¹ Oi ikodou na wekaqu, me kakua ni lewe levu vi ikodou mei vavuvuli, ni dou sa kila eda na lewai vakalevu cake enai vavuvuli . ² Ni da sa cala kece lia e na ka e levu. Kevaka sa yali ni cala e dua e na vosa, sa tamata uasivi sara ko koya, a sa rawarawa vua me tarovia na yagona taucoko ³ Raicia, kevaka eda sa vaciqiria na kedrai tatarovi na ose ki na gusudra, me ra talairawarawa kinia vi ita, eda sa qai saumakia na yagodra taucoko. ⁴ Raicia voki lia na waqa, ni sa ka levu vaidina, a sa savu kalia e na cagi kaukauwa, ia sa saumaki lia e na uli lailai sara, ki na yasana e vinakatia ko koya sa tauria nai uli. ⁵ Sa vaka voki lia kinia na yameda ni sa tikida lailai lia, a sa vosa vaviavialevu. Raicia, sa vacaudrevia na buka levu na bukawaqa lailai! ⁶ ia sa bukawaqa na yameda, a ka taucoko ni ca: sa vakinia na yameda e na veitiki ni yagoda taucoko, a sa vacaudrevia nai valavala kece lia ni yagoda; a sa vacaudrevia qori ko eli. ⁷ Ni sa vamanoatakia na manumanu kece lia e yavai va, kei na manumanu vatabana, kei na ka sa qasi, kei na ka ni waitui, a sa vamanoataki ira tu ko ira na tamata: ⁸ ia ka sa yali na tamata sa vamanoatakia rawa na yame; a ka ca sa yali ni tarovia rawa, sa sinai e na ka gaga e dauveivamatei. ⁹ Eda sa vavinavinaka kinia vua na Turaga ko Tamada; eda sa rukaki ira voki lia kinia na tamata, era sa buli me tautauvata kei na Kalou. ¹⁰ Sa vu mai na gusu e dua loa lia, na vavinavinaka kei na veirukaki. Oi ikodou na wekaqu, e yali ni dodonu me vakinia na veika koya. ¹¹ E dua beka na mata-ni-wai sa vadavea mai na matana e dua loa lia na wai dranu kei na wai gaga voki lia? ¹² Oi ikodou na wekaqu, sa dua beka na lolo sa vuatakia rawa na olive? se dua li na vaini, me vuatakia na lolo? sa vakinia, sa yali ni vakakinia e dua na mata-ni-wai me tovure mai kinia na waitui kei na wai dranu. ¹³ O cei vi ikodou sa vuku ka yalomatua? me vatakila e nai valavala vinaka na nona cakacaka e na vuku sa yalomalua. ¹⁴ Ia kevaka sa tu e na lomamudou na dauvuvu e gaga kei na dauveiba, dou kakua ni valevulevui ikodou, se lasutakia nai vavuvuli dina. ¹⁵ A vuku va gona sa yali ni qai mai colo, sa vavuravura lia, sa vakayago, sa vakatevoro. ¹⁶ Io, kevaka sa tu na vuvu kei na veiba, sa tu kinia na veisei kei na cakacaka kece lia e ca. ¹⁷ Ia na vuku mai colo sa savasava mada, emuri sa dauia na veivacegui, sa yalomalua, sa vamasuti rawarawa, sa sinai e na loloma kei na vua vinaka, ka yali ni digitaki ira vakailoa na tamata, se dauveivaisini. ¹⁸ Ia na vua ni valavala dodonu sa kaburaki vata kei na veivacegui vei ira era sa caka tiko na veivacegui.