¹ Dou qai mai, oi ikodou na tamata vutuniyau, dou tagi ka qoqolou ena vuku ni nomudou ka rarawa ena yaco mai. ² Sa vuca na nomudou iyau, a sa kania na nomudou isulu na sarasara. ³ Sa veveka na nomudou koula kei na siliva, ka na tukuni ikodou na kena veveka ka na kania lewemudou me vaka na bukawaqa. Dou sa kumunia vata nai yau me yacovia na gauna mai muri sara. ⁴ Raicia, sa tagi na kedrai voli na tamata daucakacaka era sa tamusukia na nomunu veiwere, o koya dou sa besetakia, ka sa yaco ki na daligana na Turaga ni lewe levu na nodra tagi ko ifra sa dautatamusukia. ⁵ Dou sa marau tiko lia e vuravura ka dou sa daukana tiko. Dou sa dau vakania na lomamudou ena siga sa ia kinia na dauveivakamatei. ⁶ Dou sa lewai koya na yalododonu ka dou sa vakamatea, ka yali ni voratia ikodou ko koya. ⁷ O koya lia koya, na veiwekani, mo dou vosotia, me yacovia na nona lesu voki mai na Turaga. Raicia, nai vatawa-ni-were sa warakia na vua ni qele e talei, ka sa wawa vadede me rawatia mada na uca tau iliu, kei na uca tau muri. ⁸ Dou vosotia voki lia koi ikodou vataudeitakia na yalomudou, ni sa voleka mai na nona qai mai na Turaga. ⁹ Dou kakua ni veicudruvi na veiwekani, de dou cudruvi. Raicia, sa tu e na mata ni daravaq na turaga ni lewe! ¹⁰ Oi ikodou na wekaqu, vakadamurimuri ira na parofita, e na nodra vosotia na ka rarawa, kei na nodra dauvosotia, era a vosa ena yaca ni Turaga. ¹¹ Raicia, eda sa vakayacani ira era sa vosotia mera kalougata. Dou a rogocia na dauvosota ni Jope, dou sa raicia voki lia ni sa tinia vacava na Turaga; ni sa yalovinaka sara na Turaga, ka sa yalololoma. ¹² Ia na ka levu sara koya, oi ikodou na wekaqu, mo dou kakua sara ni bubului, kakua ki lomalagi, se ki vuravura, se ki na dua voki na ka, me io lia na nomudou io, ia me yali lia nanomudou yali, de dou cudruvi kinia. ¹³ Kevaka e dua vi ikodou sa vararawataki, me masu tiko. Kevaka e dua sa marau, me sere. ¹⁴ Kevaka e dua vi ikodou sa tauvi-mate, me kacivi ira na matua ni soqosoqo lewe ni lotu; ia me ra masulaki koya, ka lumutia e na waiwai e na yaca ni Turaga: ¹⁵ ia na masu ni vabauta ena vabulai koya sa tauvi mate, ka na vabulai koya na Turaga, ia kevaka sa kitaka nai valavala ca, ena vosoti ko koya. ¹⁶ O koya mo dou dui vakatusa kinia na nomudoui valavala ca, ka veimasulaki, mo dou vabulai kinia. Sa kaukauwa vakalevu ka gumatua na nona masu na tamata yalododonu. ¹⁷ A tamata sa vataki ita lia ko Ilaijia, a sa masu vagumatua sara me kakua ni tau mai na uca, ka sa yali kinia ni tau mai na uca e vuravura, ka sa oti mada na yabaki tolu kei na vula ono. ¹⁸ A sa qai masu voki, a sa tau na uca mai Lomalagi, a sa vuatakia na vuana na qele. ¹⁹ Oi ikodou na veiwekani, kevaka e dua vei ikodou sa qai tani mai nai vavuvuli dina, a sa valesui koya voki mai e dua; ²⁰ me kila ko koya koya, o koya sa valesuya voki na tamata caka cala mai na nonai valavala e cala kinia ka sa vabula na yalo mai na mate, a sa bulutia voki lia nai valavala ca e levu.