1 Bate bo bainti bano nora tauni sisariaini baibo, bira autu Koniriasirabe biba 100 huru bainti ra'iki taibabe Itarini baria huru baintika. 2 Bi baintiba Kotira'a mono tibaiba eka nai nabu'ira bariaka hampata. Biba airu mone bainti nahenti atariaka nimiharo biba eka enta nunabu tibaiba. 3 3 kiloki aumai'ibo atitaira'a, biba taira'a tabaibo Kotira ankero bobano biraini tubura. Ankero bano bira arakero, "Koniliasio tiro!" 4 Koniliasiba ankero tabero bo'akero eteharo tiharo, "are nanahikare antu'a ruaro, nora bainti baubo tiro?"Ankero bano bira tibamiro tiharo, "Ai nunabu bano bata are bainti kia bohika bataka kaha'i bariana narubai urubibo Kotiba are mintina okarara irima amitaibo." 5 Bate hinikia baintika atitaira nora tauni Jopaini orubi bo bainti bira autu Saimonira bira bo autu Pitara bira bitate. 6 Biba bo bainti bira autu Saimonira batakeroma baibo, biba antaubahi paha'a bohika minti baibabe bira nabu nampisi aumantoma baibabe. 7 Ankero bano birabatakero uba tiba bira a'irakero bibo, Koniliasiba nai kai'a bainti bata huru bainti bo bano bika abutana baiharo bira kai'a barebaiba. 8 Koniliasiba nanahika obarira tabero bika atitomanta Jopaini orubura. 9 Ararara 12 kiloki aumai ibaimanta, bika arana bii nora tauni aumanto orubuabo, Pitaba kaba'ara aututara marira'a barirero nunabu tireba. 10 Biba karara antu'arimanta, bainti kara unte bariabo, Pitaba taira tabora. 11 Biba tabaibo naruba antuabibo nora rabara'era bo'aba batai buabu baibo, 4-nabu biti baiba. 12 Rabara'era bira'ira uara bairi 4-nabu ai'u baika bata auhabau nibariaka bata antau ata'i nibarika bata bariara. 13 Nantiara bo noo bano bira arero tiharo, Pitao tiro, hipira antaubahi arukera nane tiro." 14 Mintibo Pitaba tiharo, Nora baubo, kiabe tiro, bira nanare te kiama nahika bano orai'iro konkomai'a bihaikara narabe tiro." 15 Mintibo bi nooba e'abata anirante birara tiharo, "Nanahika Kotiba abu abu'a tainahira, kia are tiha orai'a biro konkomai'a birabe tiane tiro. 16 Bihaikaba taratata bohatata obariro. Nantiara bi raba'eraba anirantero totara narubaini ori'etora. 17 Pitaba bi tairara okarara iri baumanta, Koniliasiba atitai baintika enta'a obarai'a bura. Bika aarara irake nabu'ira anirora. 18 Bika naberai tibake ireha Saimonira bira bo autu Pitaba, bairobe ti. 19 Pitaba bi tairara iribaibo, Nora Aiho bano tiharo, "Tabane tiro, tarau bohau bainti ariarama rante bariabo." 20 Himpira bikara hampata otubuane, kiama are popohane bikara hampata bireba, bira nanare tentama bika atitaura uruabo. 21 Mintibo Pitaba bi baintika ianaini otubiro tiharo, "Ne rante baria baintika te ma bikama uro. Ne nanara urukabe tiro?" 22 Bika tiha, "Ami iata bainti bobano, bira autu Koniliasira, biba abu abu bainti tabae Kotirai mono'i baiba Juda bainti nahenti birara ko'e uba tibariaba, bi baintiba abu abu'a biro baiba Kotira ankero bano bira uba amiboma tinabu atitero ariara oru bitakaibo nai nabu'i otubira nena no'ihaira uba tiro irirebabe." 23 Mintibo Pitaba bika bita nabu'ira bera kaimanta bira batake baura. Bo to'a'ira biba himpiro bikara hampata bura, hinikia atabakauka bata Jopainihai bira batake bura. 24 Bo enta bika Sisariaini tubu obarabura. Koniliasiba bikara bekai'iharo baura'a. Biba nai antu bata nai aumanto bariaka bita ruba'ua kero. 25 Pitaba nabu'ira obarubo, Koniliasiba bira tabero tori kauru arabiro Pitra'a mono'ireba. 26 Mintibo Pitaba bira kau'u uata barero himpikero tiharo, "Himpuane tiro! te bainti ai bo'aukabe tiro." 27 Pitaba bikantiro uba tiharo baibo, biba nabu'ira ori'etero tabomanta airu bainti nahente ruba'uabi bariabo. 28 Biba bika tibanimiro tiharo, "Ne nenta tababo Juda Lo bano tiharo kiama bobano bo batukai hainauka hampata ni bariate tirabe. Iboma Kotiba ti umi'ero tiharo kia bo baintiara tiha orai'a birabe konkomai'a birabe tiane. 29 Bi okararama te ni ianaini tuburo, kiama te niara bata turo ne tini uba baramanta. 30 Koniliasiba tiharo, tara enta boha enta aitaraira boha ma bi entara bo'ara, te tenta nabu'i 3 kiloki eraimanta nunabu tiha, tabauro bo bainti bano iha auru utaba'a nonku taiba ti biri'a himpiro. 31 Biba tiharo, "Koniliasio tiro, Kotiba ai nunabu iriro are behi bainti kaho'ibariana bata, nanahika are minti bariana Kotiba irima taibo." 32 Mintira hinikia baintika atitaira Jopaini orubi bo baintiara irate bira autu Saimonirabe bira bo autu Pitarabe. Biba bo bainti bano antau bahi paha barakeharo mintahika minti baibabe bira autu Saimonirabe biba nampisihata baibabe." 33 Minti te totara bainti atitaura ai oru bite tubuarabe. Bate, tenabu eka Kotira abu'ama himpi bauro, tenabu iriaira ai Nora bano uba amina ti'e tenabu irirabe. 34 Nantiara Pitaba nai noo antuakero tiharo,"U'ai'akem turo, Kotiba kiama boha antu bainti nahentiara'i antu'aribo. 35 Mintiboma eka bainti bainti nahenti taukae mono'iha abu abu okara mintibariaka bikarama Kotiba antu'ama aribaibo. 36 Ne tiha bira atitaibo Isireri bainti nahentiara tubibabe, biba ko'e ubara bata Ihu Karaitira iha'ara auhara bata tiba o'ai'akero tabae eka bainti nahenti Nora banobe. 37 Nenta tababo eka norahika obarira, eka Judia batana obarira, Galili'i hairo antakero. Joniba namai a'u nimiteharo tiba o'ai'a kaira bira nantiara bihaikaba obarirabe; 38 Nanahika bano Ihura Nasaretini hainara'a obariaina, bira nana ara'a Kotiba Ihura Aiho Bainti noharo bahabera a'ukero kempuka bata amirabe. Biba biro ko'e okara mintiharo bainti nahenti robara baraka ko'ema nimitero taukae Sataba ahu'ari kaika bata, bira nanare Kotiba birabatakero baibo. 39 Tenabu taba kankoma uro Ihuba bihaikara mintira, Juda kantari'i bata Jerusaremini bata. Bika bira aruke katari'a hiritabo, 40 ibo Kotiba tara enta boha enta aitarobo utubira'ihairo bira uri himpi kaira bika bira tabaterabe, 41 kia eka bainti bira tababo, mintiboma taukae Kotiba haru tibatairauka ma tenabu bira batake kara ne namai neha biba utubiro urihimpira nantiara. 42 Biba tinabu uba timiro tiba o'ai'ake bainti nahentiara tiha Kotiba nai bira makimi'a taiboma siasi bo'ara baiharoma bainti nahenti a'i bariaka bata utibuaka batama rairanobe. 43 Eka poropeti birara tiarabe, mintiboma ta baintibae bira'a mara'ura utina, Kotiba Ihura autu'ama bira kumi bi'u amitanobe." 44 Pitaba bi bainti nahenti kaini uba tibaibo, Aiho Bainti bano eka bainti nahenti taukae biba uba tira iribariaka'a anira. 45 Bainti nahenti taukae baata to'ara'a mara'ura utibariaka, bika bira Pitara batake aniaka bika rabuku buarabe, bira nanare bika tabomanta kia Juda batanaka bo batanaka Aiho Bainti'a mpi'a buamanta. 46 Bira nanare bika iriamanta kia bika Juda batanaka bo uba bo uba ihai Kotira autu tuahere bariamanta. Mintibo Pitaba, bika tibanimiro tiharo, 47 Hinikiaka namai barairara kiabee tiabo? Bika tenabu Aiho Bainti barauna teke bika bata baree?" 48 Nantiara biba Ihu Karaitira autu'a namai baratera bika tibanimiro. Nantiara bika bira ireha bikara hampata bo entanabu bairiaire ti.