¹ Te bengi muli mwebo abafwile ukuba bakasambilisha, mwe bamunyinane, pantu mwalishiba ukwebati fwebo fwe basambilisha tukapingulwa ukucilapo. ² Pantu bonse tulaipununa munshila ishingi. umfwa uuli onse takoipununa mu fyebo, ninshi muntu wapwililika, ali na maka ya kubaka umubili wakwe onse. ³ Nomba umfwa twabika amakoli mutunwa twaba kabalwe pakwebati batunakile, kuti twapilibula ne mibili yabo yonse. ⁴ Tontonkanyeni nakabili ukwebati ifimato, nangu fyakula shani no kusendwa no mwela wakosa, fipindululwa fye kuli kanaosa akanono no kuya uko coba akofwaya. ⁵ Muli iyi nshila, ululimi kalundwa akanono aka mubili, lelo kalaitakisha mu fintu ifikalamba. ⁶ Moneni nakabili ifyo lwacepa ulubingu lwa mulilo uloca impanga iikulu. Ululimi nalo mulilo, calo cabubifi icabikwa pa filundwa fyesu. Ululimi lulakowesha umubili onse, ulusonteka ubwikashi bonse, nalolwine lulaisonteka no mulilo wa kumbo. ⁷ Pantu umusango onse uwa nama ya mpanga, ifyuni, ifikulika, ne filengwa fya muli bemba filapindululwa kabili fikopindululwa na bantunse. ⁸ Lelo takuli umuntu uwinga pindulula ululimi. Lwabubi ubutatusha, lwalisulamo ubusungu bwa mfwa. ⁹ Ku lulimi tulalumbanishishako Shikulu na Tata, kabili kuli lwena tulatipilako abantu, abo ababumbwa mu cata cakwa Lesa. ¹⁰ Kukanwa kamo kene kulafuma ipalo ne citipu. Mwe bamunyinane, ifi fintu tafikofwaikwa ukucitika. ¹¹ Bushe akamfuku-mfuku kalapongolola amenshi kubwendo bumo bwine ayabune naya kulula? ¹² Bushe icimuti ca mukunyu, mwe bamunyinane, kuti catwala imiolife? nangula ica mwangashi, amakunyu? napamo amenshi ya mucele ukufumya ayabune. ¹³ Ninani uwa mano kabili uwasalapuka pali mwebo? Lekeni uyu muntu alange ubwikashi ubusuma mu milimo yakwe mu mano ya kunakilila. ¹⁴ Lelo nga uli nakalumwa akabi na kafindwe mu mutima obe, wilakuitakisha no kubepesha icine. ¹⁵ Aya tayali mano ayakufuma ku mulu. Lelo, ya pe sonde, ayatali ya kumupashi, aya ngulu. ¹⁶ Pantu ukuli akalumwa na kafindwe, ekuli icimfulunganya ne micitile yonse iyabipa. ¹⁷ Lelo amano ayafuma ku mulu yena pakubala ya kusanguluka, kanshi yalitemwa - umutende, umutembo, ya kunakilila, ayaisulamo uluse ne fisabo fyabune, ayacishinka kabili ayabula akapatulula. ¹⁸ Ifisabo fya bulungami filabyalwa mu mutende kuli abo abacita umutende.