¹ Ko koya gona sa yali kinia na nomu ulubale, ko iko na tamata yadua sa daulewa, ni ko sa beitaki iko ena nona lewa ni tani, ni ko sai valavala tiko vakinia ko iko sa daulewa. ² Ia eda sa kila sa dina na lewa ni Kalou vi ira sa caka na ka koya. ³ Ia ko iko na tamata, sa lewai ira era sa caka na veika vakakoya ka sai valavala vakinia, ko sa nanumia beka ko na tuba rawa mai na lewa ni Kalou? ⁴ Se ko sa becia beka na nona loloma levu, vata na nona vosotia vadede, vata na nona cudru vamalua, ko sa yali ni vakasama ni sa tuberi iko ki na veivutuni na loloma ni Kalou? ⁵ Ia ko iko, me vaka na nomu yalo kaukauwa vata na lomamu sa yali ni vivutuni, ko sa binia tiko lia vi iko na cudru i na siga ni cudruvi, ena varaitakia kinia na lewa dodonu ni Kalou, ⁶ ko koya na saumia na tamata yadua me vaka na nona i valavala: ⁷ na bula yali ni mudu, vi ira era sa gumatua tiko i nai valavala vinaka ka vaqara nai ukuuku vata na varokoroko vata na yali mate rawa. ⁸ ia na cudru vata na lesavi vi ira era sa dauveileti, ka talaidredre ki nai vavuvuli dina, ia ka talaiwarawara ki nai vavuvuli yali dodonu. ⁹ Na rarawa vata na yaluma, vi ira na tamata kece lia sai valavala ca tiko, sa liu vua na Jiu, vi koya voki lia sa matanitu tani. ¹⁰ Ia nai ukuuku, kei na vakarokoroko, kei na vacegu, vi ira na tamata kece lia sai valavala vinaka, sa liu vua na Jiu, vi koya voki lia sa matanitu tani. ¹¹ Ni sa yali ni vinakati ira vailoa na tamata na Kalou: ¹² ni na rusa me vaka sa yali na vunau ko ira kece lia sai valavala ca ka yali vi ira nai vunau: ia ena lewai enai vunau ko ira kece lia sai valavala ca ka sa tu vi ira na vunau, ¹³ ni ra sa yali ni dodonu ena mata ni Kalou ko ira era sa rogocia loa lia na vunau, ko ira lia era sa muria na vunau era na vadonui: ¹⁴ ni ra sa caka vataki ira lia na ka ni vunau ko ira na vimatanitu tani, sa yali vi ira nai vunau, era sa qai nodra vunau vakai ira lia, ia sa dina sa yali vi ira nai vunau. ¹⁵ ko ira era sa vatakila sara ni sa volai ena yalodra nai valavala ni vunau, ka ni sa vadinadina tiko na nodra lewa e loma voki lia, ka ra sa dui lewa ni sa cala, se sa dodonu na nodrai valavala ¹⁶ ena siga ena lesi Jisu Karisito kinia na Kalou me lewa na nodra vi ka vuni tu na tamata, me vaka na noqui tukutuku vinaka ¹⁷ Ia kevaka ko sa vakatokai mo Jiu, ka ko sa vararavi ena vunau, ka sa dokadokai iko ena vuku ni Kalou, ¹⁸ ia ko sa kila na lomana, ka vinakatia na veika sa vinaka sara, ni ko sa vavulici mai na vunau, ¹⁹ ko sa vararavi voki lia vi iko mo yadi ira na mataboko, mo nodra rarama era sa tiko ena butobuto, mo nodra i vavuvuli era sa lialia, ²⁰ mo nodrai vavuvuli na gone lalai, ni sa nomu ena vunau nai vatakarakara ni vuku dina; ²¹ ia ko iko, ko sa dauvatavulicia na tani, ko sa yali ni vatavulici iko? ko iko, ko sa dauvunau me kua na butako, ko sa bau butako ko iko? ²² ko iko, ko sa dau kaya me kakua na dauyalewa, ko sa bau dauyalewa ko iko? ko iko, ko sa daucatia na vimatakau, ko sa bau butako mai na valenisoro? ²³ ko iko, ko sa dokadokai iko ena vuku ni vunau, ko sa bau valialiai koya na Kalou ni sa talaidredre ki nai vunau gona? ²⁴ Ni sa dau vosavacacataki na yaca ni Kalou vi ira na vimatanitu ena vukumudou, me vaka sa volai. ²⁵ Ni sa dina sa yaga na vicili, kevaka ko sa talairawarawa ki nai vunau, ia kevaka ko sa talaidredre ki nai vunau, sa yaco kinia na nomu cili me yali cili. ²⁶ Ia kevaka e dua sa yali ni cili, ka sa muria nai valavala dodonu ni vunau, ena yali li ni wili na nona yali cili me cili? ²⁷ Ia ko koya sa yali cili vayago, kevaka sa muria nai vunau, ena yali lewai iko, ko iko sa talaidredre ki nai vunau, ka sa tu vi iko nai vola ni vicili? ²⁸ Ni sa yali ni Jiu koya sa vakinia varairai loa lia, ia sa yali ni veicili na ka sa rairai loa lia ena yago: ²⁹ ia sa Jiu o koya sa vakinia i loma, a sa vayalo na veicili, sa ka ni yalo, ka sa yali ni ka ni vosa loa lia, o koya sa yali ni doka o ira na tamata, sa doka lia o koya na Kalou.