu uli nga fube-fube uyo umoneka pakashita akanono kabili afumishiwapo. ¹⁵ Lelo, ufwile ukulanda ati, "Umfwa Shikulu asuminisha, tuli no kuba aba mweo no kucita ici nangula cilya." ¹⁶ Lelo nomba mukoitakisha pa mapange yenu aya mataki. Konse uko ukuitakisha bubifi. ¹⁷ Eco kuli onse uwaishiba ukucita ubusuma lelo takobucita, kuli ena caba lubembu.