¹ Halate Jesu a Juda waya ai mono nopi haiye Sabati le, inagi mago aya farini vega anilaga faiminiye. ² Mago waya mogi apaulaga atea maiye Jesu a mani vega Sabati le alino alagepa hutesi ae.Mani waya mogi aga koti hutesa kafe hauya hae. ³ Jesu hapaiye aya farini vega,"Hetiga male waya ai folagapi maiyo." ⁴ Inagi aga waya aife make hiye,"Sabati le alagepa ya hugupi haviya hupate gaune;waya alita heti pate gaupi,heta kipate gaune?"Apaga ke osae. ⁵ Jesu hai yae apaga aulu hapae,inagi aga halate hau hupate,nayafene,apaga apaipa moa logiya waiye.Inagi mani vegae make huno hapaiye,"Kaga kaya aliga api-aiyo."Aga aya alino api aiye,inagi Jesu a aga alino alagepa hute. ⁶ Farisi waya mogi mani ya age tea,apaga malage ua Heroti wayae ke hua hayae,Jesu na hea kitesa ke. ⁷ Mani yamo agamelaga,Jesu agame mafane nagae nambisi laga wae.Inagi hailaga waya Galili ti agi Judia ti agi ⁸ Jerusalem ti agi Indumea e Jodan aupaliga ti agi inagi Taia e Sidon tie aga aiyaga waiye.Hailaga waya mogi Jesu nayamo hiya ke afitea agai taga ae. ⁹ Jesu a agame mafane naga hapapai no aemo aise bouti alita alo ala hunateyo hiye nayafene hailaga ve ane mogi aga akege ae,husi gea apaga fai wego huoatesae huno aene. ¹⁰ Aga hailaga waya alino alagepa hupate,inagi keoge kari alina waya mogi agai taga ae ameali gune hua. ¹¹ Havi awamu mogi Jesu na age afinamo,apaga aulaga'le asagau aitea,ke aea make nehae,"Kaga God'ti mafane." ¹² Aga logiya ke apaga hapapai no aemo lapaga alita afole onateyo hiye. ¹³ Aga agoya laga hai teno aga hauni waya aife ke higea apaga agai taga ae. ¹⁴ Aga anilaga twef[12]waya legana paiteno aliya waya niye huno apagi ae,husigea apaga agaie maine sageno mono husa aliya'te alino apatale gaiye, ¹⁵ inagi apaga havi awamu hafaisa logiya apamiye. ¹⁶ Aga twelf[12] aliya waya legana paiye:Saimon fe Pita ae huno agi amiye; ¹⁷ Jems aga Zebedi mafane,inagi Jon aga Jems kogana amoae,aga agi amino aemo Boaneges ae hiye,ani agimo aepa amo,hagaru yamo mafane; ¹⁸ inagi Endru agi,Filip agi,Batolomiu agi,Matiu agi,Tomas agi,Jems aga Alfias mafane gi,Tadius agi,Saimon fe Ziloti ae hua agi neae, ¹⁹ inagi Judas Iscariot,aga Jesu na awaleno kame waya ai apayapi ateniye. ²⁰ Aga no alaga viye,inagi halate hailaga waya ea aru aiye,higea apaga bredi maya onae. ²¹ Ita afo amogi ani ke afitea ua awale gesae,apaga make hae,"Aga hani moa alagepa huno aliya noaliye." ²² Inagi lo kae yate afiya alina waya Jerusalem ti ea make hae,"Belsibal a agaipi mainiye,inani agenopa ya huno havi awamu teti aga havi awamu hanefaiye." ²³ Jesu apaga ke higea agai taga ageno meto ke huno hapapaiye,"Hai ya hinageno sata a sata na hafai giye? ²⁴ Inagi mago sauwe nemo waya mogi alia fago hua tole ya hutea apagai apifi kame husayana,ani sauwe nemo waya na heotigae. ²⁵ Inagi mago nomoa agaiafi fago husiyana,ani nomoa heotigiye. ²⁶ Inagi sata a hetino agaia kame hute siyana,aga heotigiye,aga hano hugiye. ²⁷ Hiyana mago vega moa logiya vega mo nopati haino kagemi ya-a kumaya ya osugiye,mani logiya vega mo aiya aya te aga yofi kite neno,inagi henaga agai kagemi ya no afati kumaya ya hugiye. ²⁸ Lama ke naga lapapauwe,mugi faipa ya ve ane mogi hua God'ti na agaya hae sayana,God'ti faipa ya-api atalepate gaiye. ²⁹ Hiyana nalamo Afate Awamu hua agaya hae sayana,God'ti faipa ya-api atale-oapate gaiye,faipa ya-api hane hane huno hane gaiye. ³⁰ Jesu mani ke hiye nayafene,waya mogi hu aemo,"Havi awamu agaipi haneniye." ³¹ Ita amo e kogana amogi ea malaga hetiye,mago vegae haiga Jesu na hapai geno eno hae. ³² Hailaga ve ane mogi faiminea Jesu na faia guaite nea apaga make hua hapaiye,"Ita kogana kamogi malaga mainea kagai hauya nehae." ³³ Aga make huno hapapaiye,"Nalagi ita kogana nimogiye?" ³⁴ Agaie faia wego hua faimina waya aulu hapaeno wego huteno make hiye,"Ageyo,mona apaga ita kogana nimogiye! ³⁵ Lamake ae nalamo God'ti aipale aiyaga wai siyana,inani ve ane apaga kogana,nasa ita nimogiye."