¹ Sa vu mai vei na viba kei na vivala vi ikodou? sa yali li ni vavuna na nomudou gagadre ca sa vivala e na vitiki ni yagomudou? ² Dou sa kocokoco, ka yali ni rawatia: dou sa vivamatei kinia, ka dou sa daugagadre, ka yali ni tauria rawa me nomudou: dou sa vivala ka veiba kinia, ia dou sa yali ni rawatia, ni dou sa yali ni kerekere. ³ Dou sa kerekere lia, ka yali ni rawatia, ni dou sa kerekere e nai naki cala, mo dou vayalia e na nomudou gagadre ca. ⁴ Oi ikodou na dauyalewa kei na dautagane, dou sa yali beka ni kila, ni sa veicati kei na Kalou na veivinakati kei vuravura? ia sa veimecaki kei na Kalou ko koya sa via veiwekani kei vuravura. ⁵ Dou sa vakasama beka ni sa tukunia lowa lia nai Vola Tabu, Sa gadrevia vakavuvu na Yalo sa tiko e na lomada? ⁶ Ia sa solia vakalevu na loloma ko koya. O koya sa tukunia kinia ko koya, O ira sa viavialevu sa vorati ira na Kalou, ia sa solia na loloma vei ira era sa yalomalumalumu. ⁷ O koya mo dou qai vamalumalumutaki ikodou vua na Kalou. Voratia na tevoro, ena dro tani kinia vei ikodou ko koya. ⁸ Toro voleka yani vua na Kalou, ka na toro voleka mai vei ikodou ko koya. Vakasavasavatakia na ligamudou, oi ikodou na lomalomarua. ⁹ Dou mai rarawa, ka qoqolou, ka tagi: me vuki na nomudou dredre me qoqolou, kei na nomudou marau me mataveveku. ¹⁰ Dou vamalumalumutaki ikodou e na mata ni Turaga, ka na laveti ikodou cake ko koya. ¹¹ Kakua ni dou veikaseti, na veiwekani. O koya sa kasetia na wekana ka vakalewai koya na wekana, sa kasetia na vunau ka sa vakalewa voki lia nai vunau. Ia kevaka ko sa vakalewa na vunau, ko sa qai yali ni muria nai vunau, ia ko sa turaga ni lewa lia. ¹² Sa dua loa lia sa vaturia nai vunau ka turaga ni lewa, o koya lia sa rawa ia na veivabulaikei na vivarusai, o cei ko iko mo vakalewa na tani? ¹³ Dou qai mai, oi ikodou sa dau kaya, ni kua se na savulaci eda na qai ki na koro gona, ka tiko kinia ka yabaki dua, ka veivoli kinia, ka rawatia nai yau: ¹⁴ ia dou sa yali ni kila na ka sa na yaco e na savulaci: A cava na nomudou bula? Na kabukabu loa lia koi ikodou, sa rairai ka dede valailai lia, sa qai seavu yani. ¹⁵ Ia koya mo dou kaya, Kevaka sa vinaka vua na Turaga, eda na bula, ka caka na ka koya, se na ka ko ya. ¹⁶ Ia dou sa qai marau ka dokadokai ikodou: e ca na marau kece lia sa vaka ko ya. ¹⁷ O koya sa valavala ca kinia vua sa kila me caka vinaka, ka yali ni caka.