¹ Yakobo, umubomfi wakwa Lesa kabili uwakwa Shikulu Yesu Kristu, ku mikowa ikumi na ibili iya salangana: Umutende mukwai! ² Mulekucipenda ukuba ica nsansa, mwe bamunyinane, ulo mukopita mu mafya ya kulekana-lekana. ³ Mwishibe ukwebati ukweshiwa kwa cicetekelo cenu kuleta ukushipikisha. ⁴ Lekeni ukushipikisha kufikilishe imilimo yakuko pakwebati mube abafikapo kabili abapwililika, ukwabula ukubulisha akantu. ⁵ Lelo pali mwebo nga pali ulekabila amano, lekeni ena alombe kuli Lesa, ena eupela mukufusha no kwabula ukwebaulwa kuli onse uwa lomba, nao ali no kumupela. ⁶ Lelo lekeni alombe mu cicetekelo, ukwabula ukutwishika. Pantu uyo onse ukotwishika aba kubati libimbi muli bemba ilyo ilisendwa no mwela no kulishingulusha. ⁷ Pantu uyo muntu tafwile kutontonkanya ukwebati ali no kupokelela icili conse ukufuma kuli Shikulu; ⁸ muntu uwabula ukushininkisha mwitontonkanyo lyakwe, uwabula ukushikatala munshila shakwe shonse. ⁹ Lekeni munyinane umubusu aitakishe pa cifulo cakwe ica pamulu, ¹⁰ lelo umuntu umukankala mucifulo cakwe ica panshi, pamulandu ali no kufwa nge luba lya mumpanga mucani. ¹¹ Pantu akasuba katula ne cikabilila no kumye cani. Iluba lilalukuta, no busuma bwaliko bulaloba. Mu musango umo wine, umukankala ali no kulokota pakati ka lwendo lwakwe. ¹² Alipalwa umuntu uushipikisha mu fyakweshiwa. Pantu panuma ya kupita mukweshiwa, akapokelela icilongwe ca mweo, ico icalailwe kuli abo abatemwa Lesa. ¹³ Mwileka nangu umo ulo atunkwa alande ati, "Nkotunkwa na Lesa," Pantu Lesa tatunkwa ku fyabubi, nangu ena umwine tatunka uuli onse. ¹⁴ Lelo cila muntu atunkwa kufya ku kabila kwakwe, ifyo ifimutakanya no ukumubeleleka. ¹⁵ Kanshi ulo ulunkumbwa lwaimita, lulafyala ulubembu, na panuma ulubembu lwa kula, lulafyala imfwa. ¹⁶ Mwibepekwa, bamunyinane abatemwikwa. ¹⁷ Conse icabupe cabune na conse icabupe icapwililika cifuma ku mulu. Cifuma kuli Shifwe wa lubuto. Kuli ena takwaba ukwaluka nangu kubati cinshingwa pamulandu wa kwaluka. ¹⁸ Lesa alisalile ukutufyala ku cebo cacishinka pakwebati tube ifisabo fya ntanshi ifyaibela pa fintu fyonse ifyo abumbile. ¹⁹ Mwalishiba ici, mwe bamunyinane abatemwikwa: Lekeni umuntu onse abe uwakwanguka ukumfwa, uwatekanya ukulanda, kabili uukokola ukukalipa. ²⁰ Pantu ukukalipa kwa muntu takufikilisha ubulungami bwakwa Lesa. ²¹ Eco kanshi fuleni fyonse ifya lubembu lwa muselu ne fya bubifi fyonse. Mukunakilila pokeleleni icebo ica byalwa, ico icaba na maka ya kupususha imyeo yenu. ²² Mube kabacita ba cebo teba komfwa fye iyoo, ukulaibepa fye mwebene. ²³ Pantu uuli onse nga ni komfwa wa cebo lelo tekacita wa cebo ali kubati muntu akoilolekesha pa cinso cakwe mu cilolani. ²⁴ Alaibebeta umwine nolu alaya nakabili apopenefye alaba ifyo acimoneka. ²⁵ Lelo umuntu uulolekesha bwino bwino mu malango yapwililika aya buntungwa, no kutwalilila ukucita ico, tekuba fye komfwa wacilafi, uyu muntu akapalwa mu ficitwa fyakwe. ²⁶ Umfwa uuli onse akotontonkanya ukuba kapepa kabili takosunga ululimi lwakwe, akoibepa mu mutima wakwe na bukapepa bwakwe bwafye. ²⁷ Bukapepa ubwapwiilika kabili ubutaonaika ku cinso cakwa Lesa kabili Shifwe kwafwa abana banshiwa na ba mukamfwalwa mu kucucutika kwabo, no kuisunga wemwine uwabula ukukowela ku calo.