¹ Mwe bamunyinane, twiba ne cicetekelo muli Shikulu Yesu Kristu, Shikulu wa bukata, no kukwata akapatulula ku bantu bamo. ² Nga cakwebati umo aisakwingila mukulongana kwenu alifwele inyinda minwe sha ngolide ne fyakufwala ifyakuyemba, kabili mwaisakwingila umubusu alifwele ifya kufwala ifya lamba. ³ Umfwa mwalolesha pa muntu ufwele ifya kufwala fyakuyemba kabili mwalanda ati, "Ikala pano pa ncende yabune," lelo mwalanda ku mubusu ati, "Webo iminina apo" nangu "Ikala mupepi ne cakunyantapo amakasa yandi," ⁴ bushe tamukoipingula mwebene? Bushe tamwalwike bakapingula na matontonkanyo ya bubifi? ⁵ Kutikeni, mwe bamunyinane abatemwikwa, bushe Lesa tasalile ababusu aba mu calo ukuba abakankala mu cicetekelo kabili ukuba impyani sha bufumu ubo alaile kuli abo abamutemwa? ⁶ Lelo mulisulile ababusu! Bushe tebakankala aba mititikisha? ⁷ Bushe tebamitwala ku cilye? Bushe tabasalula ishina yabune ilyo mwakutilwapo? ⁸ Lelo, umfwa, mwafikilisha amalango ya cine ukulingana ne lembo lya kwebati, "Ulekutemwa umwina mupalamano ngefyo waitemwa wemwine," ninshi wacita ica kulungama. ⁹ Lelo nga mwacindikapofye bamo abantu, ninshi mukobembuka, kabili mulishininwe na malango ukuba bampula mafunde. ¹⁰ Pantu onse uubela amalango yonse, lelo nga atobapo limo, ashininwa ukutoba amalango yonse. ¹¹ Pantu uwalandile ati, "Wilakucita bucende," ewalandile nokwebati, "Wilakwipaya." Ngataucita ubucende, lelo umfwa ulepaya, ninshi ulishile kuba katoba wa malango yonse. ¹² Eco mulekulanda no kubomba nga abakapingulwa ukupitila mu malango ya buntungwa. ¹³ Pantu ubupingushi bwisa ukwabula uluse kuli abo abataaba na uluse. Uluse lulacimfya ubupingushi. ¹⁴ Bunonshi ndo bulimo, mwe bamunyinane, umfwa umo alanda ati alikwete icicetekelo, lelo taba na milimo? Bushe ico icicetekelo kuti ca mupususha? ¹⁵ Nga cakwebati muninefwe nangu nkashi tafwele bwino kabili takwete fyakulya pali bulya bushiku. ¹⁶ Nga cakwebati umo muli mwebo alanda kuli bena ati, "Mwende umutende, mulekufwala ifyakaba kabili mulekulya no kwikuta. Nga cakwebati ta mubapele ifyakukabila fya mubili, kuti cabafwa shani? ¹⁷ Munshila imo ine icicetekelo icine ceka, nga tacikwete imilimo, ninshi cakufwa. ¹⁸ Lelo umo kuti alanda ati, "Ulikwete icicetekelo, na nebo ndikwete imilimo." Ndanga icicetekelo cobe ukwabula imilimo, kabili nkokulanga icicetekelo candi ikupitila mu milimo yandi. ¹⁹ Walisumina ukwebati kwaba Lesa umo; wacita icabune. Lelo ne ngulu shalisumina ifyo fine, kabili shilatutuma. ²⁰ Bushe ukofwaya ukwishiba, we muntu umuwelewele, ukwebati icicetekelo icabula imilimo ninshi cafye? ²¹ Bushe shifwe Abrahamu tali niku milimo alungamikilwe ulo apele Isaki umwana wakwe umwaume pa cipailo? ²² Mulimwene ukwebati icicetekelo cabombele ne milimo yakwe, no kwebati ku milimo icicetekelo cakwe calipwililike. ²³ Amalembo yalifikilishiwe ayalanda ati, "Abrahamu alisumine Lesa, kabili calipendelwe kuli ena ngo bulungami," kabili alikutilwe cibusa wakwa Lesa. ²⁴ Mulimwene ukwebati ni ku milimo umuntu alungamikilwa, kabili te ku cicetekelofye kweka. ²⁵ Munshila imo ine nakabili, bushe Rahabu cilende talungamikilwe ku milimo ulo apokelele inkombe no kubaleka baye inshila imbi? ²⁶ Pantu ngefyo umubili uwapatuka ku mupashi waba uwafwa, cimo cine ne cicetekelo icapatuka ku millimo cakufwa.