¹ A cava na ka sa vinaka cake kinia, na Jiu? se cava na betena na vicili? ² E levu e na ka kece; e levu sara, ni sa lesi vi ira mera maroroya na Vosa ni Kalou. ³ Ia ka vaevei, kevaka sa yali ni vabautia o ira eso? me vatawayagatakia li na nona dina na Kalou na nodra yali ni vabautia? ⁴ E yali sara, me dina lia na Kalou, ka me lasu na tamata kece lia; me vaka na ka sa volai, Mo vadonui ni ko sa vosa, Ka gumatua ni o sa veileti. ⁵ Ia kevaka sa vadinadinataki nai valavala dodonu ni Kalou ena noda i valavala tawa- dodonu, a cava me da tukunia? Sa yali beka ni dodonu na Kalou, ni sa saumia? (Au sa vosa me vaka lia na tamata.) ⁶ E yali sara, kevaka sa vakakoya, e na qai lewai vuravura vaevei na Kalou? ⁷ Io, kevaka sai koya na noqu lasu sa uasivi cake kinia na nona dina na Kalou, me varokorokotakia ko koya, e na cava au sa cudruvi tiko kinia me vaka na tamata ca? ⁸ ia ena yali beka li ni vaka (ni kitou sa lasutaki, ka sa tukuni ni kitou sa vosa vakane,) Me da caka nai valavala ca, me yaco kinia na ka vinaka? ia ko ira koya, era na cudruvi vadodonu. ⁹ Ia ka vaevei? eda sa uasivi cake beka? E yali sara e na dua na ka: ni kitou sa vadinadinatakia e liu ni ra sa cala kece lia, ko ira na Jiu, kei ira sa matanitu tani; ¹⁰ me vaka sa volai, Sa yali ni dua sai valavala dodonu, sa yali sara ni dua : ¹¹ Sa yali e dua sa kila, Sa yali e dua sa vaqara na Kalou. ¹² Era sa lesu tani kece lia, era sa yaco vata me yali ni yaga; Sa yali ni dua sai valavala vinaka, sa yali sara ni dua. ¹³ Ai bulubulu sa dola tu na nodrai tilotilo; Era sa dauvivakaisini ena gusudra; Sa tu e ruku ni tebe ni gusudra na weli gaga ni gata: ¹⁴ Sa sinai na gusudra ena ruru kei na vosa daugaga: ¹⁵ Sa kusarawa yavadra me vadavea na dra: ¹⁶ Sa tu ena nodra sala na rusa kei na rarawa: ¹⁷ Ia era sa yali ni kila na sala ni vivacegui; ¹⁸ Sa yali vi ira na rerevakia na Kalou. ¹⁹ E da sa kila na ka kece lia sa tukunia na vunau, sa tukunia vi ira sa tu vi ira nai vunau, me vagalui kinia na gusudra kece lia, ka me beitakia ena mata ni Kalou na kai vuravura kece lia. ²⁰ Ena yali ni vadonui vua e dua na tamata enai valavala ni vunau: ni sai koya na vunau sa kilai kinia nai valavala ca. ²¹ Ia ka sa qai vatakilai mai ena gauna koya na ka veivadonui kinia na Kalou, ka ni sa yali ni yaco ena vuku ni vunau, ia sa vadinadina kinia na vunau kei ira na parofita; ²² io, sa caka na vivadonui na Kalou ena vuku ni vabauti Jisu Karisito, vi ira kece lia era sa vabautia; ni da sa tautauvata kece lia: ²³ ni sai valavala ca ko ira kece lia na tamata, ka ra sa yali ni yacovia na ka e varokorokotaki kinia na Kalou: ²⁴ a ra sa vadonui loa lia ena nona loloma ni sa volia na bula ko Jisu Karisito: ²⁵ o koya sa lesi na Kalou mei bulubulu vei ira sa vabautia, e na nona dra, me vatakila na nonai valavala dodonu ni sa yali saumia nai valavala ca sa caka oti, ka ni sa vosotia na Kalou; ²⁶ io, me vatakila e na gauna koya na nona yalododonu: me sa dodonu ko koya, ka vadonui koya sa vabauti Jisu. ²⁷ Sa qai ivei beka na ka ni vidokadokai? Sa takali sara. Ena vuku ni vunau cava? na vunau ni cakacaka beka? E yali; ena vuku lia ni vunau ni vabautia. ²⁸ Ko koya kitou sa vaka sa vadonui na tamata ena vabautia, ia ka yali lia ena vuku ni cakacaka ni vunau. ²⁹ Sa nodra dua loa lia na Jiu ko koya na Kalou? sa yali beka ni nodra voki lia na vimatanitu tani? Io, sa nodra voki lia na vimatanitu tani: ³⁰ kevaka sa dua bau lia na Kalou, ka na vadonui ira sa cili, ena vuku ni vabautia, kei ira voki lia sa yali ni cili, ena nodra vabauta. ³¹ Kitou sa qai vatawayagatakia na vunau ena vabautia, se yali? E yali sara: kitou sa vataudeitakia lia nai vunau.